SEPTEMBER 23, 2021
RUSSIA

YASONO—KHOTI LAKANA APILU | Ŵadumbu 6 na Mubali Yumoza, Ŵakuthemba Yehova Kweniso Ŵakhristu Ŵanyawo Apo Khoti Likutegherezga Mulandu Wawo

JULANI

Pa September 26, 2022, khoti la ku Chigaŵa cha Primorye likakana apilu ya Mudumbu Nadezhda Anoykina, Lyubov Galaktionova, Nailya Kogay, Nina Purge, Raisa Usanova, na Mubali Valentin Osadchuk. Pasono ŵaŵajalirenge mu jele yayi.

Pa June 1, 2022, khoti la Leninskiy ilo lili ku Vladivostok likati Mudumbu Nadezhda Anoykina, Lyubov Galaktionova, Nailya Kogay, Nina Purge, Raisa Usanova, Yelena Zayshchuk, na Mubali Valentin Osadchuk, ŵali na mulandu. Nadezhda, Lyubov, Nailya, Nina, na Raisa waliyose wakapika chilango chakuti waleke kusangikaso na mulandu kwa vyaka viŵiri. Valentin wakapika chilango chakuti waleke kusangikaso na mulandu kwa vyaka 6. Pasono ŵamuŵajalira mu jele yayi. Mulandu wa mudumbu Yelena Zayshchuk uyo ngwa vyaka 87, ŵali kuwumazga chifukwa ni mulwari chomene.

Nyengo

January 19, 2021

Mulandu ŵakawulutiska ku khoti la Leninskiy ilo lili ku Vladivostok
November 12, 2019

Mulandu ukawelera ku ofesi ya wakwimira boma pa milandu
April 5, 2019

Valentin wakafumiskika mu jele umo ŵakamusunganga wati wakhalamo mazuŵa 274, ndipo wakaŵa yekha mubali uyo wakakhwaskika na mulandu uwu. Wakatumika pa jele la panyumba
April 19, 2018

Ŵa Federal Security Service (FSB) ŵakasecha nyumba za Ŵakaboni ŵa Yehova 7
April 9, 2018

Dipatimenti Yakufufuza Milandu ya ŵa FSB ku Chigaŵa cha Primorsky yikamba kufufuza mulandu Valentin na ŵadumbu 6

Vyakukhwaskana na ŵanthu aŵa

Lyubov Galaktionova

Chaka cha kubabikira: 1942 (Vladivostok)

Mbiri yake: Wakagwiranga ntchito ya usekilitare m’paka apo wakapumulira. Wakatengwa mu 1962. Mfumu wake wakafwa ŵati ŵakhala vyaka 14 mu nthengwa. Walera yekha mwana wake mwanalume. Chifukwa chakuti walwaranga pafupipafupi kwa vyaka vinandi, vyapangiska kuti waŵe wakupendera

Wakajifumbanga chifukwa icho tiliri na umoyo kweniso chifukwa icho ŵanthu ŵakufwira. Wakasanga mazgoro ghakupembuzga gha mafumbo ghake wati wamba kusambira Baibolo na Ŵakaboni ŵa Yehova. Wakabatizika mu 1998

Ivyo Wakayowoya

Kasi ni vinthu wuli ivyo mwalombanga kwa Yehova mu nyengo yakusuzga iyi?

Nkhalomba kuti wanovwire kuti mtima uŵe m’malo. Nkhamupempha Yehova kuti wanovwire kuŵa wakujiyuyura mwakuti nichitenge vinthu mwamahara nangauli nkhusangana na vinthu vyambura urunji. Nkhalombaso kuti wanipe nkhongono zakuzizipizgira nthambuzgo iyi.

Nailya Kogay

Chaka cha kubabikira: 1951 (Tashkent, Uzbekistan)

Mbiri yake: Wali na ŵadumbu ŵake ŵaŵiri. Apo wakaŵa muchoko wakatemwanga kuchita maseŵera ghakupambanapambana. Wati wafuma ku koleji, wakamba kugwira ntchito ya uinjiniya. Pasono wali kupumura. Wakatengwa kwa Robert, mu 1975. Wali na ŵana ŵaŵiri. Mu 1989, Robert ŵakamusanga na suzgo ilo likukhumba kuti munthu munyake wamupwelelerenge nyengo zose. Wakasamira ku Vladivostok mu 2003

Wakakhorwa kuti Baibolo ni Mazgu gha Chiuta wati wamba kusambira Baibolo na Ŵakaboni ŵa Yehova. Wakakondwa chomene kuwona kuti Baibolo ndakukolerana kweniso kumanya kuti Chiuta wakutitemwa. Wakabatizika mu 1997

Ivyo Wakayowoya

Kasi ghalipo mazgu ghakukhozga agho mubali panji mudumbu mu mpingo winu wali kumuphaliranipo ndipo ghakamovwirani kuzizipizga chiyezgo ichi?

Ŵadumbu ŵanandi ŵakuyowoya kuti: ‘Ndimwe chiyelezgero chiwemi chomene kwa ise. Nakuti mukutinothiska. Usange imwe mukufiska kuzizipizga nthambuzgo iyi, nase mbwenu tingafiska!’

Valentin Osadchuk

Chaka cha kubabikira: 1976 (Ukraine)

Mbiri yake: Wakugwira ntchito yakuwona vya malonda. Wakumanyikwa kuti ni munthu wakugomezgeka, wakulimbikira, na waluso chomene. Wakutemwa kutembeya kuwaro kwa nyumba yake

Wakabatizika na kuŵa Kaboni wa Yehova mu 1998

Ivyo Wakayowoya

Kasi ubwezi winu na Yehova wakura wuli chifukwa cha chiyezgo ichi?

Najiwonera nekha woko la Yehova kweniso umo ŵabali ŵanovwilira pa nyengo iyi. . . . [Mwachiyelezgero,] ningati kumasinda uku nkhamanyanga ivyo ni vinthu vyakuzirwa chomene: nga kuleka kopa kukhala kutali na ŵachibali ŵane, kutaya katundu wane, panji kopa kuti ŵanthu ŵaniwonenge wuli. Ndipouli pasono apo nili mu jele ndipo vinthu ivi vikunichitikira nadi, [najiwonera nekha umo] Chiuta wane Yehova wanovwilira mu nthowa yapadera.

Nina Purge

Chaka cha kubabikira: 1940 (Pesok, Chigaŵa cha Pskov)

Mbiri yake: Wali na mudumbu wake uyo ni muchoko kwa iyo. Wakaŵa mwana apo Nkhondo Yachiŵiri ya pa Charu Chose yikachitikanga. Mu 1942, ŵasilikari ŵa ku Germany ŵakapoka muzi wawo. Mbumba yakwawo yikapona mwamwaŵi chomene kuti yileke kukomeka na chipani cha Nazi

Wakatengwa kwa mfumu wake apo wakaŵa wachali kusambira ku Estonian Maritime Academy. Ŵali na ŵana ŵaŵiri. Mbumba yawo yikasamira ku Vladivostok, uko mfumu wake wakatumika kuti wakagwilirenge ntchito

Kuumaliro kwa ma 1990, wakamba kusambira Baibolo na Ŵakaboni ŵa Yehova. Wakasambira kuthemba Chiuta nyengo zose kuti wamovwire. Wakabatizika mu 1999

Ivyo Wakayowoya

Kasi ubwezi winu na Yehova wakhora wuli mu nyengo yakusuzga iyi?

Nkhamba kumuthemba chomene Yehova. Nkhamupempha kuti wanipe nkhongono zakunovwira kuzizipizga m’paka paumaliro kweniso kuti nilutilire kugomezgeka. Nakuti lemba la Yesaya 41:13 lanovwira kuti niŵe na chikanga, chifukwa nkhujipulika kuti Adada ŵane ŵakuchanya ŵanikora pawoko. Ndine wakunozgeka kupokelera chilichose icho khoti lidumurenge.

Raisa Usanova

Chaka cha kubabikira: 1947 (Kuznetsovo)

Mbiri yake: Wali na ŵadumbu ŵake ŵatatu kweniso munung’una wake. Wati wamalizga sekondare, wakasamira ku Vladivostok kuti wakasambire vya kunozga njanji. Ngwakutengwa ndipo wali na ŵana ŵanakazi ŵaŵiri. Wagwira ntchito ya udilayivara kwa vyaka 25. Pasono wali kupumura

Mu 2000, pamanyuma pakuti amama ŵake, mwana wakwake, na mudumbu wake ŵafwa, wakamba kujifumba chifukwa icho ŵanthu ŵakufwira kweniso usange pali chilindizga chilichose cha ŵakufwa. Wakasanga mazgoro ghakukhorweska kweniso ghakupulikikwa makora wati wamba kusambira Baibolo na Ŵakaboni ŵa Yehova. Wakabatizika mu 2002

Ivyo Wakayowoya

Kasi mwasambira vichi pa nyengo iyi, icho chamovwirani kunozgekera nthambuzgo munthazi?

Nasambira kujikora, chomene pa nkhani ya kayowoyero, kweniso kuzizipizga na kuthemba chomene Yehova. Nkhamba kusambira chomene Baibolo. . . . Nkhukhumba nilutilire kugomezgeka m’paka paumaliro.

Kasi mwanozgekera wuli nthambuzgo za munthazi?

[Nkhuŵikapo mtima kuti] nighanaghanirengepo mavesi ghanandi na chilato chakuti mzimu uzakanovwire ‘kughakumbuka’ pa nyengo iyo njakwenelera.—Yohane 14:26.

Tikulutilira kukhozgeka na chiyelezgero chiwemi cha ŵabali na ŵadumbu ŵithu ku Russia. Iwo ŵakulongora nadi kuti ni mtundu uwo uli na chipulikano cha kusungilira umoyo.—Ŵahebere 10:39.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI