Pa March 1, 2021, a Khoti la Priokskiy ku Nizhny Novgorod lingazakapeleka chigamuro chake pa mulandu wa Mubali Sergey Verkhoturov. Wangazakaphalirika kuti wagwire jele vyaka 7.

Sergey Verkhoturov

• Chaka cha kubabikira: 1974 (Baikalsk, Chigaŵa cha Irkutsk)

• Mbiri yake: Wakagwira ntchito ya vya magesi kwa vyaka 10. Mwasonosono apa, wawovwiranga kampani yinyake pa nkhani ya vya malango

• Wakamba kutemwa uthenga wa mu Baibolo wachali muchoko. Wakati waŵa mulara, wakakhorwa na nkharo yiwemi ya munyake wa ku ntchito uyo wakasambiranga Baibolo na Ŵakaboni ŵa Yehova. Ivi vikapangiska kuti nayo wazomere kusambira Baibolo. Wakazizwa kuwona kuti Baibolo likuneneska kweniso uthenga wake ngwambura kusuzga kupulikiska. Wakabatizika mu 1995. Wakatorana na muwoli wake, Viktoriya mu 2001

Pa July 16 na 17, 2019, ŵamazaza ŵa ku Russia ŵakasecha nyumba 35 za Ŵakaboni ŵa Yehova ku Chigaŵa cha Nizhny Novgorod, kusazgapo na nyumba ya Verkhoturov. Apo ŵamazaza aŵa ŵakambanga kusecha, iyo wakukumbuka kuti: “Nkhatenthema yayi ndipo nkhafipanga mtima pachoko waka.” Kufuma apo, ŵamazaza aŵa ŵakamba kumofya kuti ŵamumujalira mu jele Viktoriya para wakuleka kuvumbura vinthu vya chisisi. Sergey wakuti: “[Ichi] chikaŵa chakusuzga chomene kwa ine.” Mtima wake ukalutilira kuŵa m’malo na wovwiri wa Yehova, ndipo Viktoriya b wakajalirika mu jele yayi.

Iyo wakuti: “Nasambira kuti nkhwenera yayi kopa vinthu ivyo vindachitike, chifukwa kanandi vikuzakaŵa umo iwe ukawoneranga pakwamba yayi. Para ukuzizipizga chiyezgo, ukuwamo kuti chikuwoneka chikuru chomene ku ŵanthu ŵanyake awo ŵakuwona, wamweneko yayi. Nakuti ukuwonaso kuti Yehova wakukovwira mu nthowa yinyake yapadera.”

Kuti walutilire kuŵa wakukondwa, Sergey wakuŵika mtima pa kuteŵetera Yehova na ŵanji. Iyo wakuti: “Khumbo lane ndakuti Yehova wapike uchindami. Nkhulomba ndipo nilutilirenge kuyilombera nkhani iyi. Nkhulombaso kuti nizizipizge chiyezgo ichi mu nthowa yakuti zina lake lichindikike kweniso kuti nichitire ukaboni ku ŵanji. Ŵanthu awo nasangana nawo kufuma apo ŵakambira kunipa mulandu, panji ŵakumanya vichoko chomene panjiso ŵakumanya kalikose yayi kakukhwaskana na Chiuta. Nkhulomba kwa Yehova kufumira pasi pa mtima kuti waŵawovwire kusambira vinandi vya iyo na kuŵa nayo paubwezi.”

Apo ŵabali na ŵadumbu ŵithu ku Russia ŵakulutilira kutambuzgika, nase tikujipulika nga ni mpositole Paulosi uyo wakati: “Mphanyi munthowa yiliyose, Fumu yamtende yalutilira kumupani mtende. Fumu yiŵe namwe mose.”—2 Ŵatesalonika 3:16.