Khoti la Ussuriyskiy ilo lili ku Chigaŵa cha Primorye lipelekenge chigamuro chake sonosono apa pa mulandu wa Mubali Vitaliy Ilinykh. a

Vitaliy Ilinykh

• Chaka cha kubabikira: 1974 (ku Ussuriysk, Chigaŵa cha Primorye)

• Mbiri yake: Wakasambira sukulu ya vyaupolisi ndipo wakagwiranga ntchito mu dipatimenti yakufufuza ŵapolisi awo ŵaswa malango. Wakajifumbanga chifukwa icho ŵanthu ŵakufwira kweniso ivyo vikuchitika para munthu wafwa. Wakamba kusambira Baibolo na Ŵakaboni ŵa Yehova cha m’ma 1990. Wakabatizika mu 1999. Pasono wakugwira ntchito ya kutozga mu msewu. Wakatorana na muwoli wake Irina, mu 2006

Mu February 2019, ŵamazaza ŵakasecha nyumba ya Mubali Vitaliy Ilinykh ndipo ŵakajulira mulandu Ŵakaboni ŵanyake mu msumba wa Spassk-Dalniy. Pa September 18, 2019, ŵamazaza ŵa ku Russia ŵakamba kumufufuza mulandu Vitaliy. Pa October 23, 2019, ŵamazaza ŵakasecha kachiŵiri nyumba yake, ndipo pa ulendo uwu ŵakamukaka na kumujalira kwa mazuŵa ghaŵiri. Apo ŵakamujalira, Vitaliy wakalombanga kwa Yehova. Iyo wakuti: “Para nalomba, nkhalekanga kuŵa na wofi ndipo mtima ukaweleranga m’malo.”

Ŵakati ŵamufumiska, ŵakamukanizga kwenda kufuma mu chigaŵa icho wakakhalanga. Amama ŵake, Mudumbu Olga Opaleva, nawo ŵakuŵazenga mulandu unyake.

Vitaliy wasambira vinandi pa ivyo vyamuchitikira. Iyo wakuti: “Pakwamba, nkhamanyanga kale fundo yakuti Yehova wakuzomerezga yayi kuti tikumane na viyezgo ivyo tingatondeka kuzizipizga. Pasono, najiwonera nekha kuti fundo iyi njaunenesko nadi. Para vinthu vyatisuzga chomene pa umoyo withu, ndipo tikuŵaso pafupi chomene na Yehova. Yehova ni Muwuvi withu, ntheura para wazomerezga kuti nyengo zinyake nijumphe mu vinthu ivyo vili nga ni moto, ndikuti ngwakunozgeka kunovwira kuzizipizga m’paka paumaliro. Para nawona kuti ningafiska yayi kuzizipizga, mbwenu ndiyo ni nyengo yakuti nipemphe Yehova wanipe ‘nkhongono zakuluska zakawiro.’”—2 Ŵakorinte 4:7.

Vitaliy ngwachikanga yayi mwakawiro, kweni wakusanga nkhongono chifukwa cha kughanaghanirapo lemba la 1 Petrosi 5:9. Iyo wakukhozgekaso na chiyelezgero cha ŵabali na ŵadumbu ŵanandi ku Russia, awo ŵakulutilira kuzizipizga nangauli ŵakutambuzgika. Vitaliy wakuyowoya mwakusimikizga kuti: “Chilichose icho Yehova wangazomerezga kuti khoti lidumure, . . . ni mwaŵi ukuru chomene wakuchitira ukaboni ku ŵamazaza mu mazuŵa ghaumaliro agha.”

Nga ni Vitaliy, nase tikukhozgeka na viyelezgero vya ŵabali na ŵadumbu ŵanandi awo ŵakulongora kuti ŵali na chipulikano chakukhora kweniso chikanga. Nakuti tikulutilira kuwonga Yehova chifukwa cha kutipa ‘chinthu chiwemi chilichose kuti tichite khumbo lake.’—Ŵahebere 13:20, 21.