Khoti la Solombalskiy ku Arkhangelsk lipelekenge chigamuro chake sonosono apa pa mulandu wa Mubali Yevgeniy Yakku. a Nyengo zinyake wangapika chilango chakuti wakagwire jele vyaka 15.

Yevgeniy Yakku

• Chaka cha kubabikira: 1980 (mu Muzi wa Sosnovets, Republic of Karelia)

• Mbiri yake: Apo wakaŵa muchoko, wakakondwa chomene kuwona umo uchimi wa mu Baibolo ukafiskikira. Wakabatizika na kuŵa Kaboni wa Yehova mu 2006. Wakasamira ku Arkhangelsk kuti wakasambire sukulu yakusambizga vya bizinesi. Wakatorana na Irina mu 2007. Wose ŵakutemwa kutembeya na kuchezga kuwaro kwa nyumba yawo

Mulenji wa pa February 18, 2019, ŵamazaza ŵa boma la Russia ŵakasecha nyumba ya Mubali Yevgeniy Yakku na kumukaka chifukwa ŵakatenge nayo wakuchitako “vinthu vyakofya.” Ŵapolisi ŵakamutora Yevgeniy na kukamujalira mu selo. Ŵakamusunga kwa mazuŵa ghaŵiri. Ŵabwezi na ŵachibali ŵake ŵakaphalirika yayi uko wali.

Wati wafumiskika, Yevgeniy wakakanizgika kufumapo pa nyumba yake nausiku, kuchitiska ungano uliwose pa nyumba yake, kweniso kuyowoyeskana na ŵanyake awo ŵakakhwaskikanga na mulandu uwu kwali mphafoni, imelu panji intaneti. Pati pajumpha myezi 7, khoti likachepeskako ivyo wakakanizgika kuchita ndipo likamuzomerezga kufumapo pa nyumba yake namise.

Pa November 25, 2019, Yevgeniy wakapika mulandu wakuti wakulongozga milimo ya gulu lakuchita “vinthu vyakofya.” Kufuma apo, ŵakamupaso milandu yinyake yinandi. Para khoti lingadumura kuti wali na mulandu, mbwenu wangakakhala mu jele vyaka 15. Chifukwa cha milandu iyo ŵakumupa, Yevgeniy ŵali kumulekeska ntchito, kumujalira ma akaunti ghake gha ku banki, na kumupoka magalimoto ghake ghaŵiri.

Mu nyengo yakusuzga iyi, Yevgeniy na Irina ŵakulutilira kuthemba Yehova. Irina wakuti: “Para nkhuwona umo Yehova wakuzgolera malurombo ghane, kweniso umo wakumupwelelera mfumu wane Zhenya [Yevgeniy] na ine, nkhusoŵa na chakuyowoya.”

Mwachiyelezgero, Irina wakapempha Yehova kuti wamovwire mfumu wake kuŵa na mtende wa mu mtima kweniso kuti wakalongosore makora vigomezgo vyake para khoti likweruzga mulandu wake. Yevgeniy nayo wakapempha Yehova vinthu vyakuyana waka. Iyo wakuti: “Nyengo yiliyose para nkhuluta ku ofesi yakufufuza milandu panji kukategherezga mulandu wane ku khoti, nkhapemphanga Yehova kuti wanipe vinjeru.” Iyo wakuwona kuti Yehova wakazgora malurombo ghake. Yevgeniy wakuti: “Nkhayowoyanga ivyo nkheneranga nadi kuyowoya ndipo nkhayowoyanga vinandinandi yayi.” Iyo wakutiso: “Yehova wakulongora kuti wachali nane, ndipo wakuzgora malurombo ghane mu nthowa izo nkhuchita kuwona nekha na maso ghane. Pasono nkhuliwona chomene woko la Yehova kuluska kumasinda uku.”

Apo tikulindilira ivyo khoti lidumurenge, tikumanya kuti Yehova walutilirenge kumupa Yevgeniy chikanga mwakuti wajivikilire “mwakuzika ndiposo na ntchindi zikuru.”—1 Petrosi 3:15.