DECEMBER 20, 2021
RUSSIA

YASONO | Ŵabali Ŵanayi Ŵakulindilira Ivyo Khoti Lidumurenge Pamanyuma Pakuti Ŵamazaza Ŵasecha Nyumba Zawo ku Chigaŵa cha Trans-Baikal

JULANI

Pa June 6, 2022, Khoti la Central ilo lili ku Chita likati Mubali Vladimir Ermolaev, Sergey Kirilyuk, Igor Mamalimov, na Aleksandr Putintsev ŵali na mulandu. Sergey wakapika chilango chakuti waleke kusangikaso na mulandu kwa vyaka 6. Pasono ŵamumujalira mu jele yayi. Vladimir, Igor, na Aleksandr wose ŵakapika chilango chakuti ŵakagwire jele vyaka 6 na hafu. Chilango chawo chambenge kugwira ntchito sonosono apa.

Nyengo

March 16, 2021

Khoti likwamba kutegherezga mulandu
February 2, 2021

Vladimir, Sergey, Igor, na Aleksandr ŵapika mulandu wakulongozga milimo ya gulu ilo ndakukanizgika
April 3, 2020

Vladimir wafumiskika pa jele la panyumba
February 15, 2020

Sergey wafumiskika mu jele ilo wakasungikanga wati wakhalamo mazuŵa 5
February 12, 2020

Igor na Aleksandr ŵafumiskika mu jele ilo ŵakasungikanga. Nyengo iyo ŵakamusungira mu jele Sergey ŵakasazgirako maora 72. Vladimir wakatumika pa jele la panyumba kwa mazuŵa 52
February 10, 2020

Ŵa FSB ŵakasecha nyumba 50 za Ŵakaboni ŵa Yehova ku Chigaŵa cha Trans-Baikal. Ŵakasechaso nanga ni nyumba za Ŵakaboni awo mbachekuru kweniso ŵakupendera. Mu nyumba ya Ŵakaboni ŵanyake, ŵamazaza aŵa ŵakatimba mwana wa mu banja ili uku amama ŵake na mwana wakwake ŵakuwona. Mubali munyake ŵakamuchitira nkhaza chomene. Apo ŵakamalizganga kusecha uku, ŵamazaza aŵa ŵakakaka ŵabali 10, ndipo Igor, Aleksandr, Sergey, na Vladimir nawo ŵakaŵa mu gulu la kukakika

Vyakukhwaskana na ŵanthu aŵa

Sergey Kirilyuk

Chaka cha kubabikira: 1972 (Cheremkhovo, Chigaŵa cha Irkutsk)

Mbiri yake: Wakakulira mu mbumba ya ŵana 6. Wakugwira ntchito ya kotchelera visulo. Wakatorana na Olga mu 1992. Ŵali na ŵana ŵatatu

Sergey na Olga ŵakanweka kusambira Baibolo cha kuumaliro wa ma 1990. Ŵakabatizika mu 1998

Ivyo Wakayowoya

Kasi nkharo yinu yikakhwaska wuli awo mukaŵira lumoza ku jele?

Ŵakaniŵika mu selo yimoza na munthu uyo wakukhalira waka kupalamura milandu. Munthu uyu tingati wakhala ulara wake wose mu jele. . . . Nyengo yiliyose para nkhuwelera ku selo kufuma uko ŵakanifumbanga mafumbo, wakanifumbanga kuti: “Waŵaphalira chilichose nthena?” ndipo ine nkhazgoranga kuti: “Yayi.” Vikawonekerangathu kuti wakunichindika. [Ŵamazaza] ŵakanifumbanga mafumbo zuŵa lose ndipo ŵakanipanga yayi chakurya. Kweni uyo tikaŵira lumoza mu selo wakanitoleranga chakurya kuti nizakarye para nafuma uko ŵakanifumbanga mafumbo. Apa ndikuti nkhatandaranga nayo yayi.

Igor Mamalimov

Chaka cha kubabikira: 1976 (Ku Ilishevsky, Republic of Bashkortostan)

Mbiri yake: Wakakulira pa famu yinyake yikuru pamoza na ŵana ŵakwake ŵaŵiri. Wakulizga chikediyoni. Wakugwira ntchito mazuŵa ghachoko waka ya umekaniki. Wakatorana na Natalya mu 2007. Ŵali na ŵana ŵatatu

Kukwambilira kwa ma 2000, wakamba kulwara ndipo mudumbu wake muchoko wakafwa, ivi vikapangiska kuti wambe kujifumba vyakukhwaskana na Chiuta, umoyo na nyifwa. Wakasanga mazgoro wati wamba kusambira Baibolo na Ŵakaboni ŵa Yehova. Wakabatizika mu 2008

Ivyo Wakayowoya

Kasi banja linu lapindura wuli mwauzimu chifukwa cha chiyezgo ichi?

Pasono tikutemwana chomene mu banja lithu ndipo ubwezi withu na Yehova wakhora chomene. Ŵana ŵithu nawo ŵaluta panthazi mwauzimu. Ŵakumutemwa chomene Yehova. . . . Ŵakuzgora mazgoro ghawemi chomene pa maungano, ndipo ŵakufumba mafumbo ghanandi ghakukondweska. . . . Ŵakulomba pafupipafupi kwa Yehova ndipo ŵakutiphalira umo Yehova wakuzgolera malurombo ghawo. Chiyezgo ichi chasintha chomene umoyo withu, ndipo waliyose mu banja lithu wapindura chomene.

Aleksandr Putintsev

Chaka cha kubabikira: 1974 (Verkhnyaya Khila, Chigaŵa cha Trans-Baikal)

Mbiri yake: Walimo yekha mu nyumba yakwawo. Wakutemwa kuŵerenga na kujambura vithuzi. Wakatorana na Galina mu 1994. Ŵakuchitira lumoza bizinesi ndipo ŵali na mwana yumoza

Mu ma 1990, wakawamo kuti uloŵevu ukwambiska masuzgo mu nthengwa yake. Wakamba kusambira Baibolo ndipo wakawona kuti umoyo wake ukusintha chifukwa cha kulondezga fundo za mu Baibolo. Wakabatizika mu 1997

Ivyo Wakayowoya

Kasi lurombo lwamovwirani wuli?

Ulendo wakwamba kunifumba mafumbo, chikaŵa chiyezgo chikuru chomene kwa ine. Nkhaŵa na wofi maseŵera cha, ndipo maghanoghano ghane ghakatimbanizgika. Nkhalomba chomene. Nkhamanyanga kuti ŵabwezi ŵane ŵanandi na ŵachibali ŵane ŵakunilombera. Nkhukumbuka kuti nkhalomba nthowa yose pakuluta uko ŵakanifumbanga mafumbo. Apo nkhaŵa mu ofesi ya wakufufuza milandu, mtima ukaŵa mu malo ndipo nkhaŵa na chigomezgo chose kuti Yehova wakunovwira. Apo ŵakanifumbanga mafumbo maulendo ghakulondezgapo, nkhaŵa na chigomezgo chikuru chomene kuti Yehova wanitayenge yayi.

Mphanyi nase tayezga chipulikano chakukhora cha ŵabali ŵithu awo nga ni Daniyeli na ŵanyake ŵatatu, ‘ŵakasimikizga mu mtima mwawo’ kuti ŵalutilirenge kugomezgeka kwa Yehova vilije kanthu kuti ŵamazaza ŵakuŵatambuzga.—Daniyeli 1:8.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI