Sonosono apa, Khoti la Metallurgichesky ilo lili ku Chelyabinsk leruzgenge mulandu wa Mudumbu Valentina Suvorova. a Wakwimira boma pa milandu wachali wandapemphe chilango icho mudumbu uyu wangapika.

Valentina Suvorova

• Chaka cha kubabikira: 1948 (Sorovskoye, ku Chigaŵa cha Kurgan)

• Mbiri yake: Wali kupumura ntchito ya usambizgi iyo wakagwira kwa vyaka vyakujumpha 30 pa Chelyabinsk Music School. Wakutemwa kulima, kuvina, na kutegherezga sumu

  Wakatengwa kwa Vladimir mu 1973. Mwana wawo munyamata, Igor, wakafwa na kansa vyaka vinandi ivyo vyajumpha. Mwasonosono apa, watayaso amama ŵake na mukuru wake

Pa March 26, 2019, ŵapolisi ŵa futi ŵakasecha nyumba zakujumpha 20 za ŵabali ŵithu ku Chelyabinsk na Yemanzhelinsk. Ŵati ŵafufuza kwa nyengo yitali, pa December 5, 2019 ŵakati Mudumbu Valentina, uyo pasono wali na vyaka 73, wali na mulandu chifukwa cha kuŵerenga Baibolo kweniso kuphalirako ŵanyake ivyo wakugomezga. Pasono ŵali kumukanizga dankha kwenda. Mfumu wake Vladimir nayo ŵakuti wali na mulandu chifukwa cha chipulikano chake.

Valentina wakukumbuka ivyo vikachitika apo ŵapolisi ŵa futi ŵakiza kuzakasecha nyumba yawo uku iwo ŵakugona, iyo wakuti: “Tikatondeka nakuti tigeze, tiskakure sisi, panji kuvwara malaya ghawemi. Ŵakabwangandura chilichose, ndipo ŵakamba kusecha palipose mu nyumba yithu, kwali ni mu kabati, umo nkhusunga majuda, ma waleti, na mathumba gha vyakuvwara. . . . Ŵakasecha mu mapoto, nanga mungaŵa mu makatani kweniso mu vyakudika vithu, niti waka palipose.”

Valentina wakafipanga mtima na umo nthambuzgo iyi yikhwaskirenge umoyo wake, chifukwa chakuti ni mulara kweniso wakusuzgika mu thupi.

Valentina wakulongosora kuti kusambira Baibolo payekha kwamovwira kuti walutilire kuŵa wakukhora. Iyo wakuti: “Kuŵerenga lemba la zuŵa, kughanaghanirapo ivyo naŵerenga, na kuvilondezga, vyanovwira kuti nizizipizge masuzgo ghose agha.”

Valentina wakutiso kunozgekera maungano na kusangikapo, sambiro la wamwene, kweniso kusopa kwa pa mbumba, vikovwira chomene kuzizipizga para ukujumpha mu nyengo zakusuzga. Iyo wakuti: “Nyengo zose para naluta ku maungano nkhusambira fundo yiphya yakuti niyilondezge.” Iyo wakutiso malurombo ghakufumira pasi pa mtima ghakumukhozga chomene, ndipo wakuti, “Nyengo zose nkhuwonga Chiuta chifukwa cha wovwiri uwo wakunipa.”

Kweniso, Valentina wakulutilira kujikumbuska iyomwene na ŵanyake kuti: “Palije chifukwa chakuti tichitirenge wofi. Tikwenera kuŵa ŵakukhora kweniso ŵankhongono mu chipulikano, ndipo tikumbukenge lemba la Mateyu 6:33 na 2 Ŵakorinte 1:3, 4.”

Ntchakuwonekerathu kuti ŵabali na ŵadumbu ŵithu ku Russia, kusazgapo Valentina na mfumu wake Vladimir, ŵakulongora nadi kuti mazgu gha pa Salimo 64:10 ngaunenesko. Mazgu agha ghakuti: “Murunji wasekelerenge mwa Yehova na kubisama mwa iyo. Wose ŵakunyoloka mu mtima ŵazayenge.”