Pa October 7, 2020, * Khoti la Mayskiy ilo lili ku Kabardino-Balkarian Republic, lizamupeleka chigamuro chake pa mulandu wa Mubali Yuriy Zalipayev. Khoti lingazakamweruzga kuti wakagwire jele vyaka viŵiri.

Yuriy Zalipayev

• Chaka cha kubabikira: 1962 (Samara)

• Mbiri yake: Wagwirapo ntchito ya kotchelera visulo kweniso ya kwendeska thiraki. Wakutemwa kulemba ma powemu na kutembeya

• Mu 1983 wakatorana na Natalia, uyo ŵakasambiranga kilasi limoza kumanyuma. Pati pajumpha vyaka 10, ŵakamba kusambira Baibolo lumoza. Ŵali na ŵana ŵatatu. Wose ŵakuteŵetera Yehova, pamoza na ŵachibali ŵawo ŵachoko waka

Pa August 20, 2016, ŵamazaza ŵanyake ŵakasecha Nyumba ya Ufumu ku Mayskiy ndipo ŵakaŵikiramo dala mabuku ghithu agho ngakukanizgika chifukwa boma likughawona kuti “ngakutalulira.” Nangauli ŵabali ŵakaŵa na vidiyo yakulongora ukaboni wakuti mabuku agha ŵakachita kuŵikiramo dala, khoti likati ŵaswa dango ndipo ŵalipire ndalama zakukwana madola 2,634 gha ku America. Pati pajumpha myezi yichoko waka, ŵakamba kumupa mulandu Mubali Zalipayev chifukwa cha nkhani yeneyiyi.

Uyo wakwimira boma pa milandu wakuti Mubali Zalipayev wakagaŵanga mabuku agho ngakukanizgika ndipo wakachiskanga Ŵakaboni ŵa Yehova ŵanyake kuti ŵachitirenge nkhaza ŵanthu ŵa visopa vinyake. Milandu yose iyi njakukanizgika na dango, ndipo yikuchemeka kuti “kuchiska ŵanthu kuti nawo ŵachiteko vinthu mwakutalulira” (Chigaŵa 1 cha Dango 280 la boma la Russia).

Mulandu uwu ukamba kweruzgika pa June 21, 2020. Apo ŵakategherezganga mulandu uwu, ŵakaboni ŵa uyo wakwimira boma pa milandu ŵakasuskananga ŵekhaŵekha ndipo ivi vikavumbura waka pakweru kuti ivyo ŵakuyowoya vilije ukaboni. Mwachiyelezgero, apo mulandu uwu ukalutiliranga, vikamanyikwa kuti ŵakaboni ŵanyake awo ŵakatenge ŵakamupulika Mubali Zalipayev wakuchiska ŵanthu kuti nawo ŵachiteko viwawa, ŵakaŵapo yayi pa ungano uwo ŵakuti mubali uyu wakayowoya ivi. Nakutiso ŵakaboni ŵanyakeso ŵa uyo wakwimira boma pa milandu ŵakayowoya pakweru kuti mabuku ghakukanizgika agho ghakasangika mu Nyumba ya Ufumu, ŵakachita kuŵikamo mbamazaza ŵanyake.

Apo Mubali Zalipayev wakulindilira kuti mulandu wake weruzgike, tikulomba kuti mphanyi iyo kweniso mbumba yake, ŵasanga nkhongono na mtende wa mu mtima na mazgu gha Davide ghakuti: “Yehova ni nkhongono zane na chiskango chane. Mtima wane ukuthemba iyo. Napokera wovwiri wake, ndipo mtima wane ukusekelera.”—Salimo 28:7.