JULY 26, 2021
RUSSIA

“Nthambuzgo Yanovwira Kuti Niŵe Paubwezi Wakukhora Chomene na Yehova”

JULANI

Nyengo

Khoti la Pavlovskiy ilo lili ku Chigaŵa cha Krasnodar lipelekenge chigamuro chake sonosono apa pa mulandu wa Mubali Vladimir Skachidub. a Uyo wakwimira boma pa milandu wachali wandapemphe chilango icho mubali uyu wangapika
December 30, 2020

Khoti likwamba kutegherezga mulandu wake
July 23, 2020

Waŵikika mu gulu la ŵanthu awo boma likuti ŵakuchita vinthu vyakofya
June 23, 2020

Wapika mulandu chifukwa cha kuchitako ntchito yakupharazga

Vyakukhwaskana na munthu uyu

Vladimir Skachidub

Chaka cha kubabikira: 1961 (Pavlovskaya, Chigaŵa cha Krasnodar)

Mbiri yake: Wakagwirapo ntchito ku usilikari ndipo kufuma apo wakasambira vyakukhwaskana na mawayilesi pa sukulu yinyake ku Taganrog, Chigaŵa cha Rostov. Ŵapapi ŵake ŵakafwa apo wakaŵa na vyaka 25. Wakawelera ku tawuni yakwake kuti wakapwelelere mudumbu wake, Nataliya, uyo wakaŵa na vyaka 15 pa nyengo iyo. Nataliya wakafwa na kansa ya mu ndopa mu 2003. Vladimir wakamba kugwira ntchito yakwendeska mashini pa kampani yinyake. Wakutemwa kujambura vithuzi na kulizga gitara

Wakamba kunweka na uthenga wa mu Baibolo chifukwa chakuti wakawona Nataliya na mubwezi wake Galina ŵakusambira Baibolo na Ŵakaboni ŵa Yehova. Wakakhorwa na umo ŵakalongosolera nkhani ya chilengiwa ndipo paumaliro wakazomera kusambira Baibolo. Wakaleka kukhweŵa hona na kumwa chomene moŵa. Wakatorana na Galina mu 1997. Wakabatizika mu 1998 ndipo muwoli wake Galina wakabatizika mu 2016

Ivyo Wakayowoya

Kasi pa nyengo iyi mukalombanga vichi kwa Yehova?

Nkhalombanga kuti wanovwire na mzimu utuŵa, wanilongozge, na kunipa nkhongono zakuluska zakawiro. Apo ŵakambanga kufufuza mulandu wane, . . . nkhalomba kwa Yehova kuti wanovwire kutuŵiska zina lake apo nkhayowoyanga na uyo wakufufuza mulandu. Apo wakanifumbanga mafumbo kaumaliro, uyo wakafufuzanga mulandu wane wakanilumba na kuyowoya kuti nkhachita vinthu mwantchindi chomene.

Kasi mwasambira vichi sono ivyo vyamovwirani kunozgekera viyezgo ivyo vingiza munthazi?

Nthambuzgo iyi yanovwira kuti niŵe paubwezi wakukhora chomene na Yehova ndiposo kuti nileke kutaya mtima chomene mu nyengo zakusuzga nga ni izi, kweni nithembenge chomene Yehova.

Nga ni Vladimir, nase tili na chigomezgo chose kuti Yehova walutilirenge kumovwira ‘kuti wazizipizge vinthu vyose ndiposo wazikire na kuŵa na chimwemwe.’—Ŵakolose 1:11.

a Ni nyengo zose yayi apo deti ilo khoti lizamupelekera chigamuro chake likumanyikwirathu.