Khoti la Gornomariyskiy ku Republic of Mari El lipelekenge sonosono a chigamuro chake pa mulandu wa Mudumbu Yekaterina Pegasheva.

Yekaterina Pegasheva

• Chaka cha kubabikira: 1989 (ku Gaintsy, Chigaŵa cha Kirov)

• Mbiri yake: Walimo yekha mu nyumba yakwawo. Wakutemwa kuŵerenga mabuku, kulemba mapowemu, na kwimba sumu. Wakugwira ntchito ya kupwelelera mu nyumba. Wakasambira Chimari kuti wasazgireko uteŵeti wake

Pa October 3, 2019, Mudumbu Pegasheva wakakakika ku Yoshkar-Ola, msumba ukuru wa Republic of Mari El. Ŵamazaza ŵakasecha nyumba yake na kupoka vinthu nga ni mabuku, foni, makalata ghake, na vinthu vinyake vyakukhumbikwa. Ŵamazaza ŵakati Yekaterina wali na mulandu wa kuchitako milimo ya gulu la kukanizgika chifukwa wakadumbiskananga na Ŵakaboni ŵanyake fundo za mu Baibolo.

Yekaterina wakuti: “Nkhazizwa waka kuwona ŵamazaza ŵakuniwukira pa msewu na kuninyekezga ku khuni uku mawoko ghane ghali ku msana. Nyengo yeneyiyo nkhalomba lurombo lufupi nga umo wakachitira Nehemiya, kuti Yehova wanovwire.” Ŵakati ŵamukaka, wakakhala mazuŵa ghakujumpha 100 mu jele umo ŵakamusunganga. Pasono wali pa jele la panyumba.

Yekaterina wakafumbika mafumbo kanandinandi waka apo wakaŵa mu jele umo ŵakamusunganga. Iyo wakati ivyo wakasambira mu Baibolo vikamovwira chomene. Iyo wakulongosora kuti: “Nkhakumbukanga nkhani na vyakuchita ivyo nkhapikanga apo nkhaŵa ku Sukulu ya Ŵapharazgi ŵa Ufumu. Nakuti nkhakhozgeka chomene na mazgu agha: Para mukuzgora mafumbo agho ŵalwani ŵinu ŵakumufumbani, mukuŵa kuti mwimilira panthazi pa Fumu Yesu. Ivi vikanovwira kuti nijikore, na kulongora ntchindi kwa ŵamazaza awo ŵakanipusikizgiranga mulandu.”

Yekaterina wasungika mu jele kweniso kukhala pa jele la panyumba kwa nyengo yakujumpha chaka sono. Ivi vyakhwaska chomene umoyo wake ndipo wangasangaso yayi ntchito kuti wasange vyakukhumbikwa pa umoyo. Nakuti chakusuzga chomene kwa iyo ntchakuti wali kutalikirana na amama ŵake kweniso abuya ŵake. Nangauli wakukumana na viyezgo vyose ivi, kweni Yekaterina waŵikapo mtima kuti walutilire kugomezgeka kwa Yehova. Iyo wakuti: “Para iwo ŵakunitambuzga chomene, ndipo nane nkhuŵikapo mtima chomene kuvwara vyankhondo vyose vyakufuma kwa Chiuta. Iyo wakutiso: “Pasono nkhuchita wofi na chilichose yayi! Nkhaŵa na chikanga, kweni pasono na wovwiri wa mzimu utuŵa wa Chiuta ndipo nili na chikanga chomene.”

Apo Yekaterina wakulindilira ivyo khoti lidumurenge, tikumanya kuti walutilirenge kuthemba Yehova, uyo wakupeleka nkhongono ku ŵateŵeti ŵake wose.—Ekisodo 15:2.