Pa September 29, 2020, * Khoti la Pervorechensky, ilo lili ku chigaŵa cha Vladivostok lizamweruzga mulandu wa Mudumbu Yelena Barmakina. Ŵangamweruzga kuti waleke kusangikaso na mulandu unyake kwa vyaka vitatu. Apo Mudumbu Barmakina wakulindilira chigamuro pa mulandu wake, khoti linyake lichali kupulikizga mulandu wa mfumu wake Dmitriy.

Yelena Barmakina

• Chaka cha kubabikira: 1967 (Cherepanovo, Chigaŵa cha Novosibirsk)

• Mbiri yake: Ndiyo wakovwira na kupwelelera ŵapapi ŵake kweniso abuya ŵake. Iyo ni nkhwantha pa nkhani yakujambura vithuzi. Wakutemwa kushuwa na kutembeya

• Apo wakambanga kusambira Baibolo na Ŵakaboni ŵa Yehova, wakasambira umo mauchimi gha mu Baibolo ghakafiskikira, ivi vikamukhorweska kuti Chiuta ngwankhongono chomene. Chipulikano chake chikakura chomene pakuwona umo Yehova wakazgoleranga malurombo ghake. Mu 2003, wakatorana na Dmitriy

Pa July 28, 2018, nyengo ya 7 koloko mulenji, ŵapolisi awo ŵakanyamura futi na kuvwara vinthu kumaso ŵakanjira mu nyumba ya abuya ŵa Mudumbu Yelena Barmakina awo ŵali na vyaka 90. Mudumbu Barmakina na mfumu wake Dmitriy, ŵakaŵa kwenekuku chifukwa ŵakaŵapweleleranga. Ŵapolisi ŵakamukaka Mubali Barmakin na kuluta nayo ku jele kulindilira kuti mulandu wake weruzgike. Ŵapolisi ŵakamuwofya Mudumbu Barmakina na kumuphalira kuti, “Machero ndiwe!”

Pakati pajumpha chaka chimoza, ŵamazaza ŵakajara maakaunti gha ku banki gha Mudumbu Barmakina kuti waleke kutorako ndalama. Pa August 6, 2019, munthu munyake wakufufuza vya milandu wakamba kumupa mulandu Mudumbu Barmakina. Ŵakati wali na mulandu chifukwa cha kulomba, kuŵazga Baibolo, na kuwonelera nkhani za mu Baibolo. Loya wa mudumbu uyu wakati khoti limazge milandu yake chifukwa ivyo wakachitanga ni mulandu yayi, kweni ni nkhani ya kusopa. Ndipouli, mweruzgi wakakolerana na wakwimira boma pa milandu ndipo wakati ivyo Mudumbu Barmakina wakachita vikulongora kuti “wakuchita vinthu mwakutalulira,” ndipo vikususkana na malango gha boma la Russia.

Mudumbu Barmakina wakusuzgika chomene maghanoghano chifukwa cha milandu yose iyi. Wakamuwona yayi mfumu wake kwa mazuŵa 447 apo mfumu wake wakaŵa mu selo kulindilira zuŵa la mulandu wake. Nyengo zinyake chingaŵaso chakusuzga kuti Mudumbu Barmakina wasange ntchito chifukwa wakhumbikwirenge kuti wakawonekere ku khoti para lamba kupulikizga mulandu wake.

Para tikuwona ivyo Baibolo likuyowoya, tikuzizwa yayi na ivyo charu cha Russia chikuchita pa kuyezgayezga ‘kututuzga chomene’ ŵabali na ŵadumbu ŵithu kuti ŵaleke kugomezgeka kwa Yehova. Ndipouli, tikukhozgeka chifukwa tikumanya kuti Yehova walutilirenge kuŵa ‘chigongwe chawo na nkhongono zawo.’—Salimo 118:13, 14.