Pa November 25, 2021, Khoti la ku Chigaŵa cha Jewish Autonomous likakana apilu ya Mubali Yevgeniy. Chigamuro icho wakapika pakwamba chindasinthe. Pasono ŵamujalirenge mu jele yayi.

Pa June 21, 2021, Khoti la Birobidzhan ilo lili ku Chigaŵa cha Jewish Autonomous likati Mubali Yevgeniy Yegorov wali na mulandu, ndipo wakeruzgika kuti waleke kusangikaso na mulandu kwa myezi 30. Pasono wamujalirika mu jele yayi.

Yevgeniy Yegorov

• Chaka cha kubabikira: 1991 (ku Birobidzhan)

• Mbiri yake: Wakalereka na amama ŵake kweniso abuya ŵake. Wakasambira vya magesi. Wakugwira ntchito ya kupanga na kunozga maloko. Wakutemwa kuŵerenga na kulemba. Wali kulemba buku na mapowemu ghanandi. Wakabatizika na kuŵa Kaboni wa Yehova mu 2005. Wakatorana na muwoli wake Kseniya mu September 2019. Ŵali na mwana mwanalume uyo wakababika mu August 2020

Mu May 2018, ŵa Federal Security Service (FSB) ŵakasecha nyumba zinandi za Ŵakaboni ku Birobidzhan. Kwati kwakhala pachoko waka kuti wachite ukwati, Yevgeniy wakapika mulandu chifukwa cha chipulikano chake kweniso kuŵerenga Baibolo. Wakakanizgika kwenda kufuma mu chigaŵa icho wakakhalanga. Amama ŵa Yevgeniy, a Larisa Artamonova, nawo ŵakapika mulandu mwana wawo wati wachita waka ukwati. Mu December 2019, ŵakamba kutegherezga mulandu wa Yevgeniy ku Khoti la Birobidzhan.

Yevgeniy wakuti pasono wakujipulika kuti wali pafupi chomene na Yehova. Iyo wakuti: “Pa nyengo yakusuzga chomene, Yehova wakanovwira kuti mtima wane uŵe m’malo ndipo wakanipa ‘nkhongono zakuluska zakawiro.’”—2 Ŵakorinte 4:7.

Nangauli Yehova wakumovwira, kweni Yevgeniy wakumanya kuti wakwenera kunozgekereska mtima wake na maghanoghano ghake kweniso kulutilira kuŵa pa ubwezi wakukhora na Yehova. Iyo wakuti: “Kwa ine, nkhuwona kuti chinthu chakuzirwa nkhukhozga ubwezi wane na Yehova, vilije kanthu kuti kwali vinthu vili wuli pa umoyo.”

Nangauli ŵakusangana na masuzgo ghose agha, kweni tikugomezga kuti Yevgeniy na Kseniya, pamoza na ŵabali na ŵadumbu ŵithu ku Russia, ŵasangenge nkhongono mu mazgu ghakukhozga gha pa Salimo 10:17: “Kweni imwe, A Yehova, mupulikenge pempho la ŵakuzika. Mukhozgenge mitima yawo na kutegherezga kwa iwo.”