Pa January 29, 2021, a Khoti la Birobidzhan ilo lili ku Jewish Autonomous lizamupeleka chigamuro chake pa mulandu wa Mudumbu Yelena Reyno-Chernyshova. Wakwimira boma pa milandu wandapemphe chilango icho khoti lingamupa mudumbu uyu.

Yelena Reyno-Chernyshova

• Chaka cha kubabikira: 1968 (ku Maloy, ku chigaŵa cha Irkutsk

• Mbiri yake: Wakasambira Baibolo na Ŵakaboni ŵa Yehova m’ma 1990. Ivyo wakasambiranga vikamovwira kuti waleke usilikari na kuŵikapo mtima kuti wavwire banja lake. Ndipo wakabatizika mu 1998

• Mfumu wake ni Kaboni wa Yehova yayi, kweni wakumovwira muwoli wake kuti wateŵetere Yehova kuyana na ivyo wali kusankha. Mudumbu Yelena wakutemwa kutimba bola la malundi na volleyball

Pa September 29, 2019, ŵalara ŵa boma ku Birobidzhan ŵakati Mudumbu Yelena Reyno-Chernyshova wali na mulandu.

Ŵapolisi ŵa FSB ŵakiza na kuzakasecha nyumba ya Mudumbu Yelena. Wakuwonga chomene Yehova kuti wakamovwira kuchita vinthu mwakuzika. Iyo wakuti: “Nkhalomba kwa Yehova mwaluŵiro kuti wanovwire kuti nichite vinthu mwakuzika, mwachikanga, mwantchindi, kweniso kuti nilutilire kugomezgeka kwa iyo. Apo ŵakasechanga, ŵakachitanga vinthu mwakuzika kweniso mwantchindi.”

Mulandu uwu wapangiska kuti Yelena pamoza na banja lake ŵasangane na masuzgo. Mfumu wake wakalwara matenda gha mtima (katatu) mu July 2020.. Ŵalara ŵa boma ŵali kumukanizga Mudumbu Yelena kufuma mu tawuni ya Birobidzhan. Kweniso ŵali kumujalira akaunti yake ya ku banki kuti waleke kutorako ndalama.

Yelena wakusanga nkhongono zakuzizipizgira para wakughanaghanira umo ŵateŵeti ŵanyake ŵa Yehova ŵazizipizgira nthambuzgo. Iyo wakulongosora kuti: “Nkhutemwa kuŵerenga malipoti ghakukhwaskana na ŵabali na ŵadumbu awo nyumba nawo zikasecheka ndipo ŵakutambuzgika chifukwa cha chipulikano chawo mwa Yehova. Ŵanthu ŵaŵachitira vinthu viheni vinandi kweni ŵakulutilira kuzizipizga mwachikanga.” Kuŵerenga Baibolo zuŵa lililose na kughanaghanirapo kwamovwiraso chomene Mudumbu Yelena.

Apo Yelena wakulutilira kuzizipizga chiyezgo chake, wakutemwa kughanaghanira ivyo lemba la Yesaya 30:15 likuyowoya. Lemba ili likuti: “Musangenge nkhongono chifukwa cha kukhala mwakufwasa na kugomezga”. Iyo wakuti: “Nyengo zose nkhughanaghanira ivyo vesi ili likuyowoya. Nkhutondeka na kuyowoya wuwo umo nkhujipulikira kuti niwonge Yehova chifukwa chakunovwira kuti niŵe nayo pa ubwezi! . . . Nyengo zose nkhuŵa na mtende wa mu mtima. Sono nkhumugomezga chomene Yehova ndipo nkhuthemba iyo pa chilichose. Ndipo nkhugomezga kuti wazamunilekapo yayi.”