Mubali Oleg Danilov na Mubali Vladimir Ermolaev, Jr., mbamoza mwa Ŵakaboni ŵa Yehova ŵanandi ŵa ku Russia awo ŵakulutilira kugomezgeka kwa Yehova nangauli ŵakutambuzgika. Ŵabali ŵaŵiri ŵachikanga aŵa, ŵakulongosora kuti ŵakukhozgeka chomene na viyelezgero vya chikanga na chipulikano ivyo ŵabali ŵawo ŵakumanyuma ŵakalongora.

Agogo ŵa Oleg a Fyodor na a Yekaterina Rigel ŵakaŵa Ŵakaboni ŵa Yehova mu 1958. Boma likati lamba kutambuzga Ŵakaboni ŵa Yehova, ŵalara ŵa boma la Russia ŵakasecha nyumba ya Rigel, ŵakapoka katundu wawo, na kumulipiska ndalama Fyodor. Nangauli ŵakatambuzgika nthena, kweni Fyodor wakalutilira kovwira banja lake kuti lilutilire kusopa Yehova nyengo zose.

Ŵana ŵa Fyodor na Yekaterina, Alfred na Ella (amama ŵa Oleg), ŵakahoyekanga na kutambuzgika apo ŵakakuranga. Nawo ŵakaŵa na chipulikano chakukhora ndipo ŵakalutilira kugomezgeka kwa Yehova. Apo Alfred wakachichizgika kuti wanjire usilikari, iyo wakakana m’malo mwake wakagwira jele vyaka vitatu.

Nga mbasibweni ŵake a Alfred, Oleg Danilov nayo wakugwira jele la vyaka vitatu chifukwa cha chipulikano chake. Wakhala mu jele kufuma waka mu March 2021, wali kutali na muwoli wake, Nataliya, kweniso ŵana ŵawo ŵanyamata, Ilya na Nikita. Banja la Danilov likugomezga kuti Yehova waŵawovwirenge kuti ŵalutilire kugomezgeka nga umo wakawovwilira agogo ŵa Oleg na asibweni ŵake.

Oleg wakulongosora kuti: “Kanandi nkhughanaghanira umo ŵabali ŵane kweniso ŵabali na ŵadumbu mu nyengo ya Soviet Union ŵakazizipizgira ndiposo kulutilira kuŵa ŵachimwemwe.” Wakatiso: “Kwa ine, najiwonera nekha ukaboni wambura kususkika wa nkhongono ya mzimu wa Yehova. Nkhugomezga kuti ine na banja lane tilutilirenge kuzizipizga kweniso kulutilira kuŵa ŵachimwemwe.”

Abuya ŵa Vladimir, Jr. a Anna Ermolaeva ŵakasambira unenesko mu 1953 mu muzi wa Serebrovo, Chigaŵa cha Irkutsk. Anna wakaŵa wakwamba kubatizika mu muzi uwu kuŵa yumoza wa Ŵakaboni ŵa Yehova. Anna wakasuskikanga chomene na ŵazengezgani ŵake kweniso amama ŵake, awo ŵakalekerathu kuyowoyeskana nayo.

Ŵalara ŵa boma ŵakati ŵapulika kuti Anna wakupharazga, ŵakati iyo ni munthu muheni panji kuti wakofya kwa mwana wake, Vladimir, Sr., ndipo ŵakamofya kuti ŵamupokenge mwana wake.

Ŵabali na ŵadumbu mu mpingo wa Anna ŵakalemba kalata yakulongosora kuti iyo wakaŵa mama muwemi. Mubali wakayegha kalata na kuluta nayo ku Moscow ndipo wakakapeleka kwa Nikita Khrushchev uyo wakaŵa mulongozgi. Khrushchev wakatuma ŵanthu kuti ŵakafufuze nkhani iyi. Pamanyuma ŵakasanga kuti Anna walije mulandu, ndipo ŵalara ŵa boma ŵakamupoka yayi mwana wake.

Anna wakaŵaso na mwana msungwana zina lake, Nadezhda. Mu 1970, mwana wake wakakhala mu chipatala chifukwa wakalwara chomene munthumbo. Madokotala ghakamuchita waka opareshoni kwambura kumanya dankha makora suzgo lake. Apo ŵakachitanga opareshoni yamwaluŵiro iyi, madokotala ghakamuchichizga kuti waŵikike ndopa. Wose ŵaŵiri, mama na mwana ŵakakana kuleka kugomezgeka. Madokotala ghakaŵikako mahara yayi ku ivyo ŵeneko ŵakasankha, ndipo ŵakamuchichizga Nadezhda na kumuŵika ndopa izo zikapambananga na zake. Chachitima ntchakuti wakafwa pakati pajumpha nyengo yichoko waka kufuma apo ŵakamuŵikira ndopa. Kuti ŵajare nkhani, ŵalara ŵa boma ŵakamuyimba mulandu Anna mwakumulemba mu nyuzipepera na kuyowoya vinthu vyautesi vyakukhwaskana na Anna kuti “wakapeleka mwana wake sembe.”

Ivyo vikachitika apa vikamukhwaska chomene mfumu wa Anna, Valentin. Iyo nyengo zose wakamuzomerezganga Anna kuti wasambizgenge ŵana ŵawo fundo za mu Baibolo kweni iyo wakazilondezganga yayi. Valentin wakati wawona umo Ŵakhristu ŵanyake ŵakamovwilira Anna panyengo ya kusuzga iyi, wakazomera kwamba kusambira Baibolo, ndipo pamanyuma wakaŵa yumoza wa Ŵakaboni ŵa Yehova.

Anna na Valentin ŵakalutilira kusambizga mwana wawo, Vladimir, Sr., kuti walondezgenge fundo za mu Baibolo. Vladimir wati wakura, wakatora mudumbu wakugomezgeka zina lake Lyubov. Vladimir na Lyubov, nawo ŵakasambizga mwana wawo, Vladimir, Jr., kuti watemwenge Chiuta na kulondezga fundo za mu Baibolo.

Mu February 2020, ŵalara ŵa boma ŵakasecha nyumba ya Vladimir, Jr., na muwoli wake, Valeriya. Vladimir, Jr., wakakakika, na kumuŵika ku malo ghakusungirako ŵanthu, ndipo pamanyuma ŵakamuŵika mu jele la pa nyumba pafupifupi myezi yiŵiri. Ŵakuti wali na mulandu wakulongozga milimo ya gulu ilo ndakukanizgika, ndipo pasono wakulindilira waka ivyo khoti ligamurenge usange wali na mulandu panji yayi. Para khoti limusangenge na mulandu, ndikuti wangakagwira jele kwa vyaka pafupifupi 15. M’malo mwa kughanaghanira ivyo khoti ligamurenge, Vladimir, Jr., wakughanaghanira waka chiyelezgero chiwemi icho ŵapapi na agogo ŵake ŵakalongora.

Vladimir, Jr wakayowoya kuti: “Ni mwaŵi wapadera kusuzgika chifukwa cha zina la Adada ŵithu. Ŵapapi ŵane na agogo ŵane ŵakazizipizga mu nyengo za masuzgo na kulutilira kugomezgeka. Nane nifiskenge kuchita nthena.”

Nga ni Oleg na Vladimir, Jr., Ŵakaboni ŵanandi ku Russia ŵakuzirwiska chomene viyelezgero ivyo ŵabali ŵawo ŵakugomezgeka awo Mbakaboni ŵakalongora. Mphanyi tose taghanaghanirapo pa viyelezgero vya awo ŵakazizipizga nthambuzgo mu nyengo yakale kweniso awo ŵakuzizipizga mazuŵa ghano, ndipo mphanyi ‘tayezga chipulikano chawo.’—Ŵahebere 13:7.