1. Pa August 11, 2021, khoti la Abinskiy ilo lili ku chigaŵa cha Krasnodar, Russia, likati Mubali Vasiliy Meleshko wali na mulandu ndipo wakagwire jele vyaka vitatu. Vyose vyakukhwaskana na mulandu wake uwu vikachitika mazuŵa ghaŵiri pera. Mubali Meleshko ŵakamukaka na simbi mu khoti mwenemumo na kuluta nayo ku jele. Iyo ngwachinayi pa Ŵakaboni ŵa Yehova awo ŵakeruzgika mwaluŵiro chomene na kusangika na mulandu na khoti ili a

2. August 10, 2021

   Khoti likamba kutegherezga mulandu wa Vasiliy. Wati wafumbika na mweruzgi, mwachikanga Vasiliy wakajilongosora kuti iyo ni Kaboni wa Yehova

3. June 24, 2021

   Vinthu ivyo Vasiliy wakadumbiskananga na Mubali Aleksandr Ivshin ŵakavisazga pa vifukwa ivyo ŵakamupira mulandu. Uyo wakwimira boma pa milandu, wakati ŵakadumbiskananga vyachisopa vinthu vyakukhwaskana na “uteŵeti wa Yehova Chiuta”

4. April 12, 2021

   Vasiliy ŵakati wali na mulandu nga wa “kudumba na kutegherezga nkhani zakufuma mu mabuku gha chisopa” kweniso “kuchitako chidumbirano chakukhwaskana na mabuku ghachisopa”

5. April 7, 2021

   Nyengo ya 6:30 a.m., ŵanthu ŵatatu awo ŵakaŵa na futi, ŵanthu ŵanayi ŵakufufuza milandu, kweniso ŵanthu ŵanyake ŵaŵiri, ŵakasecha mwakuchichizga nyumba ya Vasiliy na Zoya Meleshko. Pamanyuma Vasiliy ŵakamutora kuti ŵakamufumbe mafumbo. Ŵanthu awo ŵakafufuzanga, ŵakamujambura Vasiliy panthazi pa nyumba yake kweniso pa nyumba iyo kale ŵabali na ŵadumbu ŵithu ŵakawunganangamo. Ŵakagwiliskira ntchito vithuzi ivi kuŵa ukaboni wakuti Vasiliy wakapalamura nadi mulandu. Vasiliy ŵakamuphalira kuti waleke kufumako ku chigaŵa icho wakakhalanga

Nangauli ni “nkhani yachitima” kuti mulandu uwu weruzgika mwaluŵiro chomene kweniso kuti ŵabali na ŵadumbu ŵithu ŵakulutilira kutambuzgika ku Russia, kweni tikugomezga kuti Vasiliy na banja lake ŵalutilirenge kuŵa ŵakukhora na kuleka kusunkhunyika chifukwa ‘ŵakuthemba Yehova.’—Salimo 112:7, 8.