Pa February 4, 2020, Khoti la Zheleznodorozhniy ilo lili mu msumba wa Khabarovsk, lizamweruzga mulandu wa Mubali Stanislav Kim na Mubali Nikolay Polevodov. Loya wa boma wakupempha khoti kuti ŵabali ŵaŵiri aŵa, ŵakajalirike ku jele vyaka vitatu. Ndipouli ŵabali aŵa ŵakuzgoraso mulandu ku khoti linyake mu msumba wenewuwu.

Mubali Kim na Mubali Polevodov ŵakakakika pa November 10, 2018. Pa zuŵa ili, ŵabali na ŵadumbu ŵa ku Khabarovsk ŵakawungana pa resitiranti yinyake kuti ŵapumure kweniso kusangwapo. Uwu ukaŵa ungano wa chisopa yayi. Ndipouli apo ŵabali aŵa ŵakamba kuwungana, kukiza ŵapolisi ŵanandi na ŵanthu ŵanyake ŵakufufuza vya milandu ŵakanjira mu resitiranti iyi na kukaka waliyose uyo wakaŵamo. Ŵapolisi aŵa ŵakajalira Mubali Kim, Mubali Polevodov na Mubali Vitaliy Zhuk mu jele kwa myezi yakujumpha yiŵiri. Ndipo pamanyuma ŵakaŵa pa jele la pa nyumba kwa myezi yinandi.

Mulandu uwo ŵeruzgenge pa February 4 ngwa Mubali Kim na Mubali Polevodov, ŵabali aŵa ŵali kuŵapa mulandu chifukwa chakuti nawo ŵakaŵapo pa ungano uwu. Ndipouli ŵalara ŵa boma ŵakupaso mulandu unyake Mubali Kim, Polevodov, na Zhuk, pamoza na ŵadumbu ŵatatu awo nawo ŵakaŵapo pa ungano uwu. Pa mulandu uwu Mubali Kim na Polevodov, ŵapika mulandu wakunozga ungano uwu. Zuŵa ilo khoti lizamweruzgira nkhani iyi, lichali lindamanyikwe.

Ntchakuzizika kuti Mubali Kim na Mubali Polevodov wose ŵali na mulandu mu makhoti ghaŵiri, panyengo yimoza. Awo ŵakufufuza vya milandu ŵakasankha kuti ŵeruzgike mu makhoti ghaŵiri ghakupambana, ntheura Mubali Kim na Mubali Polevodov ŵachichizgikenge kuluta ku makhoti ghaŵiri ghakupambana gha ku Khabarovsk.

Ŵabali wose ŵaŵiri mbakutora ndipo ŵali na ŵana ku nyumba kwawo. Tikumanya kuti Yehova walutilirenge kuŵapa mzimu utuŵa ŵabali aŵa na mbumba zawo kuti uvikilire mitima na maghanoghano ghawo. Mzimu uwu uŵawovwirengeso kuti ŵalutilire kugomezgeka apo ŵakuyezgeka.—Ŵafilipi 4:7.