JULY 31, 2024
RUSSIA

Mudumbu Yuliya Globa Wapika Chilango Chakuti Waleke Kusangikaso na Mulandu

JULANI

Pa June 25, 2024, Khoti la Unechenskiy ilo liri ku Chigaŵa cha Bryansk liri kudumura kuti Mudumbu Yuliya Globa wali na mulandu. Iyo wali kupika chilango chakuti waleke kusangikaso na mulandu kwa vyaka viŵiri na myezi 6. Pasono walutenge ku jele yayi.

Vyakukhwaskana na munthu uyu

Yuliya Globa

Chaka chakubabikira: 1982 (ku Ukraine)

Mbiri yake: Wakasambizganga chingelezi

Wakafipanga mtima chifukwa wakamanyanga yayi icho chikuchitika para munthu wafwa. Wakapembuzgika na mazgoro agho wakasanga kufuma mu Baibolo. Yuliya pamoza na ŵanung’una ŵake ŵaŵiri ŵakabatizika kuŵa Ŵakaboni ŵa Yehova mu 2003

Wakatorana na Ernst mu 2018

Ivyo Wakayowoya

Ntchivichi chikumovwirani kulutilira kuŵa pafupi na Yehova mu nyengo ya masuzgo iyi?

Mubali munyake wakakumbuska ine kweniso mfumu wane Ernst, kuti nthambuzgo iyi ni nkhondo ya kuthupi yayi kweni njauzimu. Ndipo Yehova wakutiwona kuti tingatonda chikuru tikulutilira kuzizipizga. Para namba kuwona masuzgo umo Yehova wakughawonera, mtima wane ukuŵa mmalo ndipo nkhuŵa na mtende wa mu mtima. Nkhukondwa chomene para nagomezgeka kwa Yehova.

Lurombo lukunovwiraso chomene. Mise yiliyose, nkhughanaghanira za vitumbiko vyose ivyo nasanga pa zuŵa ilo. Ndipo nkhupatura nyengo na kumuwonga Yehova kwizira mu lurombo chifukwa cha chitemwa icho wanilongora zuŵa ilo. Kuchita nthena kukunovwira kumanya kuti nyengozose Yehova wakuŵa nane pafupi, mwachitemwa wakukotama na kunifukatira na mawoko ghake.

Ni mwaŵi wapadera chomene kumanya kuti nase ‘tingapungulira mitima yithu pamaso pa Yehova’ na kuŵa na chigomezgo chose kuti waŵenge chiphokwero chithu.—Salimo 62:7, 8.

Nyengo

May 31, 2023

Ŵakamba kutegherezga mulandu wake
June 22, 2023

Ŵakasecha nyumba yake. Yuliya na Ernst ŵakafumbika mafumbo
September 28, 2023

Wakakanizgika kuluta ku vigaŵa vinyake
January 31, 2024

Khoti likamba kutegherezga mulandu wake
June 25, 2024

Ŵakamusanga na mulandu ndipo wakapika chilango chakuti waleke kusangikaso na mulandu kwa vyaka viŵiri na myezi 6

Wonaniso

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI