Khoti la Birobidzhan ilo lili ku Chigaŵa cha Jewish Autonomous lipelekenge chigamuro chake sonosono apa pa mulandu wa Mudumbu Irina Lokhvitskaya. a Uyo wakwimira boma pa milandu wachali wandapemphe chilango icho mudumbu uyu wangapika.

Irina Lokhvitskaya

• Chaka cha kubabikira: 1962 (Izvestkovoye)

• Mbiri yake: Adada ŵake ŵakafwa apo wakaŵa na vyaka 6 pera. Apo wakaŵa muchoko wakatemwanga kuvina, kupanga madirama, kuluka, kuseŵera basketball, na volleyball

  Chigomezgo cha mu Baibolo chakuti ŵakufwa ŵazamuwuka, chikamufika pamtima chomene. Wakabatizika na kuŵa Kaboni wa Yehova mu 1993. Mfumu wake wakafwa pati pajumpha myezi 7 kufuma apo wakabatizikira, ivyo vikapangiska kuti walere yekha mwana wawo munyamata, Artur, uyo wakaŵa na vyaka 7 pa nyengo iyo

Pa February 6, 2020, Mudumbu Irina Lokhvitskaya wakaŵa mu gulu la ŵadumbu 6 awo ŵamazaza ŵa ku Russia ku Birobidzhan ŵakati ŵali na mulandu wakuchita ‘vinthu vyakofya.’ Ŵamazaza aŵa ŵakajulira milandu 19 Ŵakaboni ŵa Yehova 22 ŵa mu chigaŵa ichi, ndipo mwana wa Irina, Artur, na muwoli wake, Anna nawo ŵakaŵa mu gulu lakupika mulandu.

Khoti lakanizga ŵanthu, ŵamutolamakani, panji ŵachibali ŵa Irina kuti ŵalute kukategherezgako mulandu wake. Nangauli wakapempha kuti ŵanthu ŵazomerezgekenge kutegherezgako mulandu wake kweniso kuti mulandu uwu uwelere kwa wakwimira boma pa milandu, kweni ŵakamukanira.

Mulandu uwo ŵakumupa Mudumbu Irina, na ivyo ŵakumuchitira vyapangiska kuti wambe kusuzgika muthupi kweniso maghanoghano. Kweni ndondomeko yake yakuchitira vinthu vyauzimu yamovwira kuti walutilire kuzizipizga. Iyo wakuti: “Yehova wanovwira kuti nambe kuŵikapo mtima kuchita vinthu vyakuzirwa. Nkhuŵerenga waka Baibolo yayi, kweni nkhufufuza kuti nipulikiske ivyo naŵerenga.” Para wamba kwenjerwa chomene mwakuti m’paka ndondomeko yake yakuchitira vinthu vyauzimu yakhwaskika, Irina wakulomba kwa Yehova kuti wamovwire. Iyo wakuti: “Nkhwamba kulomba kufumira pasi pa mtima, ndipo nkhujiŵikira chilato chakuti nambireso kulondezga ndondomeko yane. Yehova wanovwira kuti nileke kujighanaghanira nekha, kweni kuti nighanaghanirengeso chomene ŵanji.”

Irina wakuŵika mtima pa awo ŵakukhumbikwira chomene wovwiri kweniso kukhozgeka kuluska iyo. Ŵanthu aŵa ni awo ŵakukhumba kumanya unenesko, kweniso ŵabali na ŵadumbu ŵake. Iyo wakuti: “Para ukughanaghanira ŵanji, ukuŵavya nyengo yakuti ujilengerenge lusungu panji kwenjerwa chomene.”

Mpingo nawoso wamovwira chomene Irina, chomenechomene ŵabali ŵalara. Iyo wakuti: “Nangauli nawo ŵakutambuzgika, kweni ŵakunikhozga chomene, ndipo ŵakuyezgayezga kusanga mazgu ghawemi ghakuti ŵanikhozge nagho. Nakuti nyengo zose mbakunozgeka kunovwira, pa chifukwa ichi nkhuŵawonga chomene.”

Apo Irina wakulutilira kuzizipizga chiyezgo ichi, nase tikugomezga kuti Yehova wamupenge vyose ivyo wakukhumbikwira kuti wazizipizge. Iyo wakuti: “Apo nkhaŵerenganga vyakukhwaskana na nthambuzgo, nkhajifumbanga ivyo ningazakachita para naneso nasangana na suzgo lakuyana waka. Kasi ningazakathemba Yehova? Pasono nkhumanya zgoro lake. Nakuti na wovwiri wake, nilutilirenge kumuthemba. Nga umo viliri na ŵateŵeti ŵake wose ŵakugomezgeka, niyimilirenge nganganga ndipo Yehova wanikorenge na woko lake lamalyero.”—Yesaya 41:10.