APRIL 1, 2022
RUSSIA

Mubali Sergey Belousov Wakukhozgera Zina la Chiuta

JULANI

Pa April 14, 2022, Khoti ilo lili mu Msumba wa Seversk ku Chigaŵa cha Tomsk likati Mubali Sergey Belousov wali na mulandu ndipo wakapika chilango chakuti waleke kusangikaso na mulandu unyake kwa vyaka vitatu. Pasono ŵamujalirenge mu jele yayi.

Nyengo

July 14, 2020

Ŵa FSB ŵakasecha nyumba 7 kusazgapo na nyumba ya Sergey. Pambere ivi vindachitike, munthu munyake uyo wakatumika na boma wakapusikizgira kuti wakukhumba kusambira Baibolo ndipo wakajambura mwakubisirizga maungano gha mpingo
March 25, 2021

Sergey ŵakamujulira mulandu
March 30, 2021

Sergey wakapika mulandu kutolera pa maungano agho munthu uyo wakatumika na boma wakajambura. Ŵakati wali na mulandu chifukwa cha kutoramo chigaŵa mu maungano gha chisopa agho ghakachitikanga kwizira pa videoconference, kweniso chifukwa cha kwimbako sumu na kulomba kwa Yehova Chiuta

Vyakukhwaskana na munthu uyu

Sergey Belousov

Chaka cha kubabikira: 1978 (Esil, Kazakhstan)

Mbiri yake: Wakakulira mu mbumba iyo mukaŵa ŵakwimba. Wakagwirapo ntchito ya vya magesi kweniso wakagwirapo pa kampani yinyake. Kufuma apo wakagwirapo ntchito yakulemba mapulani gha vinthu vyakupambanapambana. Wakatorana na Svetlana mu 1999. Ŵali na mwana yumoza mwanakazi

Ŵakakumana na Ŵakaboni ŵa Yehova mu 2001. Wakamanya zina la Chiuta lakuti Yehova, kufuma mu Baibolo, ndipo wakasanga mazgoro ghakukhorweska gha mafumbo agho wakaŵa nagho. Wakabatizika mu 2002

Ivyo Wakayowoya

Kasi ŵabali na ŵadumbu ŵamovwirani wuli imwe na mbumba yinu?

Ŵabali na ŵadumbu ŵithu ŵandatilekepo tekha. Ŵati ŵasecha waka nyumba yithu, zuŵa lakulondezgapo ŵabali na ŵadumbu ŵakiza kuzakatikhozga. Mafoni, matabuleti na ma laputopu ghithu ŵali kutipoka, ntheura tikatenge titondekenge na kuŵazga Baibolo wuwo. Kweni ŵabali ŵakatipa mafoni ghawo, ndipo ivi vikutovwira kuti tilutilire kusanga chakurya chauzimu.

Ntchivichi chikumovwirani kuti mulutilire kuzizipizga?

Nyengo zose nkhujikumbuska fundo yakuti vilije kanthu kuti kwali khoti lidumurenge wuli mulandu wane, kweni mu maso gha Yehova ndise ŵakutonda nakale. Chakukhumbikwa nkhuŵa na loya muwemi yayi, kweni kuŵa paubwezi wakukhora chomene na Chiuta. Ise palije icho tananga. Tili mu nyengo yapadera chomene. Ni mwaŵi wapadera kutoramo chigaŵa mu vinthu vyanthena ivi! . . . Chilato chithu ntchakuti nase [tovwirepo] pa kuthuwuska muwuso wa Chiuta. Tikuluta ku khoti kuti tikalongore waka kuti ndise ŵambura kubuda yayi. Kweni tikuluta na chilato chakuti tikakhozgere zina la Yehova.

Nga ni Sergey, apo tikulumba zina la Yehova, tikukhorwa kuti “Wakwezgenge nkhongono za ŵanthu ŵake.”—Salimo 148:13, 14.