Pa February 9, 2024, Mubali Vilen Avanesov wali kufumiskika mu jele pati pajumpha vyaka 5 kufuma waka apo wakakakikira. Vilen wakakakika mu May 2019. Ndipo pa July 29, 2021, khoti likadumura kuti wakakhale mu jele kwa vyaka 6. Chifukwa chakuti wakakhala nyengo yitali mu jele, wakeneranga yayi kugwira jele kwa vyaka vyose ivyo ŵakamudumulira. Mwana wake, Arsen, nayo wakakakikira nayo lumoza. Kweni pasono Arsen wachali mu jele.

Apo Vilen wakaŵa wandafumiskike, muwoli wake, Stella Avanesov wakayowoya kuti: “Vyaka vyakwambilira viŵiri na hafu vikaŵa vyakusuzga chomene kwa ise apo Vilen wakaŵa mu jele. Nkhafipanga mtima chomene. Nakuti tikazomerezgekanga yayi kuyowoyeskana nayo nanga kungaŵa kulemba kalata. Apo mfumu wane kweniso mwana wane ŵakaŵa mu jele, nkhenjerwanga chomene umo ningasangira ndalama zakovwilira mbumba yithu panekha.”

Nangauli ŵakakumana na masuzgo, kweni Vilen na muwoli wake Stella nyengo zose ŵakawonanga kuti Yehova wakuŵapwelelera. Stella wakayowoyaso kuti: “Vilen wakaniphalira kuti nyengo yiliyose para wakuluta ku khoti kukadumba mulandu, wakasanganga kuti kuli ŵabali na ŵadumbu ŵanandi. Kwa iyo uwu ukaŵa ukaboni wakuti Yehova wakumupwelelera. Ndipo kwa ine nkhuwona kuti nyengo zose Yehova wakanipanga vyose vyakukhumbikwa. Nili na chigomezgo chose kuti Yehova wakuŵapa nadi wovwiri awo ŵakumugomezga.”

Ndise ŵakukondwa kuti Vilen na Stella pasono ŵaliso lumoza. Ndipo tilutilirenge kumulombera mwana wawo, Arsen kweniso ŵabali na ŵadumbu ŵithu wose awo ŵachali mu jele. Tili na chigomezgo chose kuti Yehova walutilirenge kuŵa ungweru, chiponosko na linga la awo ŵakumugomezga.—Salimo 27:1.