Pa December 19, 2023, Mubali  Vladimir Balabkin wakafumiskika mu jele wati wagwira kwa myezi yakujumpha yitatu pera m’malo mwa vyaka 4. Iyo wakakakika pa September 13, 2023. Mubali Vladimir wakachita apilu ivyo khoti likadumura. Ŵeruzgi ŵatatu awo ŵakategherezga mulandu wake, ŵakasintha chilango icho wakapika. Ntheura ŵakachepeska chilango chake cha kukhala mu jele vyaka 4, m’malo mwake wakapika chilango chakuti waleke kusangikaso na mulandu kwa chaka chimoza.

Pa nyengo iyo ŵakategherezganga mulandu wake, Mubali Vladimir wakayowoya mwachikanga kuti: “Ivyo ine nkhugomezga vikujintha mu Mazgu gha Chiuta Baibolo. Baibolo lanovwira kuti niŵe na mikhaliro iyo Mlengi withu wakukhumba kuti munthu waliyose waŵe nayo nga kuzika, lusungu, kuzikira, kweniso kujikora. Ivi vyanovwira chomene ine na banja lane. Nkhukhumba kuti munthu waliyose waghamanye makora Mazgu gha Chiuta chifukwa ghangaŵawovwira kuti ŵasinthe na kuŵa ŵanthu ŵawemi.”

Tikukondwera lumoza na Mubali Vladimir kweniso banja lake apo tikulutilira kughanaghaniraso ŵabali ŵithu awo ŵachali mu jele ndipo tikugomezga Yehova wazamuŵatumbika chifukwa cha kuzizipizga kwawo.—Ŵahebere 10:34.