Kalata iyo ŵakalembera Minister of Foreign Affairs ku Russia pa December 9, 2022, Mulembi wa Council of Europe (COE) wakachiska boma la Russia kuti likwenera kulondezga ivyo Khoti Lakuwona vya Wanangwa wa Ŵanthu ku Europe likagamura mwasonosono apa. Mwachiyelezgero chigamuro cha mu June 2022, chikati boma la Russia lili kunangira Ŵakaboni ŵa Yehova pakuŵakanizga kuchita milimo yawo. a

Kalata iyi yikakumbuskanga boma la Russia kuti nangauli lili kufumamo mu COE mu March 2022, kweni likwenera kuchindika nipera vyose ivyo Khoti Lakuwona vya Wanangwa wa Ŵanthu ku Europe likadumura kufika pa September 16, 2022. Ndipouli, Komiti ya COE yiwoneseskenge kuti ivyo khoti likadumura vikulondezgeka.

Kwambira waka mu June 2022, apo chigamuro chikapelekekera, Komiti ya Council of Europe yikuchiska mwankhongono boma la Russia kuti lifumiskepo chigamuro icho Khoti Likuru likapeleka mu 2017, chakukanizga milimo ya Ŵakaboni ŵa Yehova. Komiti iyi yikayowoyaso ku boma la Russia kuti “liwoneso makora dango ilo ŵali kukhazikiska ilo likuyowoya kuti Ŵakaboni ŵa Yehova ni gulu ilo likuchita vinthu mwakutalulira . . . ; kweniso kuti boma ili limazge milandu yose iyo ŵakuŵapa Ŵakaboni ŵa Yehova, kuŵafumiska awo ŵali mu jele, kuŵawezgera katundu uyo boma lili kupoka panji kupeleka ndalama zakuphepiskira.” b

Pakuti Ŵakaboni ŵali kukanizgika vinthu vinyake, vyapangiska masuzgo ghanandi ndipo ŵabali na ŵadumbu ŵakujumpha 660 ŵali kuŵalipiska panji kuŵajalira mu jele chifukwa chakulondezga ivyo ŵakugomezga. Ŵabali ŵakujumpha 360 ŵakajalirika mu jele, ndipo ŵabali ŵakukwana 114 ŵachali mu jele panji ku malo ghakusungirako ŵanthu awo ŵanderuzgike.

Ku Russia, ŵabali na ŵadumbu ŵakujumpha 450 ŵali kuŵaŵika pagulu la ŵanthu awo ŵakuchita vinthu mwakutalulira kweniso vigeŵenga, ndipo ivi vikupangiska kuti ŵasuzgikenge kusanga vyakukhumbikwa pa umoyo wawo kweniso ku mabanja ghawo. Chifukwa chakuti ŵali kuŵikika pa gulu ili, ilo waliyose wangaliwona vikupangiska kuti ŵanthu ŵaŵagegenge ndipo ŵakusuzgika kuti ŵasange ntchito. Masuzgo ghanyake agho ŵakukumana nagho ngakuti ŵakuŵajalira maakaunti gha ku banki, ŵakusuzgika kupangiska vimakalata vya inshuwalansi, kusuzgika kuguliska katundu, kuchita bizinesi, kupokera chiharo, nanga nkhugura SIM khadi ya foni.

Tili ŵakukondwa kumanya kuti ŵa Council of Europe ŵaŵikapo mtima kuwoneseska kuti urunji wawoneka ku ŵabali na ŵadumbu ŵithu ku Russia. Ŵabali na ŵadumbu pa charu chose ŵakukhozgeka na malipoti agho ghali pa jw.org ghakukhwaskana na ŵabali ŵithu ku Russia agho ghakuyowoya vya chipulikano chawo, chikanga, kweniso chimwemwe icho ŵali nacho. Ndipo tikuwonga chomene Yehova.—Ŵafilipi 1:12-14.