Ilkham Karimov

• Chaka cha kubabikira: 1981 (ku Jomboy, Uzbekistan)

• Mbiri yake: Wakasambira vya kupanga vinthu vya magilasi. Wagwirapo ntchito zakupambanapambana kuti wapwelelere mbumba yake ku Uzbekistan. Wakasamira ku Russia mu 2000. Zuŵa linyake mu 2001, wakalomba kwa Chiuta kuti wamovwire. Zuŵa lakulondezgapo, wakasangana na Ŵakaboni ŵa Yehova ndipo wakamba kusambira Baibolo. Wakabatizika mu 2004. Mu 2012, wakatorana na muwoli wake, Yulia

Konstantin Matrashov

• Chaka cha kubabikira: 1988 (ku Prokopyevsk)

• Mbiri yake: Adada ŵake ŵakafwa apo iyo wakaŵa muchoko. Wakugwira ntchito ya umekaniki. Wakupwelelera amama ŵake, awo ŵakaŵa Kaboni wa Yehova kufuma waka apo iyo wakaŵa na vyaka 8. Wakakondwa chomene na uthenga wa mu Baibolo uwo ukupa chigomezgo. Wakabatizika mu 2018

Vladimir Myakushin

• Chaka cha kubabikira: 1987 (ku Nizhnekamsk)

• Mbiri yake: Wakamalizga masambiro pa koleji yinyake ndipo wakasambira vya uinjiniya. Wakugwira ntchito ya uinjiniya pa kampani yinyake iyo yikupanga vinthu vyakwendera magesi. Wakuzirwiska chomene fundo za mu Baibolo izo ni zavinjeru, zakupulikikwa makora, kweniso zakukolerana. Wakabatizika mu 2013. Wakatorana na muwoli wake Svetlana, mu 2017

Aydar Yulmetyev

• Chaka cha kubabikira: 1993 (ku Nizhnekamsk)

• Mbiri yake: Wakasambira vya sumu kweniso ntchito ya umekaniki. Wakuchita bizinesi kweniso umekaniki. Wakamba kusambira Baibolo wati wawona umo fundo zake zikawovwiliranga ŵapapi ŵake. Wakabatizika mu 2012. Wakatorana na muwoli wake Albina mu 2013. Wakakana kunjira usilikari chifukwa cha njuŵi yake yakusambizgika Baibolo. Wakagwira ntchito yinyake m’malo mwa kunjira usilikari

Pa May 27, 2018, ŵamazaza ku Tatarstan ŵakasecha nyumba 10 za Ŵakaboni ŵa Yehova ndipo ŵakajalira Mubali Ilkham, Konstantin, Vladimir, na Aydar. Waliyose ŵakamusunga mu jele kwa mazuŵa ghakujumpha 160 pambere ŵandaŵatume pa jele la panyumba.

Nangauli pasono ŵali kufumiskika pa jele la panyumba, waliyose ŵali kumuŵika mu gulu la ŵanthu awo boma la Russia likuti ŵakuchita “vinthu vyakofya” ndipo khoti lili kuŵakanizga kufuma mu chigaŵa icho ŵakukhala. Ivi vili kupangiska kuti ŵaŵajalire ma akaunti ghawo gha ku banki ndipo ntchakusuzga kuti ŵasange ntchito.

Para wakukumbuka umo vinthu vikaŵira apo ŵakasungikanga mu jele, Aydar wakuti: “Nkhakumbukanga mavesi ghanandi chomene gha mu Baibolo. . . . Yehova wakanovwira kuti nikumbukenge vinthu vinandi ivyo panekha mphanyi nkhakumbuka yayi.”

Apo Konstantin wakanjiranga waka mu jele umo ŵakamusunga, wofi ukamukora chomene. Kweni mwaluŵiro wakaleka kuchita wofi na kwamba kuŵika maghanoghano ghake pa kugwiliskira ntchito nyengo iyi kuti wapharazgire ŵalaraŵalara ŵa khoti, ŵalinda ŵa jele, ŵakayidi ŵanyake, ŵapolisi na ŵanji. Nakuti mubali uyu wakuti: “Apo nkhasungika mu jele ndipo nkhaŵa na mwaŵi ukuru wakupharazga kuluska apo nkhaŵa kuti nindakakike. Nkhajipulika nga mpositole Paulosi uyo wakalemba pa Ŵafilipi 1:12, 13, kuti: ‘Ŵabali, sono nkhukhumba kuti mumanye kuti ivyo vyanichitikira vyawovwira kuthandazga makani ghawemi. Ŵasilikari wose ŵa Themba na ŵanyake wose ŵakumanya kuti nili kukakika chifukwa cha Khristu.’”

Vladimir wakawonga chomene wovwiri uwo ŵabali na ŵadumbu ŵakamupa. Iyo wakuti: “Muwoli wane wakaniphalira kuti kanandi ŵabali na ŵadumbu ŵakamupanga ndalama zakuti wakagulire vinthu vyakuti wanitumire. Ku jele uko ŵakanisunganga ŵakuŵika mphaka pa unandi wa vinthu ivyo ukwenera kupokera pa mwezi, ndipo kanandi ine nkhafikanga pa mphaka iyo ŵakaŵika.”

Ilkham wakulongosora umo ubwezi wake na Yehova wakholera. Iyo wakuti: “Chifukwa cha mulandu uwo ŵakanipa, nkhaŵa pafupi chomene na Adada ŵane ŵa kuchanya. Pasono nkhuŵagomezga chomene ndipo nyengo zose nkhuthemba iwo. Malurombo ghane nawo ghakamba kuŵa ghatali, gha ng’anamuro, kweniso ghakufumira pasi pa mtima.”

Tikumanya kuti ŵabali aŵa na mbumba zawo ŵatumbikikenge chifukwa cha kusopa “chiuta mwakukwana na kuŵikapo mtima” mu nyengo yakusuzga iyi.—1 Timote 2:2.