Pa December 16, 2020, * Khoti la Leninskiy ilo lili ku chigaŵa cha Novosibirsk lizamupeleka chigamuro chake pa mulandu wa Mubali Yuriy Savelyev. Wakwimira boma pa milandu wakupempha khoti kuti leruzge kuti Mubali Yuriy wakagwire jele vyaka 8. Aka kaŵenge kakwamba kuti khoti lipeleke vyaka vinandi nthena kwa yumoza wa ŵabali ŵithu, kufuma waka apo Khoti Likuru ku Russia likakanizgira mulimo withu mu 2017.

Yuriy Savelyev

• Chaka cha kubabikira: 1954 (Krokhalyovka, Chigaŵa cha Novosibirsk)

• Mbiri yake: Amama ŵake ŵakafwa wachali muchoko. Wakalereka na mudumbu wake. Wakagwiranga ntchito ya upulambara. Wakamba kunweka na vyakusopa muwoli wake wati wafwa. Wakawona kuti Baibolo lili na mazgoro ghakukhorweska gha mafumbo agho wakajifumbanga. Wakabatizika na kuŵa yumoza wa Ŵakaboni ŵa Yehova mu 1996

Pa November 8, 2018, ŵapolisi ŵakiza na kusecha mwakuchichizga mu nyumba yake na za Ŵakaboni ŵanyake 9 ku chigaŵa cha Novosibirsk. Ŵakamukaka Yuriy na kukamusunga mu jele.

Yuriy ŵakumupa mulandu wakuti wakunozga milimo ya Ŵakaboni ŵa Yehova mu msumba uwu. Ŵasazgirako nyengo yake yakumusungira mu jele maulendo 9, nangauli ŵamupempherapo kanandi waka kuti ŵamufumiske. Wakhala mu jele vyaka vyakujumpha viŵiri. Kufuma waka mu 2017 apo Khoti Likuru ku Russia likakanizgira milimo yithu, Mubali Dennis Christensen na Sergey Klimov ndiwo ŵakhala mu jele nyengo yitali kuluska mubali Savelyev.

Mu mazgu ghake ghaumaliro apo ŵakaŵa mu khoti pa chitatu, December 9, 2020, Yuriy wakaphalira mweruzgi mwachikanga kuti: “Mukuneruzga kuti ndine wakwananga chifukwa chakuti nili kupalamura mulandu yayi, kweni ntchifukwa chakuti ndine yumoza wa Ŵakaboni ŵa Yehova.

“Palije uyo nkhumulaŵiska na jiso liheni, ndipo kwa vyaka pafupifupi 67 vya umoyo wane nindapalamurepo mulandu uliwose. Nili kusankha kuleka kunjilirapo pa ndyali. Panji ningati waka, nkhuchitako yayi vyachiwawa vya mtundu uliwose.

“Chiuta wali kunipa udindo wakuti nichindikenge ŵanthu wose, kwambura kutolera kasangiro kawo, charu chawo, panji chisopa chawo.

“Mazgu gha Chiuta ghakutichiska kuti tichindikenge ŵamazaza. Chigaŵa chinyake cha Ŵaroma 13:1-3, chikuti: ‘Munthu waliyose wajilambikenge ku ŵamazaza, chifukwa palije wamazaza wambura kuzomerezgeka na Chiuta. Ŵamazaza awo ŵalipo ŵali mu malo ghawo mwakuzomerezgeka na Chiuta. Ntheura uyo wakulimbana na wamazaza, wakulimbana na ndondomeko ya Chiuta.’

“Nkhulimbana na ŵamazaza yayi, chifukwa nkhukhumba yayi kulimbana na Chiuta. Para wamunthu ukulimbana na Chiuta umaliro wake ni nyifwa. Ntchifukwa waka cha Ŵakaboni ŵa Yehova lekani nili kujulika ku maso, na kumanya vya Chiuta waunenesko yumoza pera na mwana wake, Yesu Khristu. Nkhuŵawonga chomene Ŵakaboni, ndipo nili kukhorwa kuti Malemba Ghatuŵa, Baibolo, ni buku lapadera chomene. Likutovwira chomene pa umoyo withu wose.”

Tikukhozgeka chomene kupulika kuti chipulikano cha Mubali Yuriy ntchakukhora, ndipo tikuwona kuti Yehova wamutumbika pakumovwira kuti walutilire kuŵa na mtende.—Yesaya 26:3.