SEPTEMBER 15, 2023
RUSSIA

Mubali Sergey Gromov Wapika Chilango Chakugwira Jele Vyaka 6 na Mwezi Umoza ku Russia

JULANI

Pa September 14, 2023, Khoti la Moskovskiy ilo lili ku Chigaŵa cha Kazan likati Mubali Sergey Gromov wali na mulandu ndipo wakagwire jele vyaka 6 na mwezi umoza. Mubali uyu wakatolekera ku jele pa March 15, 2022, ndipo m’paka sono wachali wandafumiskike.

Vyakukhwaskana na munthu uyu

Sergey Gromov

Chaka cha kubabikira: 1969 (Kazan, Republic of Tatarstan)

Mbiri yake: Wakagwiranga ntchito yakuŵika vithuzi mu nyuzipepara

Wakatorana na Yelena mu 1990. Ŵali na ŵana ŵaŵiri, mwanalume na mwanakazi

Apo wakakuranga wakagomezganga yayi kuti Chiuta waliko kweni wakajifumbanga pa nkhani ya umo umoyo ukambira. Wakamba kusambira Baibolo na Ŵakaboni ŵa Yehova. Wakakondwa chomene kuwona kuti Baibolo likukolerana pa nkhani za sayansi. Iyo pamoza na Yelena ŵakabatizika mu 1995

Ivyo Wakayowoya Muwoli wa Sergey, Yelena a

Kasi mukanozgekera wuli nthambuzgo lumoza na mfumu winu Sergey?

Pa nyengo iyo vinthu vikasintha ku Russia mu 2017, tikamanya kuti tili tekha yayi. Kweni tikathulira Yehova vyose ivyo tikenjerwanga navyo. Nga ni mbumba, tikalondezga ulongozgi uwo tikapika ndipo tikaŵa ŵakukhumbisiska kulondezga m’malo mwakuchita wofi na ivyo vikuchitika. Tikalutilira kuchita vinthu vyauzimu pa umoyo withu uku tikulutilira kulomba kwa Chiuta kweniso ŵabali na ŵadumbu ŵakatikhozganga chomene.

Kasi Yehova wamovwirani wuli pa nyengo iyo afumu ŵinu ŵali ku jele?

Pa nekha nindalombepo kwa Yehova kanandi nthena nga umo viliri pasono kufuma waka apo Sergey wakajalilikira mu jele. Nkhumanya kuti ubwezi wane na Yehova ngwakukhora chomene. Ndipo wanisidenge nekha yayi kuti nilimbane na suzgo ili. Nyengo zinyake nkhuwona kuti para namara waka kulomba, nyengo yeneyiyo wakuzgora lurombo lwane na mazgu ghawemi, kunihaga, kweniso kunikhozga kwizira mwa munthu munyake. Vili nga ni para Yehova wakuŵagwiliskira ntchito kuti ŵanikhozge. Ivi vyanovwira chomene kuti nileke kughanaghanira waka vya masuzgo ghane. Kweniso vyanovwira kuti nichite chilichose icho ningafiska kuti novwire ŵanji.

Tikukondwa chomene na chiyelezgero chiwemi cha mubali Sergey na Yelena chifukwa chakugomezgeka kwawo kweniso kuthemba chomene Yehova. Yehova waŵatumbikenge apo ŵakulutilira kuŵa ŵakugomezgeka kwa iyo, ndipo ivi vikutipa chigomezgo chose chakuti “woko la Yehova ndifupi chara kuti lileke kuponoska, khutu lake ndakumangwa yayi kuti lileke kupulika.”—Yesaya 59:1.

Nyengo

March 15, 2022

Ŵakamujulira mulandu. Wakatoleka kuti wakafumbike mafumbo na kumuŵika mu jele la awo milandu yawo yinderuzgike
March 16, 2022

Ŵakasecha nyumba yake
March 17, 2022

Ŵakamusamuska na kumuŵika mu jele linyake
March 30, 2023

Khoti likamba kutegherezga mulandu wake
September 14, 2023

Wakapika chilango chakugwira jele vyaka 6 na mwezi umoza

a Mubali Gromov wakaŵa mu jele apo nkhani iyi yikalembekanga. Chikaŵa chakusuzga kuyowoya nayo.

Wonaniso

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI