Pa April 1, 2021, ku Moscow kukachitika ungano uwo ŵakakumbukiranga kuti pajumpha vyaka 70 kufuma apo kukaŵira chakuchitika chakuchemeka ‘Operation North’—kung’anamura ivyo vikachitika mu 1951 apo Ŵakaboni ŵa Yehova pafupifupi 10,000 ŵakaŵachimbizga mu vigaŵa vyawo na kuŵatumizga pa sitima ya pamtunda kuya ku Siberia. Gulu la ŵanthu 6, kusazgapo nkhwantha zinyake na awo ŵakuwona vya wanangwa wa ŵanthu ŵakaŵapo pa ungano uwu ndipo ŵakaŵa ŵakunozgeka kuzgora mafumbo agho ŵamutolamakani ŵakaŵafumbanga. Ŵakayowoyapo vyakukhwaskana na ‘Operation North’ kweniso vyakukhwaskana na nthambuzgo iyo Ŵakaboni ŵakukumana nayo ku Russia. Pulogiramu yose ya ungano uwu yikawoneskeka pa Intaneti.

Yaroslav Sivulsky, uyo wakwimira Wupu wa Ŵakaboni ŵa Yehova ku Europe ndipo ŵachibali ŵake nawo ŵakakhwaskika na chakuchitika chakuchemeka ‘Operation North,’ wakayowoya vinthu vinandi vyakukhwaskana na nthambuzgo iyo ŵakakumana nayo awo ŵakatumizgika ku Siberia. Sivulsky wakati: “Para tikuwona ukaboni mu mabuku gha mbiri yithu yakale, tikusanga kuti Ŵakaboni ŵa Yehova ŵakukwana 9,793 na mbumba zawo, ŵakatumizgika ku Siberia. Chiŵelengero ichi chikusazgapo awo ŵakafwa na awo ŵakababikira mu nthowa.”

Sergey Ivanenko, uyo ni nkhwantha ya vya chisopa ya ku Russia, wakayowoyapo ivyo boma la Soviet likaŵapusikizgiranga Ŵakaboni ŵa Yehova mu nyengo ya ‘Operation North,’ kweniso ivyo boma la Russia likuŵapusikizgira Ŵakaboni mazuŵa ghano apo likuŵatambuzga. Ivanenko wakayowoyaposo vya umo Ŵakaboni ŵakuzizipizgira, wakati: “Ivyo boma likuchita pa kutambuzga Ŵakaboni ŵa Yehova kufuma waka mu 2017, viphurenge kanthu yayi. Ivyo Ŵakaboni ŵakachita pa kulutilira kuzizipizga mu nyengo ya ‘Operation North’ kweniso umo ŵakuzizipizgira nthambuzgo iyo ŵakusangana nayo sono ku Russia, mbukaboni wakukwana wakuti palije icho chingaŵapangiska kuleka kusopa Chiuta wawo, ndipo boma likuphyokapo waka. Ntheura chingaŵa chamahara kuti boma la Russia lileke waka kuŵakanizga Ŵakaboni kuchita milimo yawo.”

Artur Artemyev uyo ni nkhwantha ya vya chisopa ku Kazakhstan, kweniso wakulemba vyakukhwaskana na mbiri ya Ŵakaboni ŵa Yehova ku Kazakhstan: A Social-Historical and Religious Analysis (lakunozgekaso mu 2020), wakati nangauli boma la Soviet likaŵachitira nkhaza zakupambanapambana Ŵakaboni ŵa Yehova, kweni likatondeka kuŵamara panji kuŵalekeska vigomezgo vyawo. M’malo mwake, mu charu chake chiŵelengero cha Ŵakaboni chikasazgikira chomene mu nyengo ya muwuso wa Soviet. Mwakuyana waka, uyo wakuwona vya wanangwa wa ŵanthu zina lake Valery Borschev wa wupu wa Moscow Helsinki Group wakati: “Nthambuzgo yikupangiska waka kuti Ŵakaboni ŵa Yehova ŵakhozge chipulikano chawo. Nakuti ŵamazaza ŵakwenera kumanya fundo yambura kususkika iyi.”

Valentin Gefter, uyo ngwa mu wupu wa Expert Council ndipo uli pasi pa Commissioner for Human Rights ku Russia, wakayowoyapo pa mutu wakuti “Umo Ŵakayidi Awo Ŵali mu Jele Chifukwa cha Chipulikano Chawo Ŵakuwonekera ku Russia Pasono.” Ŵakaboni awo ŵali kujalirika mu jele ku Russia, ŵakujalirika chifukwa cha chipulikano chawo, chifukwa cha ndyali yayi. Iyo wakadidimizga kuti: “Ŵakaboni ŵa Yehova mbakuwukira Boma yayi.” Wakalutizga kuyowoya kuti ivyo Ŵakaboni ŵakusambira ndivyo vikuŵapangiska kuti ŵaleke kunjilirapo pa vya ndyali. Pa chifukwa ichi, ŵamazaza ndikuti ŵakuŵachitira waka vinthu vyambura urunji para ŵakuŵajalira mu jele Ŵakaboni.

Uyo wakayowoyapo paumaliro wakaŵa Aleksandr Verkhovsky. Iyo ngwa mu wupu wa Presidential Human Rights Council kweniso mulara wa wupu wa SOVA Center for Information and Analysis. Wupu wa SOVA Center ukufufuza na kulemba milandu yose iyo njambura kwenelera kuŵikika mu gulu la kuchita vinthu vyakofya, kusazgapo milandu iyo ŵakupa Ŵakaboni ŵa Yehova. Iyo wakayowoyapo vya nthambuzgo iyo Ŵakaboni ŵakukumana nayo ku Russia. Wakati: “Kasi vingachitika kuti muleke kutambuzga Ŵakaboni? Ili ni fumbo lakuzirwa chomene, ndipo tikumanya yayi zgoro lake.” Verkhovsky wakugomezga kuti nyengo yizenge apo ŵamazaza ŵa boma la Russia ŵazamuleka kutambuzga Ŵakaboni ŵa Yehova. Iyo wakapeleka masachizgo ghanandi ghakovwira awo ŵakupanga malango kuti ŵasinthe umo ŵakuwonera dango la kuchita vinthu vyakofya, mwakuti ŵavikilire charu chawo kwa ŵanthu awo ŵakuchita nadi vinthu vyakofya m’malo mwakuti ŵaswenge wanangwa wa ŵanthu ŵamtende, nga Mbakaboni ŵa Yehova.

Ŵamutolamakani ŵakazomerezgeka kufumba mafumbo ŵanthu awo ŵakaŵa pa ungano uwu pa ivyo vikayowoyeka.

Pa zuŵa lenelili, kukachitikaso ungano unyake wapadera mu msumba wa Chisinau, Moldova, ndipo ukachitiskika na wupu wa Institute of History of the Academy of Sciences of Moldova, Alecu Russo State University of Balti, na Bogdan Petriceicu Hasdeu State University of Cahul. Ungano unyake uzamuchitikira ku Ukraine pa April 9.