Khoti la Chekhov ku Chigaŵa cha Moscow lipelekenge chigamuro chake sonosono apa pa mulandu wa Mubali Yuriy Krutyakov na muwoli wake Mudumbu Zinaida Krutyakova, pamoza na Mubali Vitaliy Nikiforov na Konstantin Zherebtsov. a

Yuriy Krutyakov

• Chaka cha kubabikira: 1952 (ku Nizhny Novgorod)

• Mbiri yake: Wakasambira vya uinjiniya. Wakagwirapo ntchito ya kulemba mapulani gha umo vinthu vikwenera kuwonekera kweniso ya kulaŵilira ŵanyake. Wakapenja ng’anamuro la umoyo kwa vyaka vinandi. Wakasanga mazgoro wati wamba kusambira Baibolo na Ŵakaboni ŵa Yehova. Wakabatizika mu 1998

  Wakatorana na muwoli wake Zinaida mu 2012. Wose ŵakutemwa kuphika na kutegherezga sumu

Zinaida Krutyakova

• Chaka cha kubabikira: 1958 (ku Nizhnedevitsk)

• Mbiri yake: Wakalera yekha mwana wake mwanakazi. Wakaŵa injiniya wa kupanga vinthu vyakupambanapambana. Pasono wali kupumura

  Wakakwenyeleranga chomene chifukwa cha vinthu vyambura urunji ivyo vikuchitika mu charu. Wakasanga mazgoro ghakukhorweska wati wamba kusambira Baibolo na Ŵakaboni ŵa Yehova. Wakabatizika mu 2003. Wakatengwa kwa Yuriy mu 2012

Vitaliy Nikiforov

• Chaka cha kubabikira: 1968 (ku Nevel, Chigaŵa cha Pskov)

• Mbiri yake: Apo wakaŵa muchoko, wakaŵa nkhwantha pa masamu ndipo wakatemwanga maseŵera ghakupambanapambana. Wakagwiranga ntchito ya kunozga vinthu ivyo vyanangika mu ndege za ŵasilikari ku Russia

  Wakamba kusambira Baibolo na Ŵakaboni ŵa Yehova mu 2005. Wakapumura usilikari mu 2007. Wakabatizika mu 2012

Konstantin Zherebtsov

• Chaka cha kubabikira: 1973 (ku Turkmenistan)

• Mbiri yake: Apo wakaŵa muchoko, wakatemwanga kunyamura maweti na ntchito yakukhwaskana na masitampu. Wakamalizga masambiro pa koleji yinyake ndipo wakagwiranga ntchito ya vya magesi. Kufuma mu 2003, wagwiranga ntchito pa kampani yinyake yakupanga nkhongono za magesi

  Wakatorana na Natalya mu 1994. Wose ŵakamba kusambira Baibolo na Ŵakaboni ŵa Yehova. Wakabatizika mu 2016

Pa September 30, 2019, Ofesi ya Kufufuza milandu ku chigaŵa cha Moscow, yikajulira milandu Mubali Vitaliy Nikiforov, Konstantin Zherebtsov, Yuriy Krutyakov na muwoli wake, Mudumbu Zinaida Krutyakova. Pati pajumpha mazuŵa ghaŵiri, ŵamazaza ŵakaluta kukasecha mu nyumba zawo.

Vitaliy, Konstantin, na Zinaida ŵakafumbika mafumbo kwa maora ghanandi ndipo pamanyuma ŵakaŵajalira kwa usiku umoza. Kufuma apo, ŵakaŵatuma pa jele la panyumba.

Pa March 5, 2020, Yuriy ŵakamujalira mu jele umo ŵakamba kumusunga. Kufika pasono, ŵamusamuskirapo mu majele ghatatu. Pasono ŵachali kumusunga mu jele mwenemumo.

Konstantin wakuti lurombo ndilo lwamovwira chomene pa nyengo yose iyi. Pa usiku uwo ŵakasechera nyumba zawo, iyo wakapempha Yehova kuti wamovwire kuti waleke kusuzgika maghanoghano. Iyo wakuti: “Chifukwa chakuti mtima ukaŵa m’malo kweniso tikaŵalongora ntchindi ŵamazaza, vikawovwira kuti ine na mbumba yane tichitire ukaboni, na kulongora kuti ŵanthu ŵa Chiuta mbamtende ndiposo ŵakupulikira malango.”

Konstantin wakulutizga kuti: “Para vinthu vyanifyenya, lemba la Zekariya 2:8 likanikhozganga na kunipa nkhongono. Likanikumbuskanga kuti Yehova wakunipwelelera ndipo wakuniwona kuti ndine wakuzirwa; iyo wakunisimikizgira kuti wanivikilirenge nga ni mboni ya jiso lake.”

Apo ŵabali ŵithu ŵatatu na mudumbu ŵakulutilira kumuthwikiska Yehova katundu wawo, tikugomezga kuti Yehova walutilirenge kuŵapa vyakukhumbikwira vyawo.—Salimo 55:22.