Khoti la Birobidzhan ku Chigaŵa cha Jewish Autonomous lipelekenge sonosono chigamuro chake pa mulandu wa Mudumbu Anastasiya Guzeva. a

Anastasiya Guzeva

• Chaka cha kubabikira: 1979 (ku Birobidzhan)

• Mbiri yake: Wakalereka na amama ŵake, pamoza na ŵadumbu ŵake ŵaŵiri. Apo wakaŵa mwana wakatemwanga kuŵerenga, kuchita maseŵera, na kuvina. Apo wakaŵa na vyaka 10, wakasanga Baibolo ku nyumba ya abuya ŵake. Ivi vikamupangiska kuti wambe kusambira vya Chiuta. Kufuma apo, iyo na amama ŵake ŵakamba kusambira Baibolo na Ŵakaboni ŵa Yehova. Wose ŵakabatizika mu 1995. Wakatengwa kwa mfumu wake Konstantin, mu 2001

Ŵamazaza ŵa ku Russia ŵakasecha nyumba ya Anastasiya na Konstantin mu May 2018. Mu July 2019, ŵakati Konstantin wali na mulandu wa “kuchita vinthu vyakofya” ndipo mu February 2020 Anastasiya nayo wakapika mulandu wakuyana waka. Ŵamazaza ŵali kujulira milandu 19 Ŵakaboni ŵa Yehova 23 ku Chigaŵa cha Jewish Autonomous.

Mulandu uwo Anastasiya na Konstantin ŵakupika wakhwaska chomene umoyo wawo. Chifukwa chakuti ŵali kupika mulandu wa “kuchita vinthu vyakofya,” wose ŵali kuŵalekeska ntchito ku sukulu ya vya sumu uko ŵakagwiranga. Konstantin wakapika chilango chakuti wakhale vyaka viŵiri na hafu kwambura kusangikaso na mulandu mu February 2021.

Anastasiya wakulongosora ivyo vyamovwira kuti wazizipizge chiyezgo ichi, wakuti: “Ntchiwemi chomene kuti wamunthu uŵenge na maghanoghano ghakuti kunthazi ungazakatambuzgika, na kwamba kuyezgelera mu mtima umo ungazakachitira pa nyengo iyo. Mwachiyelezgero, para tikuŵerenga vyakukhwaskana na ivyo vikachitika pa zuŵa ilo Yesu wakakomekera, ntchakuwonekerathu kuti wakaghanaghanirapo kale ivyo wazamuchita pa nyengo iyi, . . . apo wazamuyowoya, apo wazamukhala chete, na ivyo wazamuyowoya para mphakuti wayowoyepo.”

Anastasiya wakuti pasono wakughawona mu nthowa yapadera mazgu gha pa Ŵaroma 8:38, 39. Iyo wakuti: “Mazgu gha pa lemba ili ghali na vinthu viŵiri ivyo vikunovwira kuŵa wakukondwa. Ŵanthu ŵaŵiri ŵakuzirwa chomene mu chilengiwa chose ŵakunitemwa, ndipo palije icho chinganipatura ku chitemwa chawo. Fundo iyi yikunovwira kuti nilutilire kuzizipizga na kuŵa wachikanga.”