Pa August 23, 2021, Khoti ilo lili ku Chigaŵa cha Perm, likakana apilu ya Boris, Aleksandr, Viktor, Igor, na Yuriy. Chigamuro cha pakwamba chilutilirenge kugwira ntchito.

Pa May 12, 2021, Khoti la Industrial ilo lili mu Msumba wa Perm likeruzga mulandu wa Boris, Aleksandr, Viktor, Igor, na Yuriy. Igor wakapika chilango chakuti waleke kusangikaso na mulandu kwa vyaka 7. Ŵabali ŵanyake ŵanayi ŵakapika chilango chakuti ŵaleke kusangikaso na mulandu kwa vyaka viŵiri na hafu.

Boris Burylov

• Chaka cha kubabikira: 1941 (ku Sevastopol)

• Mbiri yake: Wakakulira mu Chigaŵa cha Perm. Wali na digiri ya vya ulimi. Apo wakaŵa muchoko, amama ŵake ŵakatemwanga kumuŵerengera tuvigaŵa twa mu Baibolo. M’ma 1990, wakasanga Baibolo lanthunthu. Wakabatizika na kuŵa Kaboni wa Yehova mu 1996

Aleksandr Inozemtsev

• Chaka cha kubabikira: 1972 (ku Kostanay)

• Mbiri yake: Wakaŵa msilikari. Wagwirapo ntchito ya vya magesi, umekaniki, ndipo pasono wakugwira ntchito ya kunozga nyumba izo zanangika kweniso kusintha kawonekero kake. Wati waŵerenga kweniso kusambira Baibolo na Ŵakaboni ŵa Yehova, wakasanga mazgoro ghakukhorweska ghakulongosora chifukwa icho taŵanthu tikusuzgikira na vinthu vyambura urunji kweniso nyifwa. Wakabatizika mu 1996. Wakatorana na muwoli wake Olesya, mu 2017. Ŵali na mwana msungwana uyo wachali muchoko. Wakutemwa kudinda vithuzi, kuseŵera hockey, na kuŵeja somba

Viktor Kuchkov

• Chaka cha kubabikira: 1967 (ku Svetlitsa)

• Mbiri yake: Wakutemwa kuŵaja vinthu vyakupambanapambana kufuma waka apo wakaŵa kuti wachali muchoko. Wakasambira vya umo wangapangira vinthu vyakupambanapambana. Wakutemwa kuŵeja somba na kuseŵera volleyball. Wakatorana na muwoli wake Tanya, mu 1988. Ŵali na mwana yumoza mwanakazi. Wakamba ni kale kutemwa kusambira vyakukhwaskana na Chiuta. Mu 1993 wakabatizika na kuŵa Kaboni wa Yehova

Igor Turik

• Chaka cha kubabikira: 1968 (ku Nelidovo)

• Mbiri yake: Wakugwira ntchito ya kujambura vithuzi, kweniso ya kudinda mapulani gha nyumba. M’ma 1990, wakamba kusambira Baibolo na Ŵakaboni ŵa Yehova. Wakakhorwa wati wawona umo fundo za mu Baibolo ziliri zakukolerana. Wakabatizika mu 1998. Wakatora mu 2002 ndipo ŵali na mwana mwanalume na mwanakazi. Wakutemwa kujambura vithuzi, mavidiyo, na kunozga mawayilesi

Yuriy Vaag

• Chaka cha kubabikira: 1975 (ku Lesosibirsk)

• Mbiri yake: Wakasambira kwendeska thirakitala. Pasono wakugwira ntchito ya vya magesi kweniso kunozga nyumba izo zanangika. Apo wakaŵa ku usilikari, mudumbu wake wakamuphalirako ivyo Baibolo likuyowoya. Wati wawona umo mudumbu wake wakasinthira nkharo yake chifukwa cha kulondezga fundo za mu Baibolo, nayo wakamba kusambira Baibolo. Wakabatizika mu 1996. Wakatorana na muwoli wake Svetlana mu 1996. Ŵali na mwana mwanalume na mwanakazi

Pa September 17, 2018, ŵa Federal Security Service (FSB) na ŵamazaza ŵanyake, ŵakasecha nyumba zinandi ku Chigaŵa cha Perm. Pafupifupi nyumba 10 za ŵabali ŵithu zikasecheka. Apo ŵamazaza aŵa ŵakasechanga ŵakapoka vinthu nga ni ndalama, mafoni, na vinyake. Viktor na Igor ŵakajalirika kwa tumazuŵa ndipo kufuma apo ŵakaŵatuma pa jele la panyumba kwa myezi pafupifupi 4. Pasono, wose ŵakulondezga malango ghanyake agho ŵali kupika. Mazina ghawo ŵali kughalemba mu gulu la ŵanthu awo boma la Russia likuti “ŵakuchita vinthu vyakofya.”

Ŵabali wose aŵa ŵakulongora chikanga ndipo ŵakulutilira kuŵa ŵakukondwa nangauli ŵakusangana na masuzgo ghose agha.

Yuriy wakulongosora kuti pasono wakulomba kwa Yehova pafupipafupi. Nyengo zose iyo wakughanaghanirapo nthowa izo Yehova wakumovwilira kweniso kumukhozga. Iyo wakuti: “Mazgu gha pa Joshuwa 1:7 ghakunovwira kuti mtima uŵe m’malo. Mu mazgu agha nkhasangamo ulongozgi uwo nkheneranga kulondezga. Nakuti nkhawonanga kuti Yehova wakunovwira kweniso kunipwelelera.”

Viktor wakuti kughanaghanira vya gulu la Yehova kukamovwira kuti mtima wake uŵe m’malo pa nyengo yakusuzga iyi. Iyo wakuti: “Nkhaghanaghaniranga ukuru wa Yehova, vigaŵa vyakuwoneka na vyambura kuwoneka vya gulu lake, ubali withu wa pa charu chose, ntchito ya kupharazga iyo yikuchitika pa charu chose, na unenesko uwo tikusambira. Ivi vikanovwira kuti nileke kujighanaghanira waka nekha. Nakuti mtima ukawelera m’malo nyengo yeneyiyo.”

Wati wawelera ku nyumba kwake, Igor wakakhozgeka chomene na ivyo vikachitika. Iyo wakuti: “Apo ŵakanisunganga mu jele, mwana wane msungwana wakadinda chithuzi cha charu chiphya kuti wanikhozge. Ŵamazaza ŵakakana kuti wanipe chithuzi ichi. Muwoli wane wakati ŵalinda ŵa jele ŵakachilaŵiska chithuzi ichi kwa nyengo yitali pamanyuma na kumuwezgera mwana wane, ndipo ŵakati: ‘Ichi tingachizomerezga yayi kuno. Chikuwoneka kuti ni pulani yakovwira munthu kuchimbira mu jele.’” Mubali uyu wakulutizga kuti: “Ŵakaneneskanga nadi, charu chiphya ndicho ni ‘pulani’ [yithu] yakutovwira kuti tizizipizge vyose ivyo vikuchitika mu charu chiheni ichi!”

Tikugomezga kuti Yehova walutilirenge kovwira ŵabali aŵa na mbumba zawo na mzimu wake utuŵa. Tikumanya kuti Yehova walutilirenge kuŵapa nkhongono izo ŵakukhumbikwira.—Ŵaefeso 3:20.