Yuriy Belosludtsev

• Chaka cha kubabikira: 1964 (Smidovich, ku Chigaŵa cha Jewish Autonomous)

• Mbiri yake: Wakalereka na abuya ŵake mu muzi unyake uchoko waka. Wakaŵa injiniya pa kampani yinyake ya vyamagesi. Wakutemwa kuŵeja somba na kuseŵera mu chiwuvi

  Wakatorana na muwoli wake Yelena mu 1985. Wose ŵakakhorwa na layizgo la Chiuta lakuti wazamuwuskapo uheni na masuzgo ghose. Wose ŵakazizikika na kufiskika kwa mauchimi gha mu Baibolo. Ivi vikapangiska kuti ŵazomere kusambira Baibolo. Ŵakabatizika mu 1994

Sergey Sergeyev

• Chaka cha kubabikira: 1955 (Dukhovnitskoye, ku Chigaŵa cha Saratov)

• Mbiri yake: Wakagwiranga ku mugodi wa malasha mpaka apo wakapumulira ntchito. Wakatorana na muwoli wake Nelly, mu 1991. Ŵali na ŵana ŵaŵiri ŵasungwana na munyamata yumoza. Wose ŵakutemwa chomene ntcheŵe

  Ŵakamba kusambira Baibolo pati pajumpha nyengo yichoko waka kufuma apo ŵakatolerana. Ŵakakhorwa na mauchimi gha mu Baibolo agho ngaunenesko kweniso muli ulongozgi wakovwira. Ŵakabatizika mu 1996

Pa March 17, 2019, ŵa Federal Security Service (FSB) ŵakasecha nyumba zinandi za Ŵakaboni ŵa Yehova ku Luchegorsk, mu Chigaŵa cha Primorye. Ŵabali na ŵadumbu ŵakafumbika mafumbo, ndipo ŵanyake ŵakafumbikanga kwa maora pafupifupi 7. Pamanyuma Yuriy na Sergey ŵakaŵajalira mu selo.

Pati pajumpha mazuŵa ghaŵiri, wose ŵaŵiri ŵakaŵatuma ku jele uko ŵakakaŵasunga kwa myezi yakujumpha 6. Ŵati ŵaŵafumiska mu September 2019, ŵakakhala pa jele la panyumba kwa myezi pafupifupi 5.

Wose ŵakuyowoya kuti lurombo lukaŵawovwira kuti ŵalutilire kuzizipizga apo ŵakasungikanga mu jele. Sergey wakutiso Baibolo likamovwira kuti wawonenge vinthu mwakwenelera. Iyo wakuti: “Nkhakumbuka mazgu gha Yesu ghakuti: ‘Usange ŵakanitambuzga ine, ŵatambuzgenge na imwe wuwo.’ (Yohane 15:20) Mu mtima nkhati: ‘Oh! Vyose ivyo vikutichitikira vikachitikiraso Yesu Khristu, ŵasambiri ŵake, na ŵapositole. Ntchakuwonekerathu kuti Yehova wakugomezga kuti nane ningachitira ukaboni pa nyengo iyi.’ Maghanoghano agha kweniso chifukwa chakuti Yehova wakazgoranga malurombo ghane, vikanikhozga na kunovwira kuti mtima uŵe m’malo.”

Yuriy wakuti pakwamba wakasuzgikanga kuti waŵerengenge Baibolo zuŵa lililose. Mubali munyake wakamovwira kuti wafiske kuŵerenga Baibolo zuŵa lililose. Ivi vikamovwira chomene apo wakaŵa mu jele umo ŵakamusunganga. Iyo wakuti, “Nkhakumbukanga viyelezgero vya mu Baibolo kweniso vya mu mabuku ghithu, ivyo nkhaŵerenga kumasinda. Ivi vikanovwira kuti nisange nkhongono kweniso kuti niŵe wakukondwa. Vikanovwiraso kuti nileke kwenjerwa chomene.”

Tikulomba ndipo tili na chigomezgo chose kuti Yehova walutilirenge kuŵa ‘chiphokwero na nkhongono’ ku ŵabali na ŵadumbu ŵithu ŵa ku Russia mu “nyengo ya suzgo” iyo ŵakujumphamo.—Salimo 46:1.