Khoti la Leninskiy ilo lili mu Chigaŵa cha Kirov sonosono apa lipelekenge chigamuro pa mulandu wa Mubali Aleksandr Shamov, Andrey Shchepin, na Yevgeniy Udintsev. a

Aleksandr Shamov

• Chaka cha kubabikira: 1960 (ku Komarovo, Chigaŵa cha Kirov)

• Mbiri yake: Mu nyumba yakwawo ŵalimo ŵana 6. Ŵapapi ŵawo ŵakafwa apo wakaŵa muchoko. Wakamba kugwira ntchito ku famu yakwawo apo wakaŵa na vyaka 6. Wakamalizga sukulu ku koleji ndipo wakamba kunozga ma TV. Wakatorana na Nadezhda mu 1986. Ŵali na mwana mulara msungwana. Pasono wakupokera penshoni pamanyuma pakuti wakachira kunthenda ya mtima kweniso pamanyuma pakumupanga opareshoni ya mtima. Aleksandr na Nadezhda ŵakamba kusambira Baibolo na Ŵakaboni ŵa Yehova cha m’ma 1990. Aleksandr wakabatizika mu 2000

Andrey Shchepin

• Chaka cha kubabikira: 1991 (ku Korolev, Chigaŵa cha Moscow)

• Mbiri yake: Wakasambira unenesko kufuma ku ŵapapi ŵake. Wakatorana na Ksenia mu 2015. Wakugwira ntchito ya uinjiniya. Wakabatizika mu 2010

Yevgeniy Udintsev

• Chaka cha kubabikira: 1949 (ku Kirov)

• Mbiri yake: Apo wakaŵa muchoko wakalwara chomene nthenda ya mtima. Wakasambira chomene vyakukhwaskana na uinjiniya na kupanga visulo (ntchito ya visulo). Wakatora Elizaveta mu 1970. Ŵose ŵakasambira unenesko kufuma kwa mukuru wa Elizaveta mu 1991. Kutemwa Yehova kukamovwira kuti waleke kukhweŵa hona na kumwa chomene moŵa. Wakabatizika mu 1996

Pa March 26, 2019, ŵamazaza ku Russia, ŵakasecha nyumba 12 za Ŵakaboni ŵa Yehova ku Kirov. Ŵati ŵasecha kweniso kufufuza maukaboni ghakupambanapambana, ofesi ya wakwimira boma pa milandu yikajulira mulandu Mubali Aleksandr, Andrey, na Yevgeniy. Andrey ŵakamusunga kwa mazuŵa ghaŵiri. Wakwimira boma pa milandu wakati vinthu vyakukhwaskana na kusopa ivyo ŵabali aŵa ŵakachitanga ni vinthu “vyakofya.” Ŵabali aŵa ŵakuti ŵali na mulandu chifukwa cha kuŵerenga Baibolo kweniso kwimba sumu za Ufumu.

Ŵabali aŵa ŵakugomezga chomene Yehova, gulu lake, kweniso Baibolo kuti ŵazizipizge nthambuzgo iyi. Mwachiyelezgero, Mubali Aleksandr wakusanga nkhongono kufuma ku viyelezgero vya “bingu likuru . . . la ŵakaboni” ilo likuzunulika mu chaputara 12 cha buku la Ŵahebere. Iyo wakuti: “Kwamba kale, ŵateŵeti ŵa Chiuta ŵakamanyanga kuti chipulikano chikukhumbikwira milimo ya chikanga kweniso kuzizipizga. Para vinthu vyanithina chomene, nkhughanaghanira waka viyelezgero vyawo. Iwo ŵakazizipizga nanga zingaŵa nkhaza zikuru chomene kweniso vinthu vyambura urunji. Ivi vikunovwira kuti nilutilire ‘kukoleska chomene chipulikano.’—Yuda 3.

Mubali Andrey wakukhozgeka na nkhani zakulongosora umoyo wa ŵanthu za Ŵakaboni ŵakugomezgeka ŵa mu nyengo ya chipani cha Nazi kweniso mu nyengo ya Soviet Union. Iyo wakuti: “Nkhudokera chomene chikanga icho ŵakaŵa nacho.” Kweniso wakakhozgeka chomene na umo Yehova wakazgolera malurombo ghawo na kuŵatumbika chifukwa cha kugomezgeka kwawo. Ivi vikamupangiska kuti para wakulomba, walombenge mwakudunjika kwa Yehova. Iyo wakuti: “Nkhalomba kuti niŵe na chikanga, enya nkhalomba chikanga, chikanga, ndiposo chikanga. . . . Tikumanya kuti tikukhala mu nyengo yapadera chomene. Ivyo vikutichitikira vikutipa mwaŵi wakuti tovwire ŵanji, tilongore viyelezgero viwemi, kweniso timugomezgenge chomene Yehova.”

Tikuŵalombera ŵabali ŵithu ŵatatu aŵa na mabanja ghawo. Tikumanya kuti Yehova walutilirenge kuŵapembuzga na ‘kuŵakhozga kuti nyengo zose ŵachitenge na kuyowoya icho ntchiwemi.’—2 Ŵatesalonika 2:17.