JANUARY 31, 2022
RUSSIA

Mudumbu Lyudmila Salikova Wakusanga Nkhongono Kweniso Kupembuzgika na Yehova

JULANI

Pa January 20, 2022, Khoti la Snezhinsk ilo lili ku Chigaŵa Chelyabinsk likati Mudumbu Lyudmila Salikova wali na mulandu ndipo waleke kusangikaso na mulandu kwa vyaka 6. Ulendo uwu ŵamujalirenge mu jele yayi.

Nyengo

November 2020

Ŵamazaza ŵakasecha nyumba zinayi za Ŵakaboni ŵa Yehova ku Snezhinsk, kusazgapo nyumba ya Lyudmila. Ŵamazaza aŵa ŵakaluta kukasechaso ku malo agho wakagwiranga ntchito. Ivi vikapangiska kuti walekeskeke ntchito
August 26, 2021

Ŵamazaza ŵakamujulira mulandu Lyudmila wakuti wakalongozganga vyakuchitika vya gulu la chisopa ilo ndakukanizgika kweniso kupokelera mabuku ghakukanizgika
December 8, 2021

Khoti likamba kutegherezga mulandu wake

Vyakukhwaskana na munthu uyu

Lyudmila Salikova

Chaka cha kubabikira: 1951 (Snezhinsk)

Mbiri yake: Wakatengwa mu 1971. Wali na ŵana ŵanalume ŵatatu. Mfumu wake wakafwa mu 2009. Wakaŵa injiniya wa nkhongono ya magesi mu msumba wa Snezhinsk. Wakutemwa kwenda malo ghakupambanapambana

Mukuru wake wakamba kusambira Baibolo mu 1999. Pamanyuma pa myezi 6, Lyudmila nayo wakamba kusambira Baibolo lumoza na mukuru wake. Wakakhorwa chomene kumanya chifukwa icho tiliri na umoyo, chifukwa icho kukuchitikira vinthu vyambura urunji, nkhaza na nkhondo. Wakabatizika mu 2002

Ivyo Wakayowoya

Kasi ubwezi winu na Yehova wakhora wuli mu nyengo yakusuzga iyi?

Pambere ivi vindachitike, nkhajikayikiranga ndipo nkhawonanga kuti Yehova walije nane ntchito . . . Pasono kaghanaghaniro kane kasintha, ndipo chaniŵira chipusu kumanya kuti ghakaŵa maghanoghano ghakubudika. Kweniso para nkhuwona mwaŵi uwo wanipa wakuti novwirepo pa kutuŵiska zina lake panthazi pa khoti kuno ku Snezhinsk, nkhuwamo kuti Yehova wakunitemwa kweniso kunigomezga. Nkhuwona kuti chilichose icho Yehova wangazomerezga kuti chinichitikire ni mwaŵi wakulongolera kuti ndine wakugomezgeka kwa iyo

Kasi mubali panji mudumbu wali kumuphaliranipo mazgu wuli agho ghakamovwirani kuzizipizga?

Pambere khoti lindategherezge kakwamba mulandu wane, nkhenjerwanga chomene . . . ntheura nkhalomba kuti: “. . . Chonde novwirani na mzimu winu utuŵa. Nkhulomba chonde, a Yehova!” Pati pajumpha kanyengo kachoko waka, nkhapokera meseji kufuma kwa mudumbu munyake. Yikatenge: “. . . Vinthu ivyo vikuyezga chipulikano chithu vili nga ni mashini ghakuchapira vyakuvwara. Ntheura tingati viyezgo ivi ‘vikutichapa, kutisukuruzga, ndipo paumaliro vikutikama’. Kweni wamanya ivyo vikuchitika paumaliro chomene, tikufumamo kuti ndise ŵakutowa na ŵawemi kuluska umo tikaŵira pakwamba pambere tindasangane na viyezgo! Mwakuyana waka, kusecha nyumba yako, kukufumba mafumbo, na kukufufuza mulandu, vyose ivi vyaŵa nga kuti ‘vyakuchapa na kukusukuluzga makora’ ndipo watowa. Chikuru chomene ntchakuti, vyose ivyo wajumphamo vyapangiska kuti uŵe wakuzirwa chomene mu maso gha Yehova kweniso mu maso ghithu . . . Tili na chigomezgo chose kuti machero para waluta ku khoti, wamuŵa wekha yayi kweni wamuŵa kuti uli mu mawoko ghankhongono gha Yehova.” Apa nkhawona kuti Yehova wakamanya makora umo nkhajipulikiranga ndipo wakagwiliskira ntchito mudumbu wakutemweka uyu kuti waniphalire umo wakuniwonera.

Ŵabali na ŵadumbu ŵithu ku Russia ŵakulutilira kusanga nkhongono na kupembuzgika na Yehova. Chiuta withu wachitemwa wakutisimikizgira kuti wachitirenge “urunji mwana mulanda na ŵakuyuzgika, mwakuti munthu wa pa charu chapasi waleke kuŵawofyaso.”—Salimo 10:18.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI