Khoti la Birobidzhan ilo lili ku Chigaŵa cha Jewish Autonomous lipelekenge chigamuro chake sonosono apa pa mulandu wa Mudumbu Anna Lokhvitskaya. a Uyo wakwimira boma pa milandu wandapemphe chilango icho khoti likwenera kupeleka.

Anna Lokhvitskaya

• Chaka cha kubabikira: 1993 (Birobidzhan)

• Mbiri yake: Wakalereka na amama ŵake awo ŵakamusambizga kuti walondezgenge fundo za mu Baibolo. Wakabatizika mu 2012. Wakumanya ntchito ya kusona vyakuvwara. Wakatengwa kwa mfumu wake, Artur, mu 2018. Ŵakutemwa kuŵeja somba, kutembeya, na kuseŵera volleyball

Pa February 6, 2020, Anna wakaŵa yumoza mwa ŵadumbu 6 awo ŵamazaza ŵa Russia ku Birobidzhan ŵakatenge ŵali na mulandu wa ‘kuchita vinthu mwakutalulira.’ Ŵakaboni ŵa Yehova 19 ŵa ku chigaŵa ichi ŵakapika milandu, ndipo mfumu wa Anna, Artur, na anyinavyara a Irina, nawo ŵakaŵa mu gulu lakupika milandu.

Milandu iyo ŵali kupika yapangiska kuti umoyo uŵe wakusuzga chomene ku mbumba iyi. Ŵali kukanizgika kwenda, maakaunti yawo ya ku banki ŵali kuŵajalira, kweniso ŵakuchitako yayi vinthu vinyake. Ivi vyapangiska kuti kanandi waka Anna wasuzgikenge maghanoghano, ndipo nyengo zinyake wakukhumbikwira na wovwiri wa ku chipatala.

Iyo wakulongosora vinthu vinandi ivyo vyamovwira. Wakuti: “Sumu za mu broadcasting zikunovwira kuti nijipulikengeko makora. Vili nthena chifukwa zikunipangiska kuti mtima wane uŵe m’malo kweniso kuti niwonenge vinthu mwakwenelera. Maseŵera ghakukhozga thupi nagho ghakunovwira kuti nighanaghanenge vinthu viwemi.”

Anna wakuyowoyaso kuti iyo na mfumu wake Artur ŵakuyezgayezga kuŵika vyakukhumba vya ŵanji pakwamba. “Tili kujiŵikira chilato chakuti mwezi uliwose tipelekenge vyawanangwa ku ŵanji, nanga vingaŵa vichoko waka. Tikuyezgayezga kuti tighanaghanirenge ŵanji m’malo mwa kughanaghana waka vya masuzgo ghithu.”

Apo wakulindilira chigamuro chake, Anna wakuwona kuti uwu ni ‘mwaŵi wakuti walongolere kuti ngwakugomezgeka kwa Yehova kwizira mu vyakuchita vyake.’—Salimo 18:25.