Khoti la Leninskiy ku Rostov-on-Don lipelekenge sonosono chigamuro chake pa mulandu wa Mudumbu Lyudmila Ponomarenko. a

Lyudmila Ponomarenko

• Chaka cha kubabikira: 1950 (ku Ola, Chigaŵa cha Magadan)

• Mbiri yake: Pambere wandapumure wakagwiranga ntchito ya vya magesi pa fakitale yinyake. Wali na ŵana ŵanakazi ŵaŵiri na ŵazukuru ŵaŵiri. Wakutemwa kuŵerenga na kuluka vinthu. Wakupwelelera mfumu wake uyo wakulwara matenda ghakuru

• Wakakondwa chomene wati wamanya zina leneko la Mlengi. Wakakhorwa wakati wamanya khumbo la Chiuta pa kulenga charu chapasi kweniso ŵanthu. Wakabatizika na kuŵa Kaboni wa Yehova mu 1998

Pa June 6, 2019, ŵamazaza ŵakamba kumupa mulandu Mudumbu Lyudmila Ponomarenko. Ŵakuti wali na mulandu chifukwa cha kupeleka malo gha kuchitira maungano ku gulu ilo likuchita “vinthu vyakofya” kweniso chifukwa cha kuphalirako ŵanyake uthenga wa mu Baibolo.

Lyudmila wakamanyanga kuti nayo wangatambuzgika nga umo viliri na ŵabali na ŵadumbu ŵanyake ku Russia. Iyo wakulongosora kuti: “Apo ŵakambanga kutambuzga ŵabali ŵa ku Moscow na ŵa mu msumba wa Taganrog, nkhamanya kuti nyengo yiliyose nthambuzgo iyi yikhwaskenge waliyose.”

Ŵabali na ŵadumbu ŵakulutako yayi kukategherezga mulandu wake na kumukhozga chifukwa cha malango agho ghali kuŵikika chifukwa cha muliri COVID-19. Pakuyowoya umo vinthu viliri, Lyudmila wakuti: “Nkhafipanga mtima kuti namuŵanga nekha ku khoti pakutegherezga mulandu wane, ntheura nyengo zose para nili mu nthowa kuluta ku khoti nkhimbanga mwapasipasi sumu za Ufumu na kulomba kwa Yehova. Nkhasanga kuti para nachita nthena nkhakhozgekanga chomene. Nkhuchita wofi yayi para mulandu wane ukweruzgika, ndipo nkhuwona kuti nyengo yikwenda mwaluŵiro chomene.”

Lyudmila wakulongosoraso umo ivi vyakhwaskira mfumu wake na ŵana ŵake ŵaŵiri, awo Mbakaboni ŵa Yehova yayi. Iyo wakuti: “Ŵakupulikiska yayi chifukwa icho ŵakunipira mulandu wanthena uwu. Ŵakufipa mtima chomene chifukwa ŵakuwona kuti umoyo wane uli makora yayi chifukwa cha mulandu uwu. Kweni mu kuluta kwa nyengo, ŵamumbumba mwane ŵakuwamo kuti ŵakunichitira vinthu vyambura urunji, ndipo ivyo ŵakunichitira vikovwira kuti nizizipizge.”

Nangauli mudumbu uyu wakutambuzgika, kweni wakuwelera nyuma yayi. Iyo wakuti: “Mtima wane ngwakukondwa chifukwa nkhuwona kuti palije chifukwa chakuti niwoperenge ivyo vikuchitika panji ivyo vichitikenge munthazi kuyana na mauchimi agho ghali mu Baibolo. Ubwezi wane na Yehova ukulutilira kuŵa wakukhora. Pasono malurombo ghane ghakupulikikwa makora, ngatali kweniso ghakufumira pasi pa mtima.”

Tikumanya kuti Mudumbu Ponomarenko walutilirenge kupokera mzimu utuŵa kufuma kwa Yehova kweniso vitumbiko chifukwa cha kuŵa “mu mfwiri wa Wankhongonozose.”—Salimo 91:1.