NOVEMBER 4, 2022
RUSSIA

YASONO—KHOTI LATI MBUMBA YILI NA MULANDU | Ŵakukhozgeka na Viyelezgero vya mu Baibolo

JULANI

Pa November 8, 2022, Khoti la Petropavlovsk-Kamchatskiy ilo liri ku Chigaŵa cha Kamchatka, likati Mubali Dmitriy Semenov na muwoli wake, Nadezhda ŵali na mulandu. Wose wakapika chilango chakuti ŵaleke kusangikaso na mulandu unyake kwa vyaka vinayi. Pasono ŵamuŵajalira mu jele yayi.

Nyengo

September 3, 2021

Mwanakazi munyake uyo wakasambizgikanga Baibolo na Dmitriy na Nadezhda wakamba kukolerana na ŵa FSB. Kutolera pa ivyo wakaphara, mbwenu ŵamazaza ŵakaŵajulira mulandu Dmitriy na Nadezhda. Ŵakati ŵali na mulandu wakunyengelera ŵanthu kuti ŵajoyine gulu ilo likuchita vinthu vyakofya ndipo nawoso ŵakuchitako milimo ya gulu ili
September 6, 2021

Nyumba yawo ŵakayisecha. Ŵakaŵatora kukaŵafumba mafumbo ndipo pamanyuma ŵakaŵakanizga kwenda kufuma mu chigaŵa icho ŵakakhalanga
July 26, 2022

Khoti likamba kutegherezga mulandu wawo

Vyakukhwaskana na ŵanthu aŵa

Dmitriy Semenov

Chaka cha kubabikira: 1984 (Petropavlovsk-Kamchatskiy)

Mbiri yake: Wakasambira vya masamu na sayansi ya kompyuta. Wakugwira ntchito ya kupanga mapulogiramu gha pa kompyuta

Wakapulika vya Ŵakaboni ŵa Yehova kwa mubali wake munyake. Wakabatizika mu 2006. Wakagwira ntchito yinyake ya boma m’malo mwa kunjira usilikari

Wakatorana na Nadezhda mu 2010

Ivyo Wakayowoya

Kasi ntchiyelezgero cha njani cha mu Baibolo icho chamovwirani kuti muthembenge chomene Yehova?

Nanga ni apo nthambuzgo iyi yikaŵa yindambe, nkhaghanaghanirangapo nkhani ya Yeremiya, chomene pa nyengo iyo wakaŵikika mu jele apo Ŵababuloni ŵakazingilizga Yerusalemu. Vikawonekanga nga kuti kwa iyo mbwenu kwamara, kweni Yehova wakamuvikilira mu nthowa yakuzizika chomene. Apo ŵanthu mu Yerusalemu ŵakamba kutambura na njara, Yeremiya wakaŵa kuti wakupokera chakurya ndipo wakapona apo msumba ukaparanyikanga. (Yeremiya 37:21) Yehova wakuwona ndipo wakumanya makora umo vinthu viliri kwa ise kuluska umo ise tingawonera, nakuti wakumanya umo vimalirenge. Nanga vingawoneka nga kuti palije icho tingachita, Yehova watovwirenge umo tingachitira pa nyengo yakwenelera.

Nadezhda Semenova

Chaka cha kubabikira: 1985 (Yekaterinburg, Chigaŵa cha Sverdlovsk)

Mbiri yake: Apo wakaŵa muchoko, wakatemwanga kwimba kwaya ku sukulu na kuvina. Wakugwira ntchito mu sitoro yinyake

Mukuru wake ndiyo wakamba kusambira unenesko ndipo wakamusambizgako iyo. Nadezhda, amama ŵake na mukuru wake, wose ŵakazgoka Ŵakaboni ŵa Yehova. Ŵakabatizika mu 1997

Wakatengwa kwa Dmitriy mu 2010

Ivyo Wakayowoya

Kasi ni nkhani wuli ya mu Baibolo iyo yakhozga chomene chipulikano chinu?

Mwasonosono apa tikaŵazga nkhani ya chokoro cha ku Zarefati na umo chikalongolera chipulikano pambere chindasange vitumbiko. Nkhani iyo tikaŵazga yikati: “Chiuta wakutumbika ŵanthu awo ŵali na chipulikano.” Ndipo nkhani iyi yikakoraso mazgu gha mu Zion’s Watch Tower ya 1898, agho ghakulutizga kuti: “Ndimo viliriso na ise. Pa umoyo tikukumana na masuzgo agho ghakutiyezga usange tili na chipulikano chakukhora. Usange tichitenge vinthu na chipulikano titumbikikenge; kweni usange titondekenge kulongora chipulikano, titumbikikenge yayi.”

Ivi vikanovwira kumanya kuti kwali chiyezgo chingaŵa chikuru wuli, ntchakuzirwa chomene kuti nane nichiteko chigaŵa chane na kulutilira kugomezgeka kwa Yehova na ŵabali kweniso ŵadumbu ŵane. Para nachita nthena, mbwenu Yehova wanovwirenge kuzizipizga na kunipa chikanga, kukhozga chipulikano chane kweniso kunipa nkhongono izo nkhukhumbikwira.

Nga umo viliri kwa Dmitriy na Nadezhda, Yehova wakovwira ŵateŵeti ŵake kuti ŵaŵe na chikanga na ŵakukhora apo ŵakutambuzgika. Wakuŵalekapo ŵekha yayi.—Joshuwa 1:9.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI