JUNE 27, 2023
RUSSIA

Mubali Skvortsov na Mubali Tibiy Ŵali Kuŵasanga na Mulandu

JULANI

Pa June 20, 2023, khoti la Msumba wa Taganrog ku Chigaŵa cha Rostov likati Mubali Aleksandr Skvortsov na Mubali Valeriy Tibiy ŵali na mulandu. Aleksandr ŵali kumupa chilango chakuti wakakhale vyaka 7 ku jele. Mubali uyu wakhala mu jele kwambira pa December 7, 2021, ndipo walutilirenge kuŵa mu jele. Valeriy ŵali kumuphalira kuti waleke kusangikaso na mulandu kwa vyaka 6. Wakhala mu jele kufuma pa May 18, 2022, ndipo pasono ŵali kumufumiska.

Vyakukhwaskana na ŵanthu aŵa

Aleksandr Skvortsov

Chaka cha kubabikira: 1962 (Taganrog)

Mbiri yake: Wakagwiranga ntchito yakotchelera visulo

Wakatorana na Larisa mu 1983. Ŵali na ŵana ŵaŵiri ŵasungwana

Larisa wakamba kusambira Baibolo na Ŵakaboni ŵa Yehova ndipo wakabatizika mu 1996. Aleksandr wakakondwa kumanya ivyo Baibolo likuyowoya kuti Chiuta wazamumazga vinthu vyambura urunji pa charu chose. Wakabatizika mu 1997

Wakakakikapo mu 2015 ndipo wakapika chilango chakuti waleke kusangikaso na mulandu kwa vyaka 5 na hafu.

Ivyo Muwoli Wake Larisa Wakayowoya

Kasi ntchivichi chikovwira mfumu winu kuti wazizipizge apo wali mu jele?

Mu chaka chimoza pera, Aleksandr wakasamuskira mu majele ghakupambanapambana 13. Nangauli vyakuchitika vya mfumu wane na ŵakayidi ŵanyake vikupambana kweni mfumu wane nyengo zose wakuŵikapo mtima kuti waŵe paubwezi na waliyose. Kanandi wakuyowoya kuti para wakulomba kwa Yehova, kuŵazga Baibolo kweniso makalata agho wakupokera, vikumovwira kuti walutilire kuŵa wakukhora mwauzimu. Chinthu chakusuzga chomene kwa iyo nkhuŵa kutali na banja lake, kweni Yehova wakumovwira kuti walutilire kuŵa na mtende wa mumtima.

Kasi ivyo vyamuchitikirani vyakhwaska wuli ubwezi winu na Yehova?

Pasono nkhumugomezga chomene Yehova kuluska kumanyuma kose. Para nkhuwona umo Yehova wakunovwilira ine kweniso mfumu wane, nkhuŵa wakusimikizga kuti Yehova wakutitemwa. Para nkhuwona umo ŵabali na ŵadumbu ŵithu wakutovwilira na kutilombera nkhuthiska waka masozi.

Valeriy Tibiy

Chaka cha kubabikira: 1977 (Novopokrovka, Crimea)

Mbiri yake: Wakendeskanga magalimoto ghakurughakuru

Wakamba kusambira Baibolo na Ŵakaboni ŵa Yehova pamanyuma pakuti wamanya zina la Chiuta. Wakabatizika mu 2004

Wakatorana na Kristina mu 2012

Ivyo Muwoli Wake Kristina Wakayowoya a

Kasi Mfumu winu Valeriy wakuzizipizga wuli apo wali ku jele?

Kanandi mfumu wane Valeriy wakulomba kwa Yehova kuti wamovwire kuŵa wakuzikira kweniso kuti wamupe nkhongono kuzizipizga chiwawa na kulundana kwa ŵanthu mu jele. Ŵakayidi ŵanyake ŵakuwona kuti ngwakuzikira kweniso nkhwakukhora. Kanandi ŵakumufumba kuti: “Kasi ukukwaniska wuli kuŵa wakuzika nthena? Ndiwe munthu wakukondwa chomene kuluska tose mu jele muno.” Valeriy ngwakukondwa kuti wakuchezga makora na ŵakayidi ŵanyake chifukwa Yehova wakumovwira na fundo zake. Mwakuti ŵakayidi ŵanyake ŵakufumbangako mahara kwa iyo. Iyo wakuwona kuti Yehova wakumutumbika chifukwa ŵakayidi ŵanyake ŵakumuchindika chomene.

Kasi ni lemba wuli ilo lamukhozgani chomene munyengo yakusuzga iyi?

Munyengo yakusuzga iyi, lemba la Zintharika 3:6 lanovwira kuti nigomezgenge chomene Yehova. Lemba ili likuti: “Mu mendero ghako ghose maso ghako ghaŵe kwa iyo, Ndipo wakunyoloskerenge nthowa zako.” Ni Yehova pera uyo vinjeru vyake vilije mphaka. Para nasangana na suzgo, nasambira kuti niŵazgenge Baibolo kuti nimanyenge umo Yehova wakuwonera nkhani iyo. Pa suzgo lililose ilo nasanganapo nalo, Yehova wandanilekepo, nyengo zose wakunipwelelera.

Tikuwonga chomene Yehova chifukwa cha wovwiri na ulongozgi wake wachitemwa, ivyo vikutovwira kuti tifiske kuzizipizga suzgo lililose ilo tingasangana nalo.—Salimo 5:12.

Nyengo

March 20, 2021

Nyumba ya Skvortsovs yikasecheka
December 7, 2021

Nyumba ya Skvortsovs’ yikasecheka kachiŵiri pamoza na nyumba zinyake za Ŵakaboni ŵa Yehova 29 ku Taganrog. Iyo ŵakamusanga na mulandu ndipo pamanyuma wakaŵikika mu jele la awo ŵakulindilira kuti mulandu wawo weruzgike
December 8, 2021

Aleksandr wakajalirika mu jele la awo ŵakulindilira kuti mulandu wawo weruzgike
March 29, 2022

Valeriy ŵakamujulira mulandu
March 31, 2022

Awo ŵakafufuzanga ŵakasazga mulandu wa Aleksandr na Valeriy
May 18, 2022

Valeriy wakakika na kuŵikika mu jele la awo ŵakulindilira kuti mulandu wawo weruzgike
May 26, 2022

Valeriy wakaŵikika mu jele la awo ŵakulindilira kuti mulandu wawo weruzgike ku khoti
December 6, 2022

Mulandu ukamba kudumbika
June 20, 2023

Khoti likadumura kuti Aleksandr wakakhare vyaka 7 mujele. Kweniso likadumura kuti Valeriy waleke kusangikaso na mulandu kwa vyaka 6

a Panyengo iyo nkhani iyi yikalembekanga, mubali Skvortsov na Tibiy ŵakaŵa kuti ŵali mujele la awo ŵakulindilira kuti mulandu wawo weruzgike ndipo chikaŵa chakusuzga kuti tiyowoye nawo na kuŵafumbako vinyake.

Wonaniso

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI