DECEMBER 23, 2021
RUSSIA

YASONO—KHOTI LASINTHA CHIGAMURO | Vinthu Ivyo Yehova Wakutipa Vikovwira Banja la Postnikov Kuti Liŵe na Mtende wa mu Mtima

JULANI

Pa October 11, 2022, Khoti la ku Chigaŵa cha Jewish Autonomous likasintha chigamuro pa mulandu wa Mubali Oleg Postnikov na Mudumbu Agnessa Postnikova. Pasono mulandu wawo wamweruzgikaso.

Nyengo

Khoti la Birobidzhan ilo lili ku Chigaŵa cha Jewish Autonomous lipelekenge chigamuro chake sonosono apa pa mulandu wa Mubali Oleg Postnikov na Mudumbu Agnessa Postnikova. Wakwimira boma pa milandu wachali wandapemphe chilango icho ŵangapika
February 12, 2021

Ŵa FSB ŵakamujulira mulandu Agnessa. Iyo pamoza na mfumu wake ŵakupika mulandu wakwambiska kagulu “kakofya” na kuphalira ŵanthu vyakukhwaskana na vilato vyawo “vyakofya.” Oleg na Agnessa ŵakakanizgika kufuma mu chigaŵa icho ŵakakhalanga ndipo ma akaunti ghawo gha ku banki ŵakaŵajalira, kweniso mazina ghawo ghakalembeka mu gulu la ŵanthu awo boma la Russia likuti ni vigeŵenga
February 12, 2020

Ŵa FSB ŵakamujulira mulandu Oleg

Vyakukhwaskana na ŵanthu aŵa

Oleg Postnikov

Chaka cha kubabikira: 1965 (Vyazemsky, Chigaŵa cha Khabarovsk)

Mbiri yake: Wakagwirapo ntchito ya upulambara. Apo wakaŵa munyamata wakajoyina kagulu kanyake kachiwawa. Wakajalirika mu jele chifukwa cha kupalamura mulandu. Wakasambira vinandi vyakukhwaskana na uthenga wa mu Baibolo apo wakaŵa mu jele mwenemumo. Wati wafumiskika, wakabatizika na kuŵa Kaboni wa Yehova mu 1986

Mu 1989, wakatorana na Agnessa. Ŵali na ŵana ŵaŵiri ŵalaraŵalara

Ivyo Wakayowoya

Kasi vikenda wuli kuti musambire unenesko apo mukaŵa mu jele?

Pakaŵa Kaboni munyake uyo wakajalirika mu jele chifukwa cha kukana kunjira usilikari. . . . Tikadumbiskana kwa nyengo yitali vyakukhwaskana na ukaboni wakulongora kuti Chiuta waliko, kweniso kuti chisambizgo chakuti vinthu vikachita kusintha ntchautesi. Tikadumbiskanaso vinthu vyakusuzga kuvipulikiska vyakukhwaskana na chilengiwa kweniso umo chikaŵirako. Vyose ivyo tikadumbiskana vikasintha chomene kaghanaghaniro kane. . . . Kufuma apo, nkhaŵerenga mabuku ghakupambanapambana gha Ŵakaboni ŵa Yehova. . . . Nati nafumiskika mu jele, nkhakalutizga kusambira pamanyuma na kubatizika.

Kasi mwasambira vichi pa nkhani ya kuthemba Yehova?

Nkhamba kulomba chomene, chomene para nkhuluta kukawonana na uyo wakafufuzanga mulandu wane. Ivyo vikachitikanga para naluta kukawonana na uyo wakafufuzanga mulandu wane vikalongolerathu pakweru kuti panekha mphanyi nkhafiska yayi kuleka kupusikika na njomba izo wakagwiliskiranga ntchito na chilato chakuti wanitayiske chipulikano chane. Nkhawamo kuti para nkhukhumba kuti mtima wane uŵe mu malo kweniso wachikanga, nkhwenera kuthemba chomene Yehova na kuleka kufipa mtima mwakujumphizga na ivyo vichitikenge.

Kasi lilipo lemba ilo mukuwona kuti likumukhozgani chomene?

Kanandi nkhutemwa kukumbuka mazgu agho ghali pa Joshuwa 1:9: “Yehova Chiuta wako wali nawe kulikose uko ukuya.” Fundo iyi yikunikumbuska kuti vingachitika kuti nilute ku malo ghanyake uko panji ningatemwako yayi. Ndipouli, Yehova wakunisimikizgira kuti: ‘Kufipa mtima yayi, Ine nilutenge nawe. Nga ni umo nkhalutira na Yosefe, nawe nilutenge nawe.’ Layizgo ili likunovwira kuti nileke kwenjerwa na ivyo vichitikenge machero. Likunovwiraso kuti nileke kughanaghana vinthu vyakugongoweska.

Agnessa Postnikova

Chaka cha kubabikira: 1963 (Kazakhstan)

Mbiri yake: Ngwa nambara 5 pa ŵana 7. Apo wakaŵa mwana wakatemwanga kuvina na kuchita madirama. Wakutemwaso kuseŵera mu chiwuvi na kutelemuka mu maji ghakukhoma. Pasono wakutemwa kwenda mu charu chawo, kupwelelera maluŵa na kutembeya. Wakaŵapo telara

Wakabatizika mu 1979. Wakatengwa kwa Oleg mu 1989

Ivyo Wakayowoya

Kasi mwawovwirika wuli mu nyengo yakusuzga iyi?

Nkhukhumba kuwonga chomene Wupu Wakulongozga chifukwa cha kunozga chakurya chauzimu pa nyengo yake. Nkhuwongaso ŵabali na ŵadumbu awo ŵakovwirapo pa kunozga sumu, madirama, mavidiyo, maungano gha chigaŵa, na kung’anamura Mabaibolo ghasono. Nkhuwonga chomene Yehova chifukwa cha mbumba yapadera na yachitemwa iyo yikunikhozga mu nyengo yakusuzga iyi.

Kasi ni vinthu wuli vyakufuma kwa Yehova ivyo vyamovwirani chomene?

Nkhusanga mtende para nalomba kwa Yehova na kughanaghanirapo fundo izo zili mu sumu nga, ‘Charu Chiphya Icho Chizenge’ na ‘Dziko Latsopano Lili Pafupi.’ Sumu izi zikuyowoya vyakukhwaskana na charu chiphya. Ivi vikunovwira kuti mtima uŵe mu malo, ndipo nkhuwona kuti Adada ŵakuchanya ŵakunitemwa.

Ivyo vikuchitikira ŵabali ŵithu aŵa, mbukaboni wakuti Yehova wakuŵanozgekereska ŵanthu ŵake kuti ŵatondenge viyezgo vyakupambanapambana ivyo ŵangakumana navyo. Mphanyi tose talutilira kuthemba ‘chitemwa chakugomezgeka cha Yehova na kugomezgeka kwake.’—Salimo 115:1.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI