Yuriy Geraskov

• Chaka cha kubabikira: 1956 (ku Azerbaijan)

• Deti ilo wakafwira: April 24, 2020

• Mbiri yake: Wakatemwanga kutimba bola la malundi na kujambura. Wakimbanga mu gulu la kwimba na ving’wenyeng’wenye. Wakasamukira ku Russia mu 1993 chifukwa cha masuzgo gha ndyali agho ghakaŵa ku Azerbaijan. Wakatorana na Alevtina mu 2011. Ndipo wakabatizika na kuŵa Kaboni wa Yehova mu chaka chenechichi. Apo wakaŵa wamoyo, iyo na muwoli wake ŵakatemwanga kwenda kweniso kukawona ŵabwezi ŵawo

Maksim Khalturin

• Chaka cha kubabikira: 1974 (ku Kirov, Chigaŵa cha Kirov)

• Mbiri yake: Apo wakaŵa mwana, wakamba kutemwa chomene vya kuŵerenga. Mu 1993, wakamba kusambira Baibolo. Wakabatizika na kuŵa Kaboni wa Yehova mu 1995. Wakupwelelera ŵapapi ŵake ŵachekuru. Ŵapapi ŵake ŵakuchindika ivyo iyo wakugomezga nangauli iwo mbachisopa chinyake

Vladimir Korobeynikov

• Chaka cha kubabikira: 1952 (pa Chilwa cha Dikson, Chigaŵa cha Krasnoyarsk)

• Mbiri yake: Adada ŵake wakaŵa ŵasayansi ndipo ŵakasambira chomene vyakukhwaskana na arctic ocean. Apo wakaŵa muchoko, Vladimir wakatemwanga kupanga vinthu vyakupambanapambana. Wakagwiranga ntchito ya upulambara kweniso ya kwendeska mashini. Pasono wali kupumura ntchito ndipo wakutemwa kuŵeja somba

  Iyo na muwoli wake, Olga, ŵakamba kusambira Baibolo na Ŵakaboni ŵa Yehova cha m’ma 1990. Ŵakakondwa chomene ŵati ŵasambira mauchimi gha mu Baibolo. Wakabatizika mu 1996. Fundo za mu Baibolo zikakhozga chomene ŵanthu ŵa mu banja lawo, kusazgapo mwana wawo mulara munyamata na msungwana kuti ŵaŵe ŵakukondwa

Andrzej Oniszczuk

• Chaka cha kubabikira: 1968 (ku Białystok, Poland)

• Mbiri yake: Apo wakaŵa mwana wakatemwanga chomene kuseŵera bola la malundi na kunyamura maweti. Wakabatizika mu 1990. Wakasamukira ku Kirov mu 1997. Wakutemwa chomene mabuku gha chiyowoyero cha ku Russia. Wakatorana na Anna mu 2002. Ŵakutemwa kukhala pawaro pa tumphepo tuwemi, kupenja wowa (nkhowani), kweniso kuseŵera bola la malundi

Andrey Suvorkov

• Chaka cha kubabikira: 1993 (ku Kirov, Chigaŵa cha Kirov)

• Mbiri yake: Amama ŵake ŵakamusambizga unenesko kufuma waka apo wakaŵa muchoko. Apo wakaŵa mwana, wakatemwanga kusambira vya sayansi na kuchita maseŵero, chomenechomene volleyball. Wakabatizika na kuŵa Kaboni wa Yehova mu 2007. Wakagwiranga ntchito ku malo uko ŵakovwira ŵanthu awo ŵakugwiliskira ntchito munkhwala wakuzweteska wongo m’malo mwa kukagwira ntchito ya usilikari. Wakatorana na muwoli wake Svetlan mu 2016. Ŵakutemwa maseŵero ghakupambanapambana

Yevgeniy Suvorkov

• Chaka cha kubabikira: 1978 (ku Kumyony, Chigaŵa cha Kirov)

• Mbiri yake: Apo wakaŵa mwana wakatemwanga chomene kuseŵera tchesi (chess), hockey na kupulikizga sumu. Wakugwira ntchito ya vya magesi. Wakamba kusambira Baibolo na Ŵakaboni ŵa Yehova apo wakaŵa na vyaka 16. Wakabatizika mu 1995. Wakapempha kuti wagwirenge ntchito yinyake padera pa usilikari apo wakaŵa na vyaka 18. Wakazomerezgeka kugwira ntchito zinyake pamanyuma pakupempha maulendo ghakukwana 6. Wakatorana na Svetlana mu 2000 ndipo ŵakalelera lumoza mwana wawo munyamata, Andrey (uyo tamuzunura pachanya)

Vladimir Vasilyev

• Chaka cha kubabikira: 1956 (ku Perm)

• Mbiri yake: Apo wakaŵa mwana wakatemwanga kuseŵera bola la malundi. Wakagwiranga ntchito ya upulambara kweniso wakaŵa dilayivala. Pasono wali kupumura ntchito. Iyo na muwoli wake, Nadezhda, ŵakamba kusambira Baibolo na Ŵakaboni ŵa Yehova cha m’ma 1990. Wakabatizika mu 1994

Pa October 9, 2018, ŵamazaza ŵakasecha nyumba 14 za Ŵakaboni ŵa Yehova ku Kirov. Pamanyuma ŵakakaka Mubali Maksim Khalturin, Vladimir Korobeynikov, Andrzej Oniszczuk, Andrey Suvorkov, na Yevgeniy Suvorkov. Kufuma apo ŵakaŵasunga dankha mu jele kulindilira kuti mulandu wawo weruzgike. Mu January na July 2019, Mubali Vladimir Vasilyev na Yuriy Geraskov nawo ŵakati ŵali na mulandu.

Vladimir Korobeynikov ŵakamusunga mu jele kwa myezi yakujumpha yiŵiri. Ŵakamufumiska pa jele la pa nyumba kuti wapwelelere makora muwoli wake uyo ni mulwari kweniso mwana wake msungwana. Maksim na Andrey ŵakasungika mu jele kwa myezi yakujumpha yitatu. Yevgeniy ŵakamusunga mu jele pafupifupi myezi 5. Andrzej ŵakamusunga mu jele kwa mazuŵa 327. Ŵanandi mwa ŵabali aŵa ŵakaŵatuma pa jele la panyumba. Pasono ŵali kuŵafumiska pa jele la panyumba kweni ŵachali kuŵakanizga kufumamo mu vigaŵa vyawo.

Apo ŵakaŵa ku jele uko ŵakaŵasunganga, chikaŵa chakusuzga ku ŵabali aŵa kutalikirana na mabanja ghawo. Kweni ŵakaŵa na chigomezgo chose kuti Yehova waŵawovwirenge ŵakutemweka ŵawo.

Mwachiyelezgero, muwoli wa Mubali Vladimir Korobeynikov, Olga, ngwakupendera. Mubali Vladimir wakulongosora kuti: “Chinthu chakusuzga chomene chikaŵa chakuti, nkhaleka muwoli wane uyo wakakhumbikwiranga wovwiri.” Mubali uyu wakutiso ŵaboma ŵakatolera lumoza foni ya muwoli wake apo ŵakasechanga mu nyumba yawo. Ivi vikamufipiskanga chomene mtima Vladimir m’paka apo wakapokera kalata kufuma kwa mudumbu munyake mu mpingo wawo, uyo wakamusimikizgira kuti ŵabali na ŵadumbu ŵakumupwelelera muwoli wake. Pamanyuma wakapokera kalata yakukhozga kufuma kwa muwoli wake Olga, kuti iyo wali makora.

Umoyo ngwakusuzga ku ŵabali aŵa chifukwa ŵangafumamo yayi mu chigaŵa chawo kweniso ŵakuŵapa mulandu wakuti ‘ŵakuchita vinthu vyakofya’. Mwachiyelezgero, ntchakusuzga ku ŵabali aŵa kusanga ntchito. Kweniso ŵangatora yayi ndalama ku maakaunti ghawo gha ku banki.

Ndipouli, Yevgeniy wakuti: “Yehova wakupeleka chilichose icho tikukhumbikwira. Nga umo vikaŵira na Ŵaisrayeli mu mapopa, nase tikusoŵerwa kanthu yayi. Tikujiwonera tekha umo ŵanthu ŵa Yehova ŵakovwilirana mwakuthupi kweniso mwauzimu.”

Ŵabali aŵa ŵakuti lurombo, kusambira paŵekha, na kuŵerenga Baibolo, vikaŵawovwira chomene kuti ŵalutilire kugomezgeka kweniso kuti ŵaŵe na chikanga. Mwachiyelezgero, Vladimir Vasilyev wakulongosora kuti: “Vinthu ivyo vikulongosoreka mu Baibolo vikutovwira kupulikiska kuti Yehova wali na nkhongono za kuchitira chilichose icho wakukhumba. Ntheura chipulikano chithu mwa Chiuta chikakura ndipo tikamba kumugomezga chomene.”

Nangauli mulandu uwo ŵali kuŵapa wapangiska umoyo kuŵa wakusuzga ku ŵabali ŵithu ŵakutemweka aŵa na mabanja ghawo, kweni tikumanya kuti ŵalutilirenge kugomezga Yehova. Ŵakulutilira kuzizipizga, pakumanya kuti “munthu” wangapangiska vyakuŵinya vya muyirayira yayi.—Salimo 56:4.