Pa February 12, 2021, Khoti la Birobidzhan ilo lili ku Chigaŵa cha Jewish Autonomous likapeleka chigamuro chake pa mulandu wa Mudumbu Larisa Artamonova. Nangauli wakatenge wapikenge chilango chakuti wakhale mu jele vyaka 6, kweni khoti likati walipire ndalama zakukwana madola 135 gha ku America.

Larisa Artamonova

• Chaka cha kubabikira: 1970 (Birobidzhan, Chigaŵa cha Jewish Autonomous)

• Mbiri yake: Adada ŵake ŵakakomeka apo wakaŵa na vyaka vitatu pera. Wagwirapo ntchito ya kuphika tuvyakurya tunyake mu mabekare, kuŵika vithuzi mu nyuzipepara, kweniso ntchito ya kusona malaya. Wakatengwa mu 1990. Wali na mwana yumoza munyamata, Yevgeniy, uyo wakulwara nthenda yinyake iyo mbanthu ŵachoko chomene awo ŵali nayo. Mudumbu uyu wali na nthenda yinyake iyo yikupangiska kuti chivikiliro cha mu thupi lake chiyambiskenge suzgo la mu malo umo viwangwa vikukumana. Kweni wakulutilira kukhala mwakukondwa nangauli wali na masuzgo mu thupi. Wakutemwa kwendeska njinga, kuthelereka mu maji ghakukhoma, kuseŵera mu chiwuvi, na kudinda vithuzi

  Mafumbo agho wakaŵa nagho ghakukhwaskana na vinthu vyambura urunji, chitima, na vinthu viheni ivyo vikuchitika ghakapangiska kuti wambe kusambira Baibolo na Ŵakaboni ŵa Yehova. Wakasanga mazgoro ghakukhorweska mu Malemba ndipo wakabatizika mu 1995

Pa September 25, 2019, ŵamazaza ŵa ku Russia ŵakamba kumupa mulandu Mudumbu Larisa Artamonova. Mwana wake nayo ŵakumupa mulandu unyake. Iwo mbamoza mwa Ŵakaboni ŵa Yehova 22 ŵa ku Chigaŵa cha Jewish Autonomous awo ŵakuŵapa mulandu wakuti ŵakuchitako milimo ya gulu ilo ‘likuchita vinthu mwakutalulira.’

Amama na adada ŵake ŵamusangapo ŵakuzizwa kuti Larisa wakatenge wapikenge chilango cha kukhala mu jele vyaka 6 chifukwa cha ivyo wakugomezga—apo munthu uyo wakakoma adada ŵake nayo wali kupika vyaka vyakuyana waka.

Nyengo yichoko waka pambere nthambuzgo yindambe ku Birobidzhan, Larisa na mwana wake wose ŵakasazgirako uteŵeti uwo ŵakamuchitiranga Yehova. Iyo wakuti: “Para ukutangwanika na kumuteŵetera Yehova na kukhozga ubwezi wako na iyo kweniso kovwira mbumba yako kuŵa yakukhora mwauzimu, vikovwira kuti muleke kuŵa na wofi.” Iyo wakulutizga kuyowoya kuti: “Satana wakuyezga kugwiliskira ntchito awo ŵakutitambuzga kuti tambe kuŵa na maghanoghano ghakuti milimo yithu Yachikhristu yingatipangiska kuleka kuŵa ŵanangwa. Kweni Yehova wakutisimikizgira kuti tikuŵa na wanangwa wenecho para tikuchita ivyo wakutiphalira kuti tichitenge.”

Ŵabali na ŵadumbu 22 ŵa ku Birobidzhan awo ŵakuti ŵali na milandu, ŵakugomezga kuti Yehova wakukondwa para wakuwona kugomezgeka kwawo ndipo ŵakulongolerathu pakweru kuti ivyo Satana wakuyowoya mbutesi.—Zintharika 27:11.