Pa June 26, 2020, ŵalaraŵalara ŵa jele la Lgov ŵakamuŵikira dala Mubali Dennis Christensen mu selo yakuyuzgiramo ŵanthu (EPKT), iyo ŵakuŵikangamo ŵanthu awo ŵapalamura milandu yikuruyikuru. Pakuti pasono mubali withu wali makora viŵi yayi, vikulongora kuti chilato chawo chikaŵa chakuti mphanyi wafwa. Ofesi ya boma yakuwona vya milandu nayo yikuwoneka kuti yikukhumba kumupenjera vifukwa Mubali Christensen vyakuti yimukanizgire kufuma luŵiro mu jele, nangauli pakwamba yikakolerana navyo ivyo khoti likadumura kuti wafume.

Mubali Christensen wagwira kale vyaka vyakujumpha vitatu pa vyaka 6 ivyo ŵakamweruzga kuti wagwire jele. Kwa chaka sono, mubali uyu wanguŵa na mwaŵi wakuti wangapempha kuti wafume luŵiro mu jele. Wakapempha maulendo ghatatu kweni ŵakamukanira, ndipo apo wangupempha kachinayi ndipo pempho lake likaluta ku khoti. Pa June 23, 2020, Khoti la Lgov likadumura kuti wafumiskike mu jele ndipo vyaka vyake ivyo vyakhalako kuti wagwire jele walipire waka ndalama. Artem Kofanov, uyo ngwakwimira boma pa milandu, wakaŵapo apo ŵakapelekanga chigamuro ichi ndipo nayo wakakhozgera ivyo khoti likadumura.

Pati pajumpha mazuŵa ghaŵiri, Aleksei Shatunov, uyo nayo wakwimira boma pa milandu wakati ivyo khoti likadumura apa vikaŵa vyakubudika, ndipo vileke kugwira ntchito kweniso wakapempha kuti mulandu uwu weruzgikeso mu khoti lenelili na mweruzgi munyake. Shatunov wakati wakuyowoya nthena chifukwa cha malipoti ghaheni agho ŵakapokera kufuma ku ŵalara ŵa jele la Lgov awo ŵakatenge Mubali Christensen “ni mukata pa ntchito, kweniso walije nkharo.”

Apo ŵakeruzganga mulandu wa Mubali Christensen pa June 23, ŵalara ŵa jele ŵakayezga kuyowoya vifukwa vyautesi vyakuyana waka, kweni uyo wakeruzganga mulandu uwu wakati vifukwa ivi vikaŵa vyambura kupulikikwa. Uyo wakimiranga mubali uyu pa mulandu wake wakalongora khoti ili vikalata vya ku chipatala ivyo vikaŵa na ukaboni wakuti Mubali Christensen wali na masuzgo ghanyake agho ghakumutondeska kugwirako ntchito zinyake mu jele. Yumoza wa ŵalara ŵa jele aŵa wakati iwo ŵalije ntchito zinyake izo Mubali Christensen wangagwira chifukwa cha masuzgo agho wali nagho.

Apo ofesi ya boma yakuwona vya milandu yikamba kuwona apilu yakuti Mubali Christensen wafume luŵiro mu jele pambere nyengo yake yindakwane, yikapokera malipoti ghaŵiri kufuma ku ŵalara ŵa jele ghakuyowoya vya Mubali Christensen. Lipoti lakwamba likatenge mubali uyu wakasangika mu chipinda cha kulyera pa nyengo yambura kwenelera, ndipo lachiŵiri likatenge mubali uyu wakavwara tisheti kwambura jekete. Pa chifukwa ichi, ŵalara ŵa jele ŵakaŵika Mubali Christensen mu selo yakuyuzgiramo ŵanthu (EPKT) kwa mazuŵa 10. Kuyana na dango la boma la Russia, ŵalara ŵa jele ŵakwenera kuchita nthena pekha para kayidi wawerezgapo kuswa malango ghakuru gha jele kweniso pekha para dokotala wamuwona na kuzomerezga kuti wali makora. Pakuti umu ndimo vikaŵira yayi na Mubali Christensen, pakaŵavya chifukwa chakuti ŵamuŵikire mu selo yakuyuzgiramo ŵanthu (EPKT).

Mubali Christensen na mukayidi munyake ŵakukhala mu selo yimoza iyo nja mamita ghatatu mu utali na mamita ghaŵiri mu ufupi. Mu selo iyi mphepo zikwenda makora yayi ndipo muli chuku, ivyo vikupangiska kuti umoyo wa Mubali Christensen ulutilire kuŵa pa ngozi. Mu myezi yichoko waka iyo yajumpha mubali uyu ŵakamusanga na vilaso kweniso suzgo la msana. Loya wa Mubali Christensen wakati “ŵalara ŵa jele ŵakumanya makora vyose ivi, kweni ŵali kumuŵikira dala mu selo iyo njiwemi yayi kweniso wakugona pa bedi ilo palije matiresi ivyo vikupangiska kuti wapulikenge vyakuŵinya chomene.”

Mubali Christensen wakaphalira loya wake kuti pa nyengo iyo ŵakuti wakaswa malango gha jele, wakaŵa lumoza na ŵakayidi ŵanyake, kweni iyo pera ndiyo ŵakamuŵika mu selo yakuyuzgiramo ŵanthu (EPKT). Loya wa Mubali Christensen wakati, “Ivi vikulongora pakweru kuti vifukwa vyose ivi ŵachita kwata waka kuti ŵamutondeske Mubali Dennis Christensen kufuma mu jele nga umo khoti likadumulira.”

Apo ŵalara ŵa boma la Russia ŵakulutilira kupenja vifukwa kweniso nthowa zakupambanapambana zakuti ŵawukirenge ŵabali ŵithu ku Russia, ise tikulutilira kugomezga kuti Yehova ndiyo waŵenge chigongwe chawo chakukhora. Tiyeni tose tilutilire kulomba kuti Yehova walutilire kupeleka kwa Mubali Christensen na muwoli wake Irina, chilichose icho ŵakukhumbikwira kuti ŵalutilire kuŵa ŵakugomezgeka pa nyengo yakusuzga chomene iyi.—Salimo 94:13, 21, 22.