Khoti la Zeya ilo lili ku Chigaŵa cha Amur lipelekenge chigamuro sonosono pa mulandu wa Mubali Vasiliy Reznichenko. * Wakwimira boma pa milandu wachali wandapemphe chilango icho wakwenera kupika.

Vasiliy Reznichenko

• Chaka cha kubabikira: 1942 (Murovka, ku Chigaŵa cha Primorye)

• Mbiri yake: Ndiyo ngwaumaliro mu nyumba yakwake iyo ŵalimo ŵana 5. Wakasambira kwendeska thirakitara ndipo kufuma apo wakasambira kwendeska sitima na umekaniki. Wakaŵapo msilikari. Wati wafuma ku usilikari, wakagwiranga ntchito ya kwendeska sitima, ndipo paumaliro wakakwezgeka udindo kufika pa kaputeni wa sitima. Boma la Soviet Union likamupa ntchindi izo zikuluta ku ŵanthu awo ŵagwira ntchito mwakugomezgeka kwa nyengo yitali

  Wakatorana na muwoli wake Valentina mu 1969. Ŵali na ŵana ŵatatu ŵanalume. Valentina wakamuphalira vya unenesko wa mu Baibolo cha m’ma 1990. Wati wamanya chifukwa icho Chiuta wakalengera charu, wakamba kusambira Baibolo ndipo wakalitemwanga chomene. Vasiliy wakabatizika na kuŵa Kaboni wa Yehova mu 1996. Muwoli wake wakafwa mu 2016

Pa March 21, 2019, ŵamazaza ŵa mu tawuni ya Zeya ŵakasecha nyumba ya Mubali Vasiliy Reznichenko. Ŵakamupoka laputopu, foni, na vinthu vinyake vyakukhumbikwa. Kufuma waka pa nyengo iyi, wali kuŵikika mu gulu la ŵanthu awo boma la Russia likuti “mbakofya” ndipo ŵali kumujalira ma akaunti ghake gha ku banki. Wakukanizgikaso kwenda kufuma mu chigaŵa icho wakukhala.

Vasiliy wakulutilira kuthemba Yehova kuti wamovwire. Mtima wake ukulutilira kuŵa m’malo chifukwa cha ndondomeko yiwemi iyo wali nayo yakuchitira vinthu vyauzimu, nga kuŵerenga Baibolo zuŵa lililose kweniso lemba la zuŵa. Iyo wakuwongaso chomene chitemwa icho ŵabali na ŵadumbu ŵakumulongora.

Iyo wakuti: “Pakati pajumpha zuŵa limoza kufuma apo ŵamazaza ŵakasechera mu nyumba mwane kweniso kunifumba mafumbo, ŵabali ŵa mu mpingo mwithu ŵakiza kuzakaniwona. Ŵanyake nawoso ŵakaŵa kuti ŵamazaza ŵasecha nyumba zawo. Pati pajumpha mazuŵa ghaŵiri, ŵabali ŵanandi ŵakufuma mu misumba yapafupi ŵakiza kuzakaniwona. Nkhamanya kuti nawoso ŵakaŵa pangozi yakuti ŵangakakika. Kweni ivyo ŵakachita pakwiza kuzakaniwona vikanikhozga chomene. Para nakumbuka ivyo ŵabali ŵakanichitira, nkhuthiska na masozi.” Iyo wakusazgiraposo kuti: “Ivyo vikachitika vikakhozga ubwezi wane na Yehova. Pasono nkhuwona kuti wali nane pafupi chomene.”

Vasiliy wakukhozgeka kweniso kusanga nkhongono na mazgu gha pa Ŵahebere 13:5. Iyo wakuti: “Nkhukhumba kulutilira kugomezga layizgo la Yehova lakuti: ‘Nikulekenge yayi napachoko nesi kukutaya munthowa yiliyose.’” Tikugomezga kuti Yehova walutilirenge kovwira ŵabali na ŵadumbu ŵithu awo ŵakutambuzgika chifukwa cha chipulikano chawo.