Khoti la Leninskiy ilo lili ku Novosibirsk, sonosono apa lipelekenge chigamuro pa mulandu wa Mubali Vitaliy Popov. a

Vitaliy Popov

• Chaka chakubabikira: 1967 (ku Novosibirsk)

• Mbiri yake: Wakagwiranga ntchito ya vya magesi na ya kuwotchelera visulo. Wakaŵapo msilikari mu nyengo ya Soviet. Wakutemwa kuseŵera mu chiwuvi, kutimba bola la malundi, volleyball, na kwimba. Mu nyumba yakwawo ŵakababikamo ŵana 5. Apo wakaŵa muwukirano, mukuru wake na mudumbu wake mulara ŵakafwa. Ivi vikapangiska Vitaliy, kuŵa na mafumbo ghanandi ghakukhwaskana na nyifwa kweniso ivyo vizamuchitika munthazi

  Wakasambira Baibolo na Ŵakaboni ŵa Yehova kukwambilira kwa chaka cha 1990. Wakakhorwa na mazgoro ghakulongosora chifukwa icho ŵanthu ŵakufwira. Wakakhwaskika chomene na chitemwa, ntchindi, kweniso umo Ŵakaboni ŵa Yehova ŵakovwilirana. Wakabatizika mu 1994. Wakatorana na Natalya mu 2011

Pa June 27, 2019, ŵamazaza ŵakati Vitaliy wali na mulandu. Pa April 9, 2020, ŵapolisi ŵakiza ku nyumba yake na kumutora kuti ŵakamufumbe mafumbo. Ŵakamufumba mafumbo kwa maora ghakujumpha ghanayi

Vitaliy wakamuŵika pa gulu la ŵanthu awo ŵakuchita vinthu vyakofya. Ivi vikapangiska kuti ma akaunti ghake gha ku banki ghajalike. Pati pajumpha myezi yiŵiri, Vitaliy ŵakamuchichizga kuleka ntchito yake iyo wakagwiranga. Ivi vyapangiska kuti mbumba yake yisoŵe pakukora.

Ndipouli Yehova wakulutilira kovwira mbumba ya mubali uyu. Vitaliy wakuti: “Wakutovwira kulutilira kuŵa paubwezi na iyo, wakutipa ivyo tikukhumbikwira mwakuthupi na kulutilira kutikhozga.’’ Vitaliy wakulutilizga kuyowoya kuti: “Mbumba yane yose yikuwonga chomene wovwiri wa Yehova, ndipo watovwira kuzizipizga masuzgo ghithu ghose na kulutilira kuŵa ŵakondwa.”

Vitaliy wakuyowoya ivyo vyamovwira chomene kuti wazizipizge masuzgo ghose agha. Iyo wakuti: “Kuchita vinthu vyauzimu mwakukhazikika kukanovwira chomene kuti niŵe paubwezi wakukhora na Yehova. Ngwanadi kwa ine. Nasambira kumugomezga chomene visuzge viti uli.” Vinthu vyauzimu ivyo Vitaliy wakuchita ni kusopa kwa mbumba, kuchita maungano na kuzgorapo, kupharazga nyengo zose kweniso lurombo. Iyo wakuti: “Viŵenge kuti nkhuchita vinthu ivi yayi, mphanyi vikunisuzga kugomezga Yehova na kuzizipizga vyose ivi.”

Apo tikulindilira ivyo khoti lidumurenge pa mulandu wa Vitaliy, tikulutilira kumulombera. Tikumanya kuti Yehova, ‘uyo wakupeleka nkhongono,’ walutilirenge kukhozga ŵabali na ŵadumbu ŵithu wose ku Russia awo ŵakuzizipizga mwachikanga.—Ŵafilipi 4:13.