Khoti la Nadezhdinskiy ilo lili ku Chigaŵa cha Primorye, sonosono apa lipelekenge chigamuro chake pa mulandu wa Mudumbu Lyudmila Shut. a Uyo wakwimira boma pa milandu wapempha kuti mudumbu uyu waleke kusangikaso na mulandu kwa vyaka vinayi.

Lyudmila Shut

• Chaka cha kubabikira: 1947 (ku Makarov, pa Chilwa cha Sakhalin)

• Mbiri yake: Wakamba kusambira Baibolo na Ŵakaboni ŵa Yehova mu 2000. Wakakhwaskika chomene na uchimi wa mu Baibolo. Wakabatizika mu 2003. Mfumu wake wakafwa mu chaka chenechichi. Wali na ŵana ŵatatu na ŵazukuru ŵatatu. Wangenda yayi yekha kwambura wovwiri chifukwa wakulwara chomene

Ŵamazaza ŵakamba kufufuza Ŵakaboni ŵa Yehova mu muzi wa Razdolnoye mu November 2017. Mu February 2020, ŵamazaza ŵakati Mudumbu Lyudmila Shut wali na mulandu. Nangauli mudumbu uyu ni muchekuru kweniso wakulwaralwara, kweni ŵamazaza ŵakamukanizga kufuma mu chigaŵa icho wakukhala.

Mulandu uwo ŵamazaza ŵakumupa ukupangiska kuti Mudumbu Lyudmila suzgo lake la ulwari lilute munthazi kweniso wasuzgikenge maghanoghano. Pasono wakuwona makora yayi mwakuti maso ghake ghakukhumbikwira opareshoni, ndiposo wali na suzgo lakutondeka kugona. Lyudmila wakuti kuthemba Yehova na kumugomezga ndivyo vyamovwira chomene. Nga umo wakulayizgira pa Yesaya 26:3, Yehova wakupeleka “mtende wambura kumara” kwa mudumbu withu.

Ŵabali na ŵadumbu mu mpingo ŵakumulongora chitemwa kweniso ŵakumovwira chomene Mudumbu Lyudmila. Wakuwonga chomene ŵabali na ŵadumbu chifukwa cha kumulombera. Lyudmila wakuti: “Nizamuluwapo yayi ivyo ŵabali na ŵadumbu ŵakunichitira.”

Nangauli mwana wake munyamata na msungwana Mbakaboni ŵa Yehova yayi, kweni ŵakumovwira chomene panyengo yakusuzga iyi.

Apo tikulindilira ivyo khoti lidumurenge, tikulomba Yehova kuti wamovwire Mudumbu Shut, ndipo tikugomezga kuti walutilirenge ‘kugomezga nkhongono za Chiuta.’—2 Timote 1:8.