Pa October 10, 2022, Khoti la Solnechniy ilo lili ku Chigaŵa cha Khabarovsk likati Mubali Boris Yagovitov wali na mulandu ndipo likamweruzga kuti waleke kusangikaso na mulandu unyake kwa vyaka 5. Mubali uyu ŵamusunga mu jele myezi 9. Chigamuro chati chapelekeka nyengo yeneyiyo ŵakamufumiska ndipo pasono ŵamujalirenge mu jele yayi.

1. December 14, 2020

   Ŵakufufuza mulandu ŵakamba kusanda mazgu ghakujambulika agho Boris wakayowoyeskananga na mpolisi uyo wakapusikizgira kuti wakukhumba kusambira Baibolo

2. May 14, 2021

   Ŵamazaza ŵakamujulira mulandu Boris. Ŵakati wali na mulandu wakuchitako maungano gha gulu ilo likuchita vinthu vyakofya kweniso kuti wakakopanga ŵanthu ŵanyake kuti nawo ŵanjire gulu ili

3. June 5, 2021

   Ŵakamufumba mafumbo pamoza na Nataliya uku nyumba yawo yikusecheka. Paumaliro ŵakamusunga dankha mu jele

4. June 7, 2021

   Wakafumiskika mu jele na kutumika pa jele la panyumba

5. December 29, 2021

   Khoti lamba kutegherezga mulandu wake. Apo ŵakategherezganga mulandu wake, wakwimira boma pa milandu wakati Boris wasungike dankha mu jele chifukwa wakaswa malango agho wakapika pa jele la panyumba. Ŵamazaza ŵakamusunga dankha mu jele

6. February 24, 2022

   Mulandu ŵakawuwezgera kwa wakwimira boma pa milandu chifukwa ŵakufufuza mulandu ŵakalondezga vyose yayi ivyo vikukhumbikwa. Ndipouli, Boris wakafumiskika yayi mu jele umo wakasungikanga

7. June 20, 2022

   Khoti likambiraso kutegherezga mulandu wake

Boris na Nataliya ŵalongora chiyelezgero chiwemi pa nkhani ya kuŵika maghanoghano ghawo pa vinthu viwemi na vyakulumbika. Tili na chigomezgo chose kuti “Chiuta wa mtende” walutilirenge kuŵa nawo.—Ŵafilipi 4:8, 9.