Pa January 19, 2021, Khoti la Kemerovo likakana apilu ya Mubali Sergey Britvin na Vadim Levchuk. Apa ndikuti chilango icho ŵakapika chakuti ŵaleke kusangikaso na mulandu kwa vyaka vinayi chiyambenge kugwira ntchito. Chifukwa cha nyengo iyo ŵakaŵasungiranga mu jele pambere mulandu wawo underuzgike kweniso nyengo iyo ŵakakhalira pa jele la panyumba, ŵabali aŵa ŵakuŵatora kuti ŵangwirako kale jele vyaka vyakujumpha pa vitatu. Ivi vikung’anamura kuti kwakhala chaka chimoza kuti ŵamalizge vyaka ivyo ŵakaŵagamula kuti ŵaleke kusangikaso na mulandu. Wose ŵachali ŵakukhora ndipo ŵakugwiriskira ntchito mwamahara nyengo yawo.

Apo ŵakamalizganga kutegherezga mulandu wawo, ŵabali aŵa ŵakayowoya mwachikanga vya chipulikano chawo mwa Yehova kweniso vyandulo ivyo ŵasanga chifukwa cha kumuteŵetera.

Mubali Sergey wakaphalira khoti kuti: “Kasi khoti likukhumba kuti nichite vichi? Kuti nikane chipulikano chane? Nkhukayika yayi na pachoko kuti chipulikano chane mwa Yehova ndicho chanovwira chomene kuti nisinthe na kuŵa mwenekaya muwemi wa Russia. Nkhumuwonga chomene Chiuta chifukwa chakunovwira kuponoska banja lane na kunovwira kuti niŵe na umoyo uwemi. Yewo chomene Yehova, pasono nkhokhorwa na umoyo kweniso nkhukhorwa kuti kunthazi uku vinthu vizamusintha na kuŵa makora. Chinthu chakuzirwa chomene kwa ine mbubwezi wakukhora uwo nili nawo na Chiuta, Yehova. Nkhuwona ubwezi uwu kuti ngwamtengo wapatali, vilije kanthu kuti nkhupika mulandu wuli.”.”

Vadim wakati: “Kwa ine, umo nkhani yose iyi yenderanga, nanguŵa na mtende ukuru chomene chifukwa Yehova wanguŵa kuchigaŵa chane ndipo nane nili ku chigaŵa cha Yehova. Mulimose umo mweluzgirenge, chakuzirwa chomene kwa ine ni umo Chiuta wakuwonera vinthu. Nkhuwona kuti ni suzgo yayi kulutilira kuŵa na mikhalirao iyo yikukondweska Chiuta nga ni chitemwa, chimwemwe, mtende, lusungu, chipulikano, kuzika na kujikora.”