Vyaka 10 ivyo vyajumpha pa June 10, 2010, Khoti Lakuwona vya Wanangwa wa Ŵanthu ku Europe (European Court of Human Rights.) likati charu cha Russia chaswa wanangwa wa Ŵakaboni ŵa Yehova chifukwa cha kuyezga kuŵakanizga kusopa mwawanangwa kwa vyaka vinandi. Khoti la ECHR likati boma la Russia liŵalipire Ŵakaboni ŵa Yehova kweniso liŵazomerezgeso kulembeska chisopa chawo ku Moscow—chifukwa likaŵakanizga kuchita nthena mu 2004.

Khoti ili likati ladumura nthena, Mubali Ivan Chaykovskiy, uyo wakalaŵiliranga milimo yinyake ya Ŵakaboni ŵa Yehova ku Moscow wakati: “Ivyo Khoti layowoya vikulongora kuti kuchita vinthu mwamahara nkhuwemi kuluska kuŵa waka na sankho pa nkhani ya chisopa. Nili na chigomezgo chose kuti ivyo khoti ili ladumura viwovwirenge kuti ŵamazaza ŵachitepo kanthu mwakuti ŵatiwezgere wanangwa withu wakusopa kweniso kuleka kuchitira nkhaza Ŵakaboni ŵa Yehova mu charu chose cha Russia.”

Ndipouli, ivyo mubali uyu wakakhazganga vikachitika yayi, chifukwa boma la Russia likatondeka kupulikira ivyo khoti la ECHR likadumura. M’malo mwake likamba kutambuzga chomene ŵabali ŵithu mu charu chose cha Russia. Ivi vikawonekera pakweru apo Khoti Likuru la Russia likakanizga kusopa kwithu mwawanangwa mu 2017. Kufuma waka pa nyengo iyi boma likukaka, kujalira na kupeleka milandu ku ŵabali ŵithu.

Nangauli pajumpha vyaka 10, kweni ivyo khoti ili likadumura vichali vyakuzirwa. Mu 2010, khoti la ECHR likasuska milandu yambura kupulikikwa iyo boma la Russia likulutilira kupa ŵabali ŵithu pasono.

Khoti la ECHR likatiso dipatimenti ya kuwona vya urunji ya ku Moscow, kweniso makhoti gha ku Moscow ghalije chifukwa chakupulikwa chakukanira kuti chisopa cha Ŵakaboni ŵa Yehova chilembeskeke mu kawundura. Wupu uwu ukasuskaso ŵamazaza ŵa ku Moscow chifukwa chakuti ŵakuchita vinthu mwakutemwera chigaŵa chimoza.” Ŵamazaza ŵa ku Moscow ŵakaŵasangaso na mulandu wa kuswa dango ilo ŵakakolerana mu wupu wa European Convention on Human Rights, ndipo boma la Russia nalo lili mu wupu wenewuwu.

Kufuma mu 2010 kufika sono mu 2020, waliyose wakuwona nkhaza zose izo boma la Russia likuchitira ŵabali ŵithu. Rachel Denber uyo ngwachiŵiri kwa mulongozgi wa wupu wa Europe and Central Asia for Human Rights Watch wakati: “Para Ŵakaboni ŵa Yehova ku Russia ŵachita waka chilichose chakukhwaskana na chipulikano chawo, ndikuti ŵali pa ngozi ya kuchitirika nkhaza.” Mu ivyo wakayowoyaso pa January 9, 2020, wakati: “Palije chifukwa chakupulikikwa chakuti ŵachitirenge nkhaza Ŵakaboni.”

Apo ŵabali na ŵadumbu ŵithu ku Russia ŵakulutilira kuchitirika vinthu vyambura urunji, tikulomba kuti Yehova walutilire kuŵakhozga mwakuti ‘ŵalutilire kuzizipizga vinthu vyose mwakuzikira na mwachimwemwe.’—Ŵakolose 1:11.