Khoti la Metallurgichesky ku Chelyabinsk lipelekenge chigamuro chake sonosono apa pa mulandu wa Mubali Vladimir Suvorov. a Uyo wakwimira boma pa milandu wachali wandapemphe chilango icho mubali uyu wangapika.

Vladimir Suvorov

• Chaka cha kubabikira: 1946 (Chelyabinsk)

• Mbiri yake: Wakalaŵiliranga mashini ghanyake kweniso wakachitanga seŵero. Wakaŵapo wachiŵiri kwa dayilekitara wa Soviet House of Culture. Wakutemwa kulemba sumu na kulizga gitara

  Wakatorana na Valentina mu 1973. Wakabatizika kuŵa Kaboni wa Yehova mu 1993. Ŵakaŵa na mwana zina lake Igor, uyo wakafwa na kansa mu 2014

Mubali Vladimir Suvorov wa vyaka 75, ŵakamba kumupa mulandu pa January 16, 2020, ku Chelyabinsk. Wakufufuza milandu ku Chigaŵa cha Chelyabinsk wakati Vladimir wali na mulandu wakovwirapo pa milimo ya chisopa, kusazgapo kwimba sumu za chisopa, kulomba, na kudumbiskana fundo za mu Baibolo.

Mu February 2020, ŵamazaza ŵakamba kumufumba mafumbo Vladimir na kumukanizga kwenda. Pa June 17, 2020, ŵakati wali na mulandu. Vladimir wakuti masuzgo agho ghakwiza chifukwa cha vinthu vyambura urunji ivi, ngamoza mwa masuzgo ghakofya chomene agho wasanganapo nagho pa umoyo wake. Kweni wakuti: “Chiuta withu Yehova, wandatilekepo tekha . . . Ubwezi withu na iyo ukulutilira kuŵa wakukhora. Ine na Valentina tajiwonera tekha woko lake. Wakutikhozga, kutipembuzga na kutipa nkhongono kwizira mwa ŵabali na ŵadumbu ŵithu.

Pa March 11, 2021, Valentina wa vyaka 73 ŵakati wali na mulandu ndipo wakapika chilango chakuti waleke kusangikaso na mulandu kwa vyaka viŵiri na hafu. Khoti ilo likeruzga nthena ndiloso likutegherezga mulandu wa Vladimir. Wose ŵakugomezga b kuti Yehova wachali nawo ndipo wakuŵawovwira.—Salimo 118:6.