Pa November 30, 2022, Mubali Sergey Polyakov wakafumiskika mu jele wati wamalizga kugwira jele la ilo wakapika la vyaka vitatu. Kufuma waka apo ŵakamukakira pa July 4, 2018, wazizipizga masuzgo ghanandi, kusazgapo kusungika kwa yekha kwa myezi 5.

Sergey wakakhala myezi 16 mu jele la ku Valday, mtunda wa makilomita 3,000 kufuma kukwake. Wakamanyikwanga kuti nimukayidi wachipulikano chomene ndipo wakachindikikanga chomene na awo ŵakugwira ku jele kweniso ŵakayidi ŵanyake. Panyengo iyo wakaŵira mu jele, Sergey wakakhozgekanga chomene na makalata ghakufuma ku ŵabali na ŵabwezi. Pa zuŵa wakapokeranga makalata ghanandi kuluska ŵanthu 250 awo ŵakaŵa mu jele.

Wati wafumiskika, Sergey wakakumanaso na muwoli wake, Anastasia. Anastasia nayo wakakhalapo mu jele la yekha kwa myezi 5. Pamanyuma wakapika mulandu na kweruzgika kuti waleke kusangikaso na mulandu chifukwa waka cha ivyo wakugomezga. Sergey na Anastasia ŵakaŵa ŵakutorana ŵakwamba kujalirika mu jele pamanyuma pa chigamuro icho Khoti Likuru likapeleka mu 2017.

Pasono ŵabali na ŵadumbu ŵakujumpha 100 ŵali mu jele ku Russia na Crimea. Tili na chigomezgo chose kuti Yehova walutilirenge kuŵawovwira apo ‘ŵakuzizipizga viyezgo na kusuzgika chifukwa cha njuŵi yawo kwa Chiuta.’—1 Petrosi 2:19.