Khoti la Birobidzhan ilo lili ku Chigaŵa cha Jewish Autonomous sonosono apa lipelekenge chigamuro pa mulandu wa Mudumbu Nataliya Kriger. a Wakwimira boma pa milandu wandapemphe chilango icho khoti lingamupa mudumbu uyu.

Nataliya Kriger

• Chaka cha kubabikira: 1978 (ku Khabarovsk)

• Mbiri yake: Amama ŵake ŵakafwa apo wakaŵa wachali bonda. Wakakhalanga uko ŵakulelerako ŵana ŵalanda. Apo wakaŵa na vyaka 6, wakasamukira ku Amurzet, mtunda wa makilomita 400 ku Russia kwenekuko. Uku wakakhalanga na agogo ŵake, ankhazi ŵake, na muvyara wake awo ŵakaŵa Ŵakaboni ŵa Yehova. Wakagwiranga ntchito ku malo ghakupwelelerako ŵachekuru

• Wakabatizika na kuŵa Kaboni wa Yehova mu 1999. Wakatorana na Valeriy mu 2017. Iwo ŵakutemwa kuvina, kuseŵera mu maji, na kutembeya

Mu May 2018 ŵalara ŵa boma ku Russia ŵakakasecha ku nyumba ya Mudumbu Kriger. Kusecha uku ŵalara ŵa boma ŵakakuchema kuti “Judgment Day.” Pamanyuma pa kusecha uku, wakwimira boma pa milandu wakati mfumu wa Mudumbu Kriger, zina lake Valeriy ŵamusanga na mulandu. Ndipo pa February 6, 2020, ŵalara ŵa boma ŵakati Mudumbu Nataliya nayo ŵamusanga na mulandu. Mudumbu Nataliya wakaŵa mu gulu la ŵadumbu 6 awo ŵakati ŵali na mulandu pa zuŵa ili.

Padera pa kutambuzgika, Mudumbu Nataliya wachali na chitima na nyifwa ya agogo ŵake awo ŵali kutayika mu February 2020. Iyo wapwelelera agogo ŵake aŵa kwa vyaka 6.

Chifukwa chakuti Mudumbu Nataliya wali paubwezi wakukhora na Yehova, vikumovwira kuti wazizipizge viyezgo ivi. Iyo wakati: “Kulombera ŵanyane kukunovwira kuti nileke kuŵika chomene maghanoghano pa masuzgo ghane. Pa nyengo iyi nkhuwona kuti Yehova wali nane pafupi chomene kweniso ngwanadi kwa ine.”

Mudumbu Nataliya kanandi wakughanaghanira vifukwa ivyo wakwenera kugomezgera kuti Yehova walutilirenge kumovwira. Iyo wakati: “Lemba la Salimo 94:19 likunikhozga chomene, ndipo lemba ili likuti: ‘Imwe mukunisanguluska na kunizikiska mtima.’ Pali ŵateŵeti ŵanandi ŵa Chiuta ŵa mu nyengo yakale kweniso mazuŵa ghano awo ŵakazizipizga viyezgo. Para nkhughanaghanira viyelezgero ivi, nkhusanga nkhongono za kuzizipizgira.”