Khoti la Birobidzhan ilo lili ku Chigaŵa cha Jewish Autonomous lipelekenge chigamuro chake sonosono apa pa mulandu wa Mudumbu Tatyana Zagulina. a Wakwimira boma pa milandu wachali wandapemphe chilango icho mudumbu uyu wangapika.

Tatyana Zagulina

• Chaka cha kubabikira: 1984 (M’muzi wa Selektsionnaya, ku Chigaŵa cha Trans-Baikal)

• Mbiri yake: Wakasambira vya masitayelo ghakupambanapambana gha vyakuvwara. Wagwirapo ntchito ya kupenta njoŵe ŵanthu kweniso kusona malaya, ndipo chomene wakasonanga madiresi gha pa ukwati. Wakutemwa kuseŵera volleyball na table tennis, kuvina, kweniso kuluka vinthu

  Wakamba ni kale kutemwa chilengiwa ndipo wakugomezga kuti umoyo ukachita kulengeka. Ivi vikapangiska kuti wambe kusambira Baibolo na Ŵakaboni ŵa Yehova. Wakabatizika mu 2010. Wakatengwa kwa Dmitriy mu 2012

Pa May 17, 2018, ŵamazaza 150 ŵakasecha nyumba 22 za Ŵakaboni ŵa Yehova. Kusecha uku ŵamazaza ŵakakuchema kuti “Judgment Day.” Kufika pasono, ofesi ya wakufufuza milandu, yajulira milandu ŵabali na ŵadumbu ŵithu 22 ŵa mu chigaŵa ichi. Pa February 6, 2020, ŵadumbu ŵithu 6, ŵakati ŵali na mulandu wa ‘kuchita vinthu vyakofya’ ndipo Mudumbu Tatyana nayo njumoza wawo.

Mulandu wa Mudumbu Tatyana ŵakamba kuwutegherezga pa September 17, 2020. Apo wakulindilira ivyo khoti lidumurenge, ŵamazaza ŵali kumukanizga kwenda kufuma mu chigaŵa chake ndipo ŵali kujara ma akaunti ghake gha ku banki.

Tatyana wakuti lurombo kweniso kuchita vinthu vyauzimu, vikumovwira kuti walutilire kuzizipizga na kulutilira kupharazga kweniso kuvikilira chipulikano chake. Iyo wakuti: “Apo [ŵamazaza] ŵakizanga, pakwamba nkhachita wofi na ivyo ŵakachitanga pa kukhung’uska chomene pa chijaro, kweni nyengo yeneyiyo nkhalomba. Nkhati nachita nthena, mtima ukamba kuŵa m’malo.”

Mwachiyelezgero, apo ŵakasechanga nyumba yake, iyo wakaphalira yumoza wawo kuti chipulikano chake chakhora chomene pa zuŵa ilo. Wakati wamufumba kuti chifukwa wuli wakuyowoya nthena, mudumbu uyu wakati wakuwona kuti wakufiska mazgu gha Yesu agho ghali pa Yohane 15:20, apo wakati: “Muzga ni mukuru chara kuluska fumu yake. Usange ŵakanitambuzga ine, ŵatambuzgenge na imwe wuwo.” Iyo wakulutizga kuti: “Yumoza wa ŵamazaza aŵa wakazgora kuti, ‘Oh, ivyo ukuyowoya apa, vikunipangiska kujiwona nga kuti nane ndine yumoza mwa awo ŵakakoma Yesu.’ Pa nyengo iyi chipulikano chane chikakhozgeka, kweniso nkhaŵa na mtende wa mu mtima ndiposo wachimwemwe. Nkhawonanga kuti Yehova wali nane pafupi!” Apo ŵakambanga kutegherezga mulandu wake, tuwofi tukaŵamo pachoko waka. Kweni wakati walomba kuti waŵe na chikanga, iyo wakuti, “Pasono nkhuyowoya mwambura wofi.”

Tikuwonga Yehova chifukwa cha kovwira kweniso kutumbika “mulimo wa chipulikano, mulimo wachitemwa, na kuzizipizga” kwa ŵabali na ŵadumbu ŵithu ku Russia.—1 Ŵatesalonika 1:2, 3.