MAY 2, 2023
RUSSIA

Wakakhozgeka na Viyelezgero vya Ŵanthu ŵa Chipulikano

JULANI

Khoti la Leninskiy ilo ili ku Chigaŵa cha Novosibirsk sonosono apa lipelekenge chigamuro chake pa mulandu wa Mubali Dmitriy Dolzhikov. Wakwimira boma pa milandu wachali wandapemphe chilango icho Mubali uyu wangapika.

Vyakukhwaskana na munthu uyu

Dmitriy Dolzhikov

Chaka cha kubabikira: 1978 (Kamyshevka, Chigaŵa cha Rostov)

Mbiri yake: Wakagwiranga ntchito pa kampani yakupanga vinthu na vyakuzenga

Wakamanyana na Ŵakaboni ŵa Yehova pa nyengo iyo amama ŵake ŵakamba kusambira Baibolo. Wakaŵapo pa ungano wa Ŵakaboni ndipo wakakondwa chifukwa wakawona kuti ŵanthu ŵake ŵakutemwana kweniso mbakukolerana. Wakabatizika mu 1997

Wakatorana na Marina mu 2008

Ivyo Wakayowoya

Kasi mukachita wuli kuti munozgekere nthambuzgo?

Apo Mubali Dennis Christensen wakakakika mu 2017 na kuŵikika mu jele, nkhamba kughanaghanirapo umo ningakhozgera chipulikano chane pambere nindakakike. Nkhamba kulomba mwakuyana na mazgu agho ghali pa Salimo 26:2, apo Davide wakaphalira Yehova kuti wasande na kuyenga maghanoghano na mtima wake. Nkhamba kulomba Yehova kuti wanovwire kumanya ivyo nkhutondeka kuchita makora. Nkhaŵerenga mwakuwerezgawerezga mabuku nga Proclaimers na Yesu ni Nthowa, Unenesko, na Umoyo. Kweniso nkhasunga pa mtima mavesi gha mu Baibolo agho ghakuyowoya kuti Yehova wakulayizga kovwira ŵateŵeti ŵake usange ŵali mu masuzgo.

Kasi ni nkhani wuli ya mu Baibolo iyo yamovwirani chomene kuti muzizipizge?

Nkhukhozgeka chomene na chiyelezgero chiwemi cha Eliya. Apo wakachimbiranga Fumukazi yankhaza Yezebeli, Eliya wakakhumbikwiranga wovwiri wa Yehova. Ndipo Yehova wakamulongora nkhongono zake, kweniso wakamukhozga Eliya na kumusimikizgira kuti wali yekha yayi. Pasono nkhopaso chara chifukwa nkhumanya kuti Yehova wali nane ndipo ngwakunozgeka kunovwira.

Tili na chigomezgo chose kuti Yehova walutilirenge kukhozga Dmitriy na ise tose apo wakuwona kugomezgeka kwithu na kuzizipizga.—Chivumbuzi 2:19.

Nyengo

May 13, 2022

Ŵakamupa mulandu
September 8, 2022

Ŵakasecha nyumba yake. Ŵakamusunga mu jele lakulindilirako awo milandu yawo yinderuzgike
September 9, 2022

Wakafumbika mafumbo ndipo ŵakamusamuska ku Chelyabinsk pa ndege kuluta nayo ku jele lakulindilirako awo milandu yawo yinderuzgike la Novosibirsk, mtunda wa makilomita ghakujumpha 1,500
November 11, 2022

Khoti likamba kutegherezga mulandu wake
November 24, 2022

Wakafumiskika mu jele lakulindilirako awo milandu yawo yinderuzgike ndipo ŵakamuŵika pa jele la panyumba

Wonaniso

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI